ލަންޑަން (ޑިސެމްބަރު 24) - ޕެނަލްޓީ ޖަހައިގެން 8-7 އިން ކްރިސްޓަލް ޕެލަސް ބަލިކޮށް އާސެނަލުން އިނގިރޭސި ލީގު ކަޕްގެ ސެމީ ފައިނަލުން ޖާގަ ހޯދައިފި އެވެ.
ރޭގެ މެޗުގައި ފުރިހަމަ ވަގުތު ހަމަވިއިރު، ދެ ޓީމު އޮތީ 1-1 އިން އެއްވަރުވެފަ އެެވެ. އާސެނަލުން ފޮނުވާލި އަށް ޕެނަލްޓީ ވެސް ކާމިޔާބުކުރިއިރު، ޕެލަސް އިން ފޮނުވާލި ހަތް ޕެނަލްޓީއެއް ވަނީ ގޯލަށް ވައްދާލައިފަ އެވެ. ޕެލަސް ބަލިވީ، އެ ޓީމުގެ މެކްސެން ލަކްރޯ ފޮނުވާލި ޕެނަލްޓީ އާސެނަލްގެ ގޯލު ބެލެހެއްޓި ސްޕެއިނުގެ ކީޕަރު، ކެޕާ އަރިއްޒަބަލާގާ މަތަކުރުމުންނެވެ.
އެމިރޭޓްސް ސްޓޭޑިއަމްގައި ރޭ ކުޅުުނު މެޗުގައި ޕެލަސްގެ ކީޕަރު، ވޯލްޓާ ބެނިޓޭޒް ވަނީ އާސެނަލުން ފޮނުވާލި ގިނަ ހަމަލާތަކެއް މަތަކޮށްފަ އެވެ. މި މެޗުގައި، އާސެނަލުން ލީޑުނެގީ 80 ވަނަ މިނިޓްގައި ކޯނަރަކުން ޕެލަސްގެ އޭރިއާތެރެއަށް އައި ބޯޅައެއް ހުއްޓުވަން އުޅުމުގެ ތެރޭގައި، އެ ޓީމުގެ ލަކްރޯ އަތުން ބައިކޮޅަށް ވަން ގޯލަކުންނެވެ.
ޕެލަސް އިން އެއްވަރުކުރީ އިތުރު ވަގުތުގެ ފަސް ވަނަ މިނިޓްގައި މާކް ގޭހީ ޖެހި ގޯލަކުންނެވެ. އޭގެ ފަހުން، އާސެނަލް މޮޅުކޮށްދޭން ޑެކްލަން ރައިސް އަށް ލިބުނު ފުރުސަތެއްގައި ފޮނުވާލި ބޯޅަ ކީޕަރު ބެނިޓޭޒް ވަނީ މަތަކޮށްފަ އެވެ.
ނަތީޖާ ނެރެން ޕެނަލްޓީ އަށް ދިއުމުން އާސެނަލްގެ ޕެނަލްޓީތައް ކާމިޔާބުކުރީ، މާޓިން އޮޑެގާޑް، ރައިސް، ބުކާޔޯ ސަކާ، ލެއަންޑްރޯ ޓްރޮސާޑް، މިކޭލް މެރީނޯ، ރިކާޑޯ ކަލަފިއޯރީ، ޖޫރިއަން ޓިމްބާ އަދި ވިލިއަމް ސަލީބާ އެެވެ. ޕެލަސްގެ ފުރަތަަމަ ހަތް ޕެނަލްޓީ ކާމިޔާބުކުރީ، ޖިއާން-ފިލީޕް މަޓޭޓާ، ޑެވަނީ، ވިލް ހިއުސް، ޖެފަސަން ލާމާ، ބްރޫނޯ ސޯސާ، އެޑަމް ވާޓަން އަދި އޫޗޭ އެވެ.
ސެމީ ފައިނަލުގެ ދެ ލެގުގައި އާސެނަލުން ކުޅޭނީ ޗެލްސީއާ އެެވެ.
