ސަރުކާރު ސްކޫލްތަކުގެ ތާރީހު ފޮހެލައި އެ ސްކޫލްތަކުގެ ކިޔަވާކުދިންގެ ޔުނިފޯމް 2027 ވަނަ އަހަރުން ފެށިގެން އެއްގޮތްކުރަން ނިންމާފައި އޮތް ގޮތާއި އެއްގޮތަށް އަމަލުކުރާނަމަ ބެލެނިވެރިން އަތުން 80 މިލިއަނަށްވުރެ ގިނަ ރުފިޔާ ހަރަދުވާނެ ކަމަށް ކުރީގެ ރައީސް މުހައްމަދު ނަޝީދު ލަފާކުރައްވައިފި އެވެ.
ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގައި 90،000 އަށްވުރެ ގިނަ ދަރިވަރުން އެބަތިބި ކަމަށާއި ސަރުކާރުން މިހާރު ހުށަހަޅާފައިވާ ގޮތަށް ޔުނިފޯމު ބަދަލުކުރަން ދަރިވަރަކަށް މަދުވެގެން 900 ރުފިޔާ ހަރަދުވާނެ ކަމަށެވެ.
"ބެލެނިވެރިން އަތުން ޖުމްލަ 80 މިލިއަނަށްވުރެ ގިނަ ރުފިޔާ ނަގައި، އެ ފައިސާ ފޮތި ފިހާރަތަކަށް ދިނުމަކީ ދެކޮޅު ޖެހޭ ކަމެއް ނޫން. ޔުނިފޯމު ބަދަލު ކުރުމަކީ ހަރަދު ބޮޑު ބޭކާރު ކަމެއް،" ނަޝީދު ލިޔުއްވާފައިވެ އެވެ.
އަދި، ދަރިވަރުން މިހާރު ވެސް ތިބެނީ އެކަށީގެންވޭ ވަރަށް ނިވާ ވެގެން ކަމަށް ވެސް ނަޝީދު ވިދާޅުވި އެވެ.
އެޑިޔުކޭޝަން މިނިސްޓްރީން އެކުލާފައިވާ "ސަރުކާރު ސްކޫލްތަކުގެ ދަރިވަރުންގެ ޔުނީފޯމް އުސޫލު" ގައިވާ ގޮތުން، ޔުނީފޯމާއެކީ ސްކާޓު އެކަނި ލެވޭނީ ފައުންޑޭޝަން ސްޓޭޖާއި ކީ ސްޓޭޖު 1 ގެ އަންހެން ދަރިވަރުންނަށް އެކަންޏެވެ. މިއީ ބޭބީ ނާސަރީން ފެށިގެން ގްރޭޑު ތިނަކާ ހަމައަށެވެ.
އަންހެން ދަރިވަރުންނަށް ސްކާޓާ އެކީ ހަރުވާލު ލާން މަޖުބާރުކުރަން ސަރުކާރުން ނިންމިއިރު، މި ރާއްޖޭގައި ސްކޫލްތައް އުފެދުނީއްސުރެން މިއަދާ ހަމައަށް ވެސް ސްކޫލްތަކުގައި ކުދިންގެ ރަސްމީ ޔުނީފޯމަކީ ސްކާޓެކެވެ. އަދި ބުރުގާ އަޅާ ދަރިވަރުންނަށް، ޔުނީފޯމާ އެކީ ހަރުވާޅު ލެވެ އެވެ.
ނަމަވެސް ސަރުކާރުން ވަނީ ޒަމާންވީ ގޮތް ދޫކޮށް، އަންހެން ދަރިވަރުންގެ ރަސްމީ ޔުނީފޯމް އަޅަން ތަފާތު ފަސް އޮޕްޝަނެއް ދީފަ އެވެ. މި އުސޫލަށް އަމަލުކުރަން ފަށަނީ 2027 ގައި ކަމުން، ޔުނީފޯމްތަކަށް ބަދަލު އަންނާނީ އަންނަ ދިރާސީ އަހަރުގެ ކިޔެވުން ނިންމާފަ އެވެ.
އެޑިޔުކޭޝަނުން މި ގޮތަށް މި ބަދަލު ގެނައި ސަބަބެއް ނޭނގެ އެވެ. އެޑިޔުކޭޝަނުން ނެރުނު ސާކިއުލާގައި ބުނެފައި ވަނީ މި ބަދަލުތައް ގެނައި ސްކޫލުތަކުގެ އިސްވެރިންނާ ވަރަށް ފުޅާ ދާއިރާއެއްގައި މަޝްވަރާކުރުމަށް ފަހުގައި ކަމަށެވެ. މިއިން އެއްވެސް ކަމެއްގައި ބެލެނިވެރިންގެ ބަހެއް ހޯދި ކަމަކަށް ނެތެވެ.
މީގެ އިތުރުން، ސަރުކާރު ސްކޫލްތަކުގެ ޔުނިފޯމުތައް އެއްގޮތްކުރަން އައު އުސޫލުގެ ދަށުން ބޭނުންކުރެވޭނީ ހަމައެކަނި ގައުމީ ދިދައިގެ ކުލަތަކުގެ އިތުރުން އެޑިއުކޭޝަން މިނިސްޓްރީގެ ކުލަ އެވެ.
މިގޮތުން ރަސްމީ ޔުނިފޯމުތަކުގެ މަތީ (ގަމީސްޓޮޕް/ގަމީސް) ހުންނަން ޖެހެނީ ހުދު، ސްކައިބްލޫ، ޓީ ގްރީން ނުވަތަ ލައިޓް ރެޑެވެ. ރަސްމީ ޔުނިފޯމުގެ ތިރި (ފަޓްލޫނު/ސްކާޓް/ސޯޓު) އައު އުސޫލުގެ ދަށުން ހުންނަން ޖެހެނީ ކަޅު ނުވަތަ ނޭވީ ބްލޫ ކުލައިގަ އެވެ.
އޭގެއިތުރުން ބުރުގާ ހުންނަން ޖެހެނީ ނެވީ ބްލޫ، ރޯޔަލް ގްރީން، ޑާކް ރެޑް ނުވަތަ ހުދު ކުލައިގަ އެވެ. ފަޓުލޫނު ނުވަތަ ސްކާޓް ކުލައިގެ ބުރުގާ އަޅާނަމަ އަޅަން ޖެހޭނީ ކަޅު ނުވަތަ ނޭވީ ބްލޫގެ ބުރުގަލެކެވެ.
ސްކޫލްތަކުގައި ބޭނުންކުރާ އެކްޓިވިޓީ ޔުނިފޯމްތަކުގެ މަތީ (ޓީޝާޓް) ހުންނަން ޖެހޭނީ ނޫ ކުލަ، ފެހި ކުލަ، ރަތް ކުލަ ނުވަތަ ސްކޫލުގެ ކުލައިގަ އެވެ. ނަމަވެސް ހުރިހާ ސްކޫލެއްގެ ވެސް އެކްޓިވިޓީ ޔުނިފޯމުގެ ތިރި (ސޯޓު/ޓްރެކްޝޫޓް/ސްކާޓް) ހުންނަން ޖެހޭނީ ކަޅު ކުލައިގަ އެވެ.
