ހުޅުމާލޭގެ ދެ ފިޔަވަހިން އަމިއްލަ މީހުންނަށް ދިރިއުޅެން ދޫކޮށްފައި ހުރި ގޯތިތަކުގައި 10 ބުރިއަށް އިމާރާތް ކުރުމަށް ގަވާއިދުތައް ބަދަލުކުރައްވާނެ ކަމަށް ރައީސް މުހައްމަދު މުއިއްޒު ވިދާޅުވީ މި ދާދި ފަހުން އާންމުކުރި ހުޅުމާލޭގެ މާސްޓާޕްލޭނާ ހިލާފަށް ކަން "އަދަދު" އަށް އެނގިއްޖެ އެވެ.
ހުޅުމާލޭގެ މާސްޓާ ޕްލޭނަށް ބޮޑެތި ބަދަލުތަކެއް ގެނައުމަށް ފަހު އާންމުކުރީ މި އަހަރުގެ މެއި 26، ގަ އެވެ. އާ މާސްޓާޕްލޭންގައި އެންމެ ބޮޑު ބަދަލުތަކެއްގެ ގޮތުގައި ފޭސް ދޭކާއި ފޭސް ތިނެއްގެ ބިން ގުޅުވާލައިގެން ހިއްކުމާއި، ބަނދަރު ސަރަހައްދު ބޮޑުކުރުމެވެ. މިއީ، ހުޅުމާލެއަށް އެކުލަވާލި ހަތަރު ވަނަ މާސްޓާޕްލޭނެވެ.
މި މާސްޓާޕްލޭންގައި އޮތް ގޮތުން، ހުޅުމާލޭގެ އެއް ވަނަ ފިޔަވައްސާއި ދެ ވަނަ ފިޔަވަހިން، ބިންވެރިޔާ ސްކީމުގެ ދަށުން ދޫކޮށްފައިވާ ގޯތިތައް ހިމެނޭހެން، އެންމެ އުސްކޮށް އިމާރާތްކުރެވެނީ ހަތް ފަންގިފިލާއަށެވެ. އެއަށް ވުރެ އުސްކޮށް އިމާރާތްކުރެވެނީ ސޯޝަލް ހައުސިން އާއި މެދު ފަންތީގެ ހައުސިން އާއި ލަގްޒަރީ ހައުސިންއަށް ހާއްސަކޮށްފައިވާ ބިންތަކުގަ އެވެ. މި ބިންތަކުގައި އިމާރާތްކުރެވޭނީ 15 ފަންގިފިލާއަށެވެ.
ނަމަވެސް، މުއިއްޒު ވަނީ އަދި އާންމުކުރިތާ ހަތް މަސް ނުވާ މާސްޓާޕްލޭނާ ހިލާފަށް 10 ފަންގިފިލާއަށް އިމާރާތްކުރަން ގަވާއިދުތައް ބަދަލުކުރާނެ ކަމަށް ވިދާޅުވެފަ އެވެ. އެއީ، ތިރީ ފްލޯ ޕާކިންއަށް، އަދި އެއް ފްލޯ ކޮމާޝަލް ޖާގައަށް ހާއްސަކުރަން ޝަރުތުކޮށެވެ.
"މި ދެ ފިޔަވަހީގައި ދޫކޮށްފައިވާ ގޯތިތަކުގައި އިމާރާތް ކުރެވޭ އުސްމިން ވައުދުވެފައިވާ ގޮތަށް 10 ބުރިއަށް ބަދަލުކޮށްދޭނަން،" އެމަނިކުފާނު ވިދާޅުވި އެވެ.
މިއީ ވައުދެއް ކަމަށް ވިދާޅުވެ އެކަން ކޮށްދެއްވާނެ ކަމަށް މުއިއްޒު ވިދާޅުވިިއިރު، މި ފަހުން މާސްޓާޕްލޭނަށް ބަދަލު ގެނައި އިރު، އެ ބަދަލު އެޗްޑީސީން ނުގެނައީ ކީއްވެގެން ކަމެއް ނޭނގެ އެވެ. އަދި، މުއިއްޒު އާއި ސަރުކާރުގެ ވިސްނުމާ ހިލާފަށް ބޮޑު ހަރަދު ކޮށްގެން މާސްޓާޕްލޭނެއް އެކުލަވާލި ސަބަބެއް ވެސް ނޭނގެ އެވެ.
ހުޅުމާލޭގެ މާސްޓާޕްލޭންތައް އެކުލަވާލަނީ، ބިން ބޭނުންކުރާނެ ގޮތުގެ އިތުރުން، އެއީ ބޯހިޔާވަހިކަމުގެ ބޭނުމަށް ދޫކުރާ ބިމެއް ނަމަ، އެ ބިމެއްގައި އިމާރާތްކުރެވޭނެ ފަންގިފިލާގެ އަދަދު ކަނޑައަޅައި، އެ އިމާރާތެއްގައި ދިރިއުޅޭނެ ކަމަށް ލަފާކުރެވޭ މީހުންގެ އަދަދު ހިމަނައިގެންނެވެ.
