ސޯޝަލް މީޑިއާ ޕްލެޓްފޯމް ފޭސްބުކްގައި ލިޔުނު ޕޯސްޓަކާާ ގުޅިގެން ހިފަހައްޓާފައި އޮތް އިދިކޮޅު އެމްޑީޕީގެ ގައުމީ މަޖިލިސް މެންބަރު އަދި އެ ޕާޓީގެ ހުޅުމާލެ އުތުރު ދާއިރާގެ ރައީސް ފާތިމަތު ޒަހިއްޔާ (ޒާޔާ) ގެ ފޯނު ފުލުހުން ދޫކޮށްލައިފި އެވެ.
ޒާޔާގެ ފޯނު ފުލުހުން ދޫކޮށްލީ ރޭގެ ވަގުތެއްގަ އެވެ. ޒާޔާ ބުނީ އޭނާގެ ފޯނު ހިފެހެއްޓި މައްސަލައިގައި ބަޔާން ނެގުމަށް ދެ ދުވަހެއްގެ ތެެރޭގައި ގުޅާނެ ކަމަށް ފުލުހުން ބުނި ކަމަށެވެ.
"ރޭގައި ފުލުހުން ފޯނު ދޫކޮށްލައިފި. ބުނީ ދެ ދުވަހެއްގެ ތެރޭގައި ބަޔާން ނަގަން ގުޅާނަމޭ،" ޒާޔާ ބުންޏެވެ.
ކޯޓު އަމުރެއްގެ ދަށުން ޒާޔާ ބަލައި ފާސްކޮށް އޭނާގެ ފޯނު ފުލުހުން ހިފެހެއްޓީ އޮކްޓޯބަރު 7، ގަ އެވެ. ކޯޓު އަމުރުގައި ބުނެފައިވަނީ ޒާޔާގެ ފޯނު ހިފެހެއްޓީ އޭނާގެ ފޭސްބުކް އެކައުންޓުން "ފުލުހުންނަށް އިންޒާރުދީ" ކުރި ޕޯސްޓަކާއި ގުޅިގެން ކަމަށެވެ.
އޭނާގެ ފޯނު ފުލުހުން ދޫކޮށްލާފައި މިވަނީ އެ ފޯނު ފުލުހުންގެ ބެލުމުގެ ދަށުގައި އޮއްވައި ޒާޔާގެ ޒާތީ ވީޑިއޯތަކެއް ސޯޝަލްމީޑިއާގައި އިއްޔެ ލީކު ކޮށްލާފައި ވަނިކޮށެވެ. ޒާޔާގެ ޒާތީ ދެ ވީޑިއޯއެއް ލީކު ކޮށްލީ ކާކުކަން ނޭނގޭ އެކްސް އެކައުންޓަކުންނެވެ. ނަމަވެސް ގިނަ ބަޔަކު އެ އެކައުންޓު ރިޕޯޓު ކުރަން ފެށުމުން އެ އެކައުންޓު އިއްޔެ މެންދުރުފަހު ވަނީ އެކްސްއިން ރިމޫވް ކޮށްފަ އެވެ.
މި ނޫހާ ވާހަކަދައްމުން ޒާޔާ ބުނީ އެ ވީޑިއޯ ލީކު ކުރީ ފުލުހުން ކަމަށެވެ.
"ފުލުހުން ފޯނު އަތުލުމުގެ ދެ ދުވަސްކުރިން ސްނެޕްޗެޓަށް ލޮގިން ވާން މަސައްކަތް ކުރި ކަމަށް ނޯޓިފިކޭޝަން އައި، ސީޓްރެކްސް ބިލްޑިން ކައިރިން. އެއީ ހަމަ ސީދާ ފުލުހުން ކުރާ ކަމެއް އެއީ، ގެންދިޔަ ފަހުން ލީކުވެފައި އެ ހުރީ،" ޒާޔާ ބުންޏެވެ.
"ލީކުވަންޏާ ލީކުވާން ވީނު މީގެ ކުރިން ވެސް، ކީއްވެ މިއަދު ލީކު ވާންވީ، ޒާޔާ ހަމަ މި އުޅެނީ އެމްޑީޕީގެ ކަންކަމުގައި އިސްކޮށް ހަރަކާތްތެރިވެ."
ފުލުހުންގެ ބެލުމުގެ ދަށުގައި ޒާޔާގެ ފޯނު އޮއްވައި އޭނާގެ ވީޑިއޯތަކެއް ސޯޝަލްމީޑިއާގައި ލީކުކޮށްލާފައިވާއިރު، ރައީސް މުހައްމަދު މުއިއްޒު އަށް އިންޒާރު ދިން ކަމަށް ދޭޭހަވާ މޭރުމަކުން ސޯޝަލް މީޑިއާގައި ޕޯސްޓެއް ކުރި ކަމަށް ތުހުމަތުކޮށް އެމްޑީޕީގެ މެންބަރު އައިޝަތު ޝިމަންގެ ފޯނު ފުލުހުން ހިފަހައްޓާފައި ވަނިކޮށް އޭނާގެ ފޮޓޯއެއް ވެސް ސޯޝަލްމީޑިއާގައި ލީކުކޮށްލާފައިވެ އެވެ.
ޝިމަންގެ ފޮޓޯއެއް ލީކުކޮށްލީ އޭނާގެ ފޯނު ފުލުހުން އަތުލިތާ 24 ގަޑިއިރު ވެސް ނުވަނީހެވެ. އެކަމާ ގުޅިގެން ފުލުހުންނަށް ވަރަށް ބޮޑަށް ފާޑުކިޔުން އަމާޒުވި އެވެ. ނަމަވެސް ފުލުހުން ވަނީ އެ ތުހުމަތު ދޮގުކޮށްފަ އެވެ.
ތުހުމަތުތައް ދޮގުކޮށް ފުލުހުން ރޭގައި ނެރުނު ބަޔާނެއްގައި ބުނީ ޑިޖިޓަލް ވަސީލަތްތައް ހިމެނޭހެން ފުލުހުންގެ ހިދުމަތުގެ ބެލުމުގެ ދަށަށް ގެނެވޭ ހެކި ބަލަހައްޓަނީ ބައިނަލްއަގުވާމީ މިންގަނޑުތަކަށް ފެތޭ އުސޫލެއްގެ ތެރެއިން ކަމަށެވެ.
