މާފަންނު މެދު ދާއިރާގެ މެންބަރު އަސްމާ ރަޝީދު (އަސްމާއްތަ)، އެ ދާއިރާގެ ރައްޔިތުންނަށް ފޮނުއްވި މެސެޖަކީ ރައްޔިތުންގެ ހިޔާލު ހޯދުމަށް މެންބަރުންނަށް އޮތް ޒިންމާ އަދާކުރުމަށް ކުރައްވާފައިވާ ކަމެއް ކަމަށް ދެކެވަޑައިގަންނަވާ ކަމަށް ކުރީގެ ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެ އެވެ.
ޑިސެމްބަރު 4 ވާ ބުރާސްފަތި ދުވަހުގެ ރޭ މާފަންނު އަވަށުގެ ރައްޔިތުންނާއެކު މުއިއްޒު ބާއްވާ ބައްދަލުވުމުގައި ހިޔާލުފާޅު ކުރަން ބޭނުންވާ މީހުން އަންގައި ދިނުމަށް އެދި އަސްމާ މާފަންނު މެދު ދާއިރާގެ މެންބަރުންނަށް މެސެޖު ކުރެއްވީ، ވީހާވެސް ގިނަ ރައްޔިތުންގެ ސުވާލާއި ހިޔާލު މުއިއްޒުގެ އަރިހަށް ގެންދެވުމަށް ކަމަށް އޭނާ ވިދާޅުވެފައިވެ އެވެ.
އެ މެސެޖު އާންމުވުމުން ރައްޔިތުންގެ ފާޑުކިޔުންތައް މުއިއްޒު އަށް އަމާޒުވި އެވެ. އެހެންވެ، އެކަމާ ކޯފާ އިސްކުރައްވައި ރައްޔިތުންގެ މަޖިލީހުގެ އިޖުތިމާއީ ކޮމިޓީގެ މުގައްރިރުކަމުންނާއި، ޔޫކޭ-މޯލްޑިވްސް ފްރެންޑްޝިޕް ގްރޫޕުގެ ޗެއާކަމުން، އަސްމާ އިއްޔެ ވަކިކޮށް، އަދި އަސްމާ ޔޫކޭއަށް ވަޑައިގަތުމަށް ހަމަޖެހިފައި އޮތް މަޖިލީހުގެ ދަތުރެއް ކެންސަލްކުރި އެވެ.
އެކަމާ ގުޅިގެން ކަންބޮޑުވުން ފާޅުކުރައްވައި މާރިޔާ ވިދާޅުވީ އަމިއްލަ ޕާޓީގެ މެންބަރަކާ މެދު މުއިއްޒު އެހާ އިހާނެތިކޮށް ހިއްތަވައިގެން ނުވާނެ ކަމަށެވެ. މިއީ އަންހެނުންނަށް އިހުތިރާމް ކުޑަކުރުމަށް މުއިއްޒު ކުރެއްވި ކަމެއްގެ ގޮތުގައި މާރިޔާ ސިފަކުރެއްވި އެވެ.
ދާއިރާގައި ހިމެނޭ ރައްޔިތުންގެ ލަފާ ހޯދުމަކީ ކޮންމެ މެންބަރަކު ވެސް ކުރައްވަން ޖެހޭ ކަމެއް ކަމަށާއި އަސްމާ ވެސް އަދާކުރެއްވީ އެ ޒިންމާ ކަމަށް މާރިޔާ ވިދާޅުވި އެވެ.
ޕީއެންސީއަށް ނިސްބަތްވާ މަޖިލީހުގެ މެންބަރުންގެ ތެރެއިން އެންމެ ސީނިއާ، އަދި އުމުރުން އެންމެ ދޮށީ މެންބަރުންގެ ތެރޭގައި ހިމެނިވަޑައިގަންނަވާ އަސްމާއަކީ އެ ޕާޓީގެ އެތެރޭގައި ގޯސްކޮށް ހިންގާ ކަންކަމަށް ފާޑުވިދާޅުވާ މެންބަރެކެވެ.
ޕީއެންސީއަށް މެންބަރުން އިތުރު ކުރުމަށް މީހުންގެ ޒާތީ މައުލޫމާތު ވަގަށް ނަގައި އިލެކްޝަންސް ކޮމިޝަނަށް ވަގު ފޯމު ހުށަހެޅުމުގެ ކަންކަން ކުރީ ޕާޓީގެ ޖަގަހައިގައި ކަމަށް އަސްމާ ވިދާޅުވެފައިވެ އެވެ.
ކައުންސިލް އިންތިހާބު ބޯމަތިވަމުން އަންނައިރު، މާލޭގެ ދާއިރާތަކުގެ ރައްޔިތުންނާއެކު ސިލްސިލާ ބައްދަލުވުންތަކެއް ބާއްވަން މުއިއްޒު ވަނީ ފައްޓަވައިފަ އެވެ. އެގޮތުން ވިލިމާލޭގައި ބައްދަލުވުމެއް އަދި މައްޗަންގޮޅީ އަވަށުގެ ރައްޔިތުންނާއެކު ބައްދަލުވުމެއް ވަނީ ބާއްވައިފަ އެވެ.
