އައްޑޫ ސިޓީ ކައުންސިލުން އެ އަތޮޅު ފޭދޫ، ހުޅުދޫ އަދި މީދޫ ވަކިވާން ފެނޭތޯ ބެލުމަށް އިއްޔެ ނެގި އާންމު ވޯޓުގެ ރަސްމީ ނަތީޖާ އިލެކްޝަންސް ކޮމިޝަނުން އިއުލާނުކޮށްފި އެވެ.
އިލެކްޝަންސް ކޮމިޝަނުން އާންމުކޮށްފައިވާ ރަސްމީ ނަތީޖާއިން ދައްކާ ގޮތުގައި އިއްޔެ ކުރިއަށް ގެންދިޔަ ވޯޓުގައި ބައިވެރިވެ ވޯޓު ދިނީ ވަރަށް މަދު ބައެކެވެ.
އައްޑޫ މީދޫއަށް ހާއްސަކޮށްގެން މީދޫ ކައުންސިލް އުފައްދަން ފެންނަ ކަމަށް ނިންމާފައި ވަނީ މީދޫގެ ވޯޓުލެވޭ އާބާދީގެ އެންމެ 42.95 ޕަސެންޓު މީހުންގެ ވޯޓުންނެވެ.
އިއްޔެ ކުރިއަށް ގެންދިޔަ ވޯޓުގައި މީދޫގައި ވަކި ކައުންސިލެއް އުފައްދަން ފެންނަ ކަމަށް 847 މީހުން ވޯޓު ދިނެވެ. ނުފެންނަ ކަމަށް ވޯޓު ދިނީ 144 މީހުންނެވެ. އެ ރަށުގެ ވޯޓުލެވޭ މީހުންގެ ޖުމުލަ އާބާދީއަކީ 2347 އެކެވެ.
ހުޅުދޫއަށް ހާއްސަކޮށްގެން ހުޅުދޫ ކައުންސިލް އުފައްދަން ފެންނަކަމަށް ނިންމާފައި ވަނީ ހުޅުދޫގެ ވޯޓުލެވޭ އާބާދީގެ އެންމެ 37.20 ޕަސެންޓު މީހުންގެ ވޯޓުންނެވެ.
އިއްޔެ ކުރިއަށް ގެންދިޔަ ވޯޓުގައި ހުޅުދޫގައި ވަކި ކައުންސިލެއް އުފައްދަން ފެންނަ ކަމަށް 723 މީހުން ވޯޓު ދިނެވެ. ނުފެންނަ ކަމަށް ވޯޓު ދިނީ 329 މީހުންނެވެ. އެ ރަށުގެ ވޯޓުލެވޭ މީހުންގެ ޖުމުލަ އާބާދީއަކީ 2874 އެކެވެ.
އައްޑޫ ސިޓީން ވަކިނުވެ، އެ ސިޓީގެ އިދާރީ ހިންގުމުގެ ތެރޭގައި އޮތުމަށް ފޭދޫ ރައްޔިތުން ނިންމީ ފޭޑޫގެ ވޯޓުލެވޭ އާބާދީގެ 55.94 ޕަސެންޓު މީހުންގެ ވޯޓުންނެވެ.
އިއްޔެ ކުރިއަށް ގެންދިޔަ ވޯޓުގައި ފޭދޫގައި ވަކި ކައުންސިލެއް އުފައްދަން ނުފެންނަ ކަމަށް 1784 މީހުން ވޯޓު ދިނެވެ. ފެންނަ ކަމަށް ވޯޓު ދިނީ 616 މީހުންނެވެ. އެ ރަށުގެ ވޯޓުލެވޭ މީހުންގެ ޖުމުލަ އާބާދީއަކީ 4355 އެކެވެ.
