ރާއްޖޭގައި އެންމެ ފުޅާ ދާއިރާއެއްގައި ލޮލުގެ ފަރުވާ ދޭ އައިކެއާއިން، ދުނިޔޭގެ ލޮލުގެ ފެނުމުގެ ދުވަސް ފާހަގަ ކުރުމަށް ހިލޭ ލޮލުގެ ޓެސްޓު ހެދުމާއެކު ބޭއްވި ހަރަކާތަށް ބޮޑު ތަރުހީބެއް ލިބިއްޖެ އެވެ.
ހުކުރު ދުވަހުގެ ޔޫތު ސެންޓަރުގައި ބޭއްވި އެ ހަރަކާތަށް ގިނަ ބަޔަކު ޒިޔާރަތް ކުރި އެވެ. ބައިވެރިވި މީހުންނަށް ހާއްސަ ހަދިޔާ އާއި އޮފާތައް ދިނެވެ.
އައިކެއާއިން ބުނީ އެ ހަރަކާތުގެ މަގުސަދަކީ ގަވާއިދުން ލޮލުގެ ޗެކަޕް ހެދުމާއި، މަސައްކަތުގެ މާހައުލުގައި ލޮލުގެ ރައްކާތެރިކަމުގެ މުހިންމުކަމަށް ހޭލުންތެރިކުރުވުމެވެ. އަދި ސިއްހީ ފަރުވާގެ މުހިއްމު ބައެއްގެ ގޮތުގައި ލޮލުގެ ތަހުލީލުތައް ހިމެނުމަށް ހިތްވަރު ދިނުމެވެ.
"އަޅުގަނޑުމެން މުޖުތަމައުއަށް ދޭން ބޭނުންވާ މެސެޖަކީ ގަވާއިދު ލޮލުގެ ތަހުލީލު ކުރުމާއި ލޮލުގެ ރައްކާތެރިކަމަށް ކުރެވޭނެ ކަންކަމަށް ސަމާލުކަން ދިނުން،" ޑިޖިޓަލް ޑިވައިސްތަކަށް ވަރަށް ބޮޑަށް އަހުލުވެރި މި ޒަމާނުގައި ލޮލަށް ދޭންޖެހޭ ސަމާލުކުރަން އިތުރު ކުރަން ޖެހޭކަން ފާހަގަ ކުރަމުން އައިކެއާގެ ފަރާތުން ވާހަކަ ދެއްކި އޮފިޝަލް ބުންޏެވެ.
"ގަވާއިދުން ލޮލުގެ ޗެކަޕް ކުރުމަކީ ރައްކާތެރިވުމުގެ އެންމެ ރަނގަޅު ފިޔަވަޅު."
ހުކުރު ދުވަހުގެ ހަރަކާތުގައި ޑައިބެޓިކް ސޮސައިޓީ އޮފް މޯލްޑިވްސް ވެސް ބައިވެރިވި މީހުން ހޭލުންތެރި ކުރުވުމަށް މައުލޫމާތު ދިނެވެ. ހަކުރު ބައްޔަކީ ލޯފަންވުމުގެ އެންމެ ބޮޑު އެއް ސަބަބެވެ.
ބައިނަލްއަގުވާމީ ލޮލުގެ ފެނުމުގެ ދުވަހަކީ އިންޓަނޭޝަނަލް އެޖެންސީ ފޯ ދަ ޕްރިވެންޝަން އޮފް ބްލައިންޑްނެސް (އައިއޭޕީބީ) އިން އިސްނަގައިގެން ފާހަގަކުރާ ދުވަހެކެވެ. މި ދުވަސް އައިކެއާއިން ކޮންމެ އަހަރަކު ވެސް ރާއްޖޭގައި ފާހަގަ ކުރެ އެވެ.
ދެހާސް ތިން ވަނަ އަހަރު އައިކެއާގެ ހިދުމަތް ފެށީ ފެންވަރު ރަނގަޅު ލޮލުގެ ފަރުވާ އަގުހެޔޮކޮށް ލިބޭނެ މަގު ފަހިކޮށް ދިނުމުގެ މަގުސަދުގަ އެވެ. ފާއިތުވި 22 އަހަރު ތެރޭގައި އެ ހިދުމަތް ފުޅާކޮށް، އެންމެ ފަހުން އައިކެއާ ހޮސްޕިޓަލު އުފައްދައި، ޒަމާނީ ވަސީލަތްތަކާއެކު އެތަނުން ލޮލުގެ ގިނަ ފަރުވާތަކެއް ދެ އެވެ.