އާބާދީގެ އަންދާޒާތައް މުހިންމު ވަނީ ތަނުގެ އެހެން ހިދުމަތްތައް ގާއިމުކުރާނެ މިންވަރު ދެނެގަތުމަށެވެ. މިސާލަކަށް ކަރަންޓާއި ފެނާއި ނަރުދަމާގެ ނިޒާމެވެ. މި ނިޒާމު ފަރުމާކުރަނީ ދިރިއުޅޭ އާބާދީއަށް، ލޯޑު ބޮޑު ނުވެ، ހިދުމަތް ދެވޭނެ ގޮތަށެވެ.
އޭގެ އިތުރުން އެ ތަނެއްގައި ހުންނާނެ ސްކޫލުތަކާއި މިސްކިތްތަކާއި ހިތްފަސޭހަ މައިޒާންތަކުގެ އަދަދާއި، އާންމު އިޖުތިމާއި ބޭނުންތަކަށް ޖާގަ ކަނޑައަޅާނެ މިންވަރު ވެސް ބިނާކުރަނި ދިރިއުޅޭނެ ކަމަށް އަންދާޒާ ކުރާ އާބާދީގެ އަދަދަށް ބިނާކޮށެވެ.
މިހެން ނަމަވެސް މާސްޓާޕްލޭނަކީ ގާނޫނީ ގޮތުން އޭގައި ބުރަދަނެއް ހުރި އެއްޗެއް ނޫން ކަމުން އެއަށް އެއްވެސް ބަދަލެއް ނުގެނަޔަސް ސަރުކާރުން ބޭނުން ވެއްޖެ ހިނދެއްގައި ހުޅުމާލޭގައި 10 ބުރިއަށް އިމާރާތްކުރަން ހުއްދަ ދެވޭނެ އެވެ. އަދި މި ހުއްދަ ދިނުމުގެ ބާރު ލިބެނީ، އެޗްޑީސީއަށް ނޫން ކަމަށާއި އެއީ ޕްލޭނިން މިނިސްޓްރީއަށް ލިބޭ ބާރެއް ކަމަށް 19 ވަނަ ރައްޔިތުންގެ މަޖިލީހުން އޮތީ ކަނޑައަޅާފަ އެވެ.
މަޖިލީހުން މިހެން ކަނޑައެޅި ނަމަވެސް، އެޗްޑީސީން ބިލްޑިން ޕާމިޓްތައް ދޫކުރަމުން އަންނަނީ އެ ކުންފުނިން ގެންގުޅޭ ގަވާއިދުތަކުގެ ދަށުންނެވެ. މީގެ ތެރެއިން ފޭސް އެކަކާ ގުޅޭ ގަވާއިދު އެޗްޑީސީގެ ވެބްސައިޓުން ފެންނާކަށް ނެތެވެ. ފެންނަން އޮތީ ހުޅުމާލޭ ދެވަނަ ފިޔަވަހީގައި ޕްލޭނިން އަދި އިމާރާތްކުރުމުގެ އުސޫލެވެ. އެ އުސޫލުގައި އޮތް ގޮތުން އެންމެ އުސްކޮށް އިމާރާތްކުރެވެނީ ހަ ފަންގިފިލާއަށެވެ.
މިއީ ވެސް މި ސަރުކާރުން އެޗްޑީސީ ހިންގަން ހަަވާލުކުރި މެނޭޖުމަންޓުން، މިދިޔަ އަހަރުގެ ސެޕްޓެމްބަރު 2، ގައި އާންމުކޮށް އެ އަހަރުގެ އޮކްޓޫބަރު 8، އިން ފެށިގެން އަމަލުކުރަމުން އަންނަ ގަވާއިދެކެވެ.
އެޗްޑީސީގެ މިހާރުގެ މެނޭޖުމަންޓުން ގެންގުޅޭ ސްޓޭންޑެއް ނޭނގުނު ނަމަވެސް، އެޗްޑީސީގެ ކުރީގެ މެނޭޖުމަންޓުން ވަނީ ހިދުމަތްތަކަށް ނުތަކާ ވަރަށް ހުޅުމާލޭގައި އިމާރާތްކުރަން ހުއްދަ ނުދޭނެ ކަމަށް ބުނެފަ އެވެ. ކުރީގެ ޕްލޭނިން މިނިސްޓަރު އަސްލަމް ވެސް ގެންގުޅުއްވީ މި ސްޓޭންޑެވެ.
