ރައީސް މުހައްމަދު މުއިއްޒަށް އިންޒާރު ދިން ކަމަށް ބުނެ އެމްޑީޕީގެ އެންމެ ނުފޫޒު ގަދަ އެއް ޒުވާން ލީޑަރު އައިޝަތު ޝިމަންގެ ފޯނު އަތުލި މައްސަލައިގައި ތުހުމަތެއް އޮތް ކަމަށް ބުނެ ފުލުހަށް މިއަދު ހާޒިރު ކުރުމަށްފަހު އަނެއްކާވެސް ބަޔާން ނުނަގައި ފޮނުވާލައިފި އެވެ.
ޝިމަންގެ ފޯނު ފުލުހުން އަތުލީ ބުރާސްފަތި ދުވަހެވެ. އެ މައްސަލައިގައި ބަޔާނެއް ވެސް ނަގަން ބޭނުން ނުވާ ކަމަށް ބުނެ ފުލުހުން ވަނީ ޝިމަންއާ ފޯނު ހަވާލު ކުރަން މަސައްކަތްކޮށްފަ އެވެ. އެކަމަކު ޝިމަންގެ ބަޔާނެއް އަނެއްކާ ވެސް ނަގަން ބޭނުންވާ ކަމަށް ބުނެ ފުލުހުން ވަނީ ރޭގެ ވަގުތެއްގައި ޗިޓެއް ފޮނުވައިފަ އެވެ.
ޝިމަންއަށް ފުލުހުން ޗިޓެއް ފޮނުވީ، ފުލުހުންގެ ބެލުމުގެ ދަށުގައި އޮއްވާ އޭނާގެ ފޯނުން ޒާތީ ފޮޓޯއެއް ލީކުކޮށްލީ ފުލުހުން ކަމަށް ބުނެ މީޑިއާއާ ވާހަކަ ދެއްކި ފަހުންނެވެ.
ޝިމަންގެ ގާނޫނީ ވަކީލު އައިޝަތު ޝީނާ ވިދާޅުވީ ފުލުހަށް މިއަދު ހާޒިރުވާން އެންގީ ތުހުމަތެއް ކުރެވޭ ކަމަށް ބުނެ ނަމަވެސް މިއަދު ފުލުހުންގެ އިދާރާއަށް ހާޒިރުވުމުން ޝިމަންގެ މައްޗަށް އެއްވެސް ތުހުމަތެއް ނުކުރެވޭ ކަމަށް ފުލުހުން ބުނި ކަމަށެވެ.
"ރޭގެ ވަގުތެއްގައި ފުލުހުން ކުއްލިއަކަށް ގުޅުއްވާފައި ވިދާޅުވީ މިހާރު ތުހުމަތު އެބަ ކުރެވެޔޭ މައްސަލައިގައި އެހެންވީމާ މިއަދު ބަޔާން ދިނުމަށް ހާޒިރުވުމަށް އެންގީ، ދެން މިއަދު އަޅުގަނޑުމެން މި އައީ، އައިސްފައި ފުލުހުންނާ ވާހަކަދެއްކި އިރުގައި، އެތެރެއަށް ގެންގޮސްފައި ވިދާޅުވެއްޖެ މިހާރު އަނެއްކާ ވެސް ތުހުމަތެއް ނެތޭ އެއްވެސް ކަހަލަ، އެހެންވީމާ މައްސަލަ ނިންމާ ގޮތް އަންގާނަމޭ، ދެން ފޯނު ވެސް އަނބުރާ މިހާރު ހަވާލުކޮށްފި،" ޝީނާ ވިދާޅުވި އެވެ.
ޝިމަންގެ ފޮޓޯއެއް ލީކުކޮށްލި މައްސަލައިގައި ފުލުހުންނަށް ވަރަށް ބޮޑަށް ފާޑުކިޔުން ވަނީ އަމާޒުވެފަ އެވެ. ޝިމަންގެ ފޯނު ގެންގުޅުނު ފުލުހުންގެ މައްސަލަ ބަލަން ވެސް ވަރަށް ގިނަ ބަޔަކު ދަނީ ގޮވައިލަމުންނެވެ. އެ މައްސަލަ ރައްޔިތުންގެ މަޖިލީހަށް އަދި ނެޝަނަލް އިންޓެގްރިޓީ ކޮމިޝަނަށް ޝިމަންގެ ފަރާތުން ވެސް ވަނީ ހުށަހަޅައިފަ އެވެ.
ޝިމަންގެ ގާނޫނީ ވަކީލުންގެ ޓީމުގައި ދެން ހިމެނޭ އައިކު އަހުމަދު އީސާ ވިދާޅުވީ ފުލުހުންގެ އަމަލުތައް ހުރިގޮތުން ޝިމަންގެ ފޯނު ހިފެހެއްޓީ ސީދާ ބިރުދެއްކުމުގެ ގޮތުންކަން އެނގި ހާމަވާ ކަމަށެވެ.
"ފުލުހުންގެ އަމަލުތަކުން އަޅުގަނޑުމެންނަށް ސާފުވެގެންދިޔައީ ހަމަ ސީދާ ބިރުދެއްކުމުގެ އަމަލެއްކަން މިއީ، އެއްވެސް ކަހަލަ ސީރިއަސް ތުހުމަތެއް އޮވެގެނެއް ނޫންކަން [ޝިމަންގެ] ފޯނު ވެސް ހިފަހައްޓާފައި މިއޮތީ،" އައިކު ވިދާޅުވި އެވެ.
ޝިމަންގެ ފޯނު އަތުލީ ސޯޝަލް މީޑިއާ ޕްލެޓްފޯމް އެކްސްގައި، "Kirk h*m" އޭ ލިޔެގެންނެވެ. އެ ދެ ބަހުގެ ސީދާ މާނައެއް ނޭނގެ އެވެ. ފުލުހުން ބުނަނީ އެއީ މުއިއްޒަށް ނިސްބަތްކޮށް ޝިމަން ބުނި އެއްޗެއް ކަމަށެވެ. އެއީ ސެޕްޓެމްބަރު 20، 2025، ގައި ޝިމަން ކުރި ޕޯސްޓެކެވެ.
