އަތޮޅު ކައުންސިލުތައް އުވާލައި، ރަށު ކައުންސިލްތަކާއި ސިޓީ ކައުންސިލްތަކުގެ މެންބަރުންގެ އަދަދު މަދުކުރުމަށް ސަރުކާރުގެ ފަރާތުން ހުށަހަޅާފައިވާ ދެ ބިލު ދިރާސާކުރަން އެކުލަވާލި ވަގުތީ ކޮމިޓީގެ މުގައްރިކަށް ބާރަށު ދާއިރާގެ މެންބަރު އިބްރާހިމް ޝުޖާއު އިންތިހާބުކޮށްފި އެވެ.
ސަރުކާރުގެ ފަރާތުން ބަދަލުކުރަން ހުށަހަޅާފައިވަނީ ލާމަރުކަޒީ ގާނޫނަށާއި ލޯކަލް ކައުންސިލްތަކުގެ އިންތިހާބުތަކާއި ބެހޭ ގާނޫނެެވެ. ލާމަރުކަޒީ ގާނޫނު ބަދަލުކުރާ ބިލު ހުށަހެޅުއްވީ ވެރިކަންކުރާ ޕީއެންސީގެ ޕީޖީ ލީޑަރު އިބްރާހިމް ފަލާހު އެވެ. ލޯކަލް ކައުންސިލްތަކުގެ އިންތިހާބުތަކާއި ބެހޭ ގާނޫނު ބަދަލުކުރާ ބިލު ހުށަހެޅުއްވީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ އެވެ.
އެ ދެ ބިލު މަޖިލީހަށް ބަލައިގަނެ ހަތް މެންބަރުންގެ ވަގުތީ ކޮމިޓީއަކަށް ފޮނުވަން ފާސްކޮށް، އެ ކޮމިޓީގެ މެންބަރުން އެކުލަވާލީ އިއްޔެ ބޭއްވި މަޖިލީހުގެ ޖަލްސާގަ އެވެ.
އިއްޔެ އެކުލަވާލި ކޮމިޓީގެ މުގައްރިރާއި ނައިބު ހޮވުމަށާއި ބިލު މަސައްކަތުގެ ސުންގަޑި ކަނޑައެޅުމަށް އެ ކޮމިޓީގެ ފުރަތަމަ ބައްދަލުވުން ބޭއްވި ރޭގަ އެވެ.
އެ ބައްދަލުވުމުގައި ކޮމިޓީގެ މުގައްރިރު ކަމަށް ޝުޖާއުގެ ނަން ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހު އެވެ. އެ ހުށަހެޅުން ފާސްވީ ބައްދަލުވުމުގައި ބައިވެރިވި މެންބަރުންގެ އިއްތިފާގުންނެވެ. މެންބަރުންގެ އިއްތިފާގުން ނައިބު މުގައްރިރަކަށް ހޮވީ މައްޗަންގޮޅި މެދު ދާއިރާގެ މެންބަރު އަހުމަދު ޒަމީރު އެވެ.
އެ ކޮމިޓީގައި ދެން ހިމެނެނީ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު، ވެލިދޫ ދާއިރާގެ މެންބަރު މުހައްމަދު އައްބާސް، ފުނަދޫ ދާއިރާގެ މެންބަރު މުހައްމަދު މަމްދޫހު، ތޮއްޑޫ ދާއިރާގެ މެންބަރު ހުސެއިން ސަމީރު، އަދި، ނިލަންދޫ ދާއިރާގެ މެންބަރު ފާތިމަތު ސައުދާ އެވެ.
ރޭގެ ބައްދަލުވުމުގައި މި ބިލު ދިރާސާކޮށް ނިންމަން ސުންގަޑިއެއްގެ ގޮތުގައި ކަނޑައެޅީ ނޮވެމްބަރު 24، ގެ މެންދުރުފަހު 2:00 އެވެ. ބިލަށް އިދާރާތަކާއި ކައުންސިލްތައް އަދި އާންމުންގެ ލަފާ ހޯދުމަށް ސުންގަޑިއެއްގެ ގޮތުގައި ކަނޑައެޅީ ނޮވެމްބަރު 23، ގެ ހެނދުނު 10:00 އެވެ.
