މެޑްރިޑް (ޖެނުއަރީ 5) - ގޮންޒާލޯ ގާސިއާ ހެދި ހެޓްރިކާ އެކު، ރެއާލް މެޑްރިޑުން ރޭ ސްޕެނިޝް ލީގުގައި ކުޅުނު މެޗުގައި 5-1 އިން ރެއާލް ބެޓިސް ބަލިކޮށްފި އެވެ.
ލީގުގެ އެއް ވަނައިގައި އޮތް ބާސެލޯނާގެ ލީޑު ރޭގެ ރެއާލުގެ ނަތީޖާއާ އެކު ވަނީ ކުޑަވެފަ އެވެ. ބާސެލޯނާ އަށް 19 މެޗުން 49 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލަށް 19 މެޗުން ވަނީ 45 ޕޮއިންޓް ލިބިފަ އެވެ.
ރޭގެ މެޗުގައި ރެއާލްގެ ތަރި އަކީ، 21 އަހަރުގެ ފޯވާޑް ގޮންޒާލޯ ގާސިއާ އެވެ. މި ފަހަރުގެ ޓްރާންސްފާ މާކެޓްގައި ގިނަ ޓީމުތަކަކުން ހޯދަން މަސައްކަތް ކުރަމުން އަންނަ ގާސިއާ ވަނީ، ކީލިއަން އެމްބާޕޭ ނެތްތަން ރޭގެ މެޗުގައި ރަނގަޅަށް ފޫބައްދައިފަ އެވެ.
މި މެޗުގައި ރެއާލުގެ އަނެއް ލަނޑުތައް ޖެހީ ފްރާންސް ގާސިއާ އަދި ރައުލް އަސެންސިއޯ އެވެ. ރެއާލްގެ ރޮޑްރީގޯ އާއި ފެޑެރީކޯ ވަލްވޭޑޭ ވަނީ ދެ ގޯލު ޖަހަން ފުރުސަތު ތަނަވަސްކޮށްދީފަ އެވެ. އަދި، އަނެއް ލަނޑަށް ފުރުސަތު ހޯދައިދިނީ އާޑާ ގުލާ އެވެ.
މި މެޗުގައި ބެޓިސް އިން ޖެހި ހަމައެކަނި ލަނޑު ކާމިޔާބުކުރީ، 3-0 އިން ރެއާލް ކުރިގައި އޮއްވައި، ކޫޗޯ ހެނާންޑޭޒް އެވެ.
މި މެޗަށް ފަހު ރެއާލުން ދެން ކުރިމަތިލާނީ، ސްޕެނިޝް ސުޕަ ކަޕް ސެމީ ފައިނަލުގައި އެތުލެޓިކޯ މެޑްރިޑާ އެވެ. އެތުލެޓިކޯ ރޭ ކުޅުނު މެޗުން ވަނީ ސޮސިއެޑާޑާ 1-1 އިން އެއްވަރުވެފަ އެވެ.