ބިލަށް ހިޔާލު ހޯދުމަށް ފިނޭންސް މިނިސްޓްރީ، ލޯކަލް ގަވަމަންޓް މިނިސްޓްރީ، ލޯކަލް ގަވަމަންޓް އޮތޯރިޓީ، އިލެކްޝަންސް ކޮމިޝަން އަދި ހުރިހާ ރަށަކާއި އަތޮޅެއްގެ އަދި ސިޓީއެއްގެ ކައުންސިލްތަކަށް ސިޓީ ފޮނުވުމަށާއި އާންމުންގެ ހިޔާލު ހޯދުމަށް ހުޅުވާލުމަށް ވެސް ރޭގެ ބައްދަލުވުމުގައި ފާސްކުރި އެވެ.
ސަރުކާރުން ލާމަރުކަޒީ ގާނޫނަށް ގެންނަން ހުށަހަޅާފައިވާ ބަދަލުތަކުގައިވާ ގޮތުން ރަށުގެ އާބާދީ 2000 އަށް ވުރެ ކުޑަ ނަމަ އެ ރަށަކުން އިންތިހާބު ކުރާނީ އެންމެ ތިން ކައުންސިލަރުންނެވެ. މިހާރު އޮންނަ ގޮތަށް ފަސް ކައުންސިލަރުން ހޮވާނީ 2000 އަށް ވުރެ ބޮޑެތި އާބާދީތަކުންނެވެ.
ކައުންސިލުތަކުގައި އަންހެން މެންބަރުން ތިބުން ވެސް ބަދަލުގައި ލާޒިމު ކުރެ އެވެ. އެގޮތުން ތިން ކައުންސިލަރުން ހޮވާ ރަށްތަކުގައި މަދުވެގެން އެއް މެންބަރަކީ އަންހެނަކަށް ވާންޖެހެ އެވެ. އަދި ފަސް ކައުންސިލަރުން ހޮވާ ރަށްރަށުގައި ދެ ކައުންސިލަރުންނަކީ އަންހެނުންނަށް ވާންޖެހެ އެވެ.
އެ ބަދަލުތައް ގެނައި ނަމަވެސް މާލެއިން އިންތިހާބު ކުރާނީ ރައްޔިތުންގެ މަޖިލީހުގައި އެ ސިޓީތަކުން މެންބަރުން އިންތިހާބު ކުރާ އަދަދަށެވެ. އެއީ ގާނޫނުގެ ދަށުން އިންތިހާބު ކުރަންޖެހޭ އަންހެން މެންބަރުން ހިމަނައިގެން ކަމަށް އިސްލާހުގައި ބުނެފައިވެ އެވެ. އަދި ފުވައްމުލަކުގެ ކޮންމެ އަވަށަކުން ކައުންސިލަރަކު އިންތިހާބު ކުރާނެ އެވެ.
އިސްލާހުތަކުގެ ތެރޭގައި ލޯކަލް ގަވަމަންޓް އޮތޯރިޓީ (އެލްޖީއޭ) އަށް އިތުރު ބާރު ލިބިދޭ މާއްދާތަކެއް ވެސް ހިމެނެ އެވެ. އެގޮތުން ކޮންމެ އިދާރީ ދާއިރާއެއްގައި އެލްޖީއޭގެ އޮފީސްތައް ހިންގުމުގެ ބާރު އިސްލާހުގެ ދަށުން އެ އިދާރާއަށް ލިބޭނެ އެވެ. އަދި ކައުންސިލްތަކުން ރަސްމީކޯށް ރިޕޯޓު ކުރަންޖެހޭ އަދި ޖަވާބުދާރީވާންޖެހޭ ފަރާތަކީ އެލްޖީއޭ ކަމަށް ވެސް ވަނީ އިސްލާހުގައި ކަނޑައަޅައިފަ އެވެ.
