އޮކްޓޯބަރު 3، ގައި އިދިކޮޅު އެމްޑީޕީން މާލޭގައި ކުރިއަށް ގެންދިޔަ މުޒާހަރާގެ ތެރެއިން ހައްޔަރުކުރި މީހުންގެ ބަންދަށް 15 ދުވަސް ޖެހީ މުޒާހަރާތަކުގައި ބައިވެރިވާ މީހުންނަށް ބިރުދެއްކުމުގެ ގޮތުން ކަމަށް އިދިކޮޅު އެމްޑީޕީގެ ޕާލަމެންޓްރީ ގްރޫޕުން ބުނެފި އެވެ.
އެމްޑީޕީގެ ޕީޖީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގެއްގައި ވާހަކަ ދައްކަވަމުން ގަލޮޅު ދެކުނު ދާއިރާގެ މެންބަރު، މީކާއިލް އަހުމަދު ނަސީމް ވިދާޅުވީ މުޒާހަރާތަކުން ހައްޔަރު ކުރާ މީހުންގެ ބަންދުގެ މުއްދަތު އިތުރުކޮށް ހެދުމަކީ ކުރީގެ ރައީސް އަބްދުﷲ ޔާމީން އާއި ރައީސް މުހައްމަދު ވަހީދުގެ ވެރިކަމުގެ ފެނުނު ކަންކަން ކަމަށެވެ.
"މުޒާހަރާއަކުން ގެންދާ މީހުންނަކީ އެއީ ކުށެއް ސާބިތުވެފައިވާ ބައެއް ނޫން، އެއީ ކުށެއްގެ ތުހުމަތުގައި ގެންދާ ބައެއް، ދެން އެންމެ ހައިރާން ކުރަނިވި ކަމަކީ މި ސަރުކާރުގެ އެންމެ ބޮޑު އެއް ވައުދު އެއީ ޝަރީއަތް ނިމެންދެން ބަންދުގައި ބެހެއްޓުން ހުއްޓުމަކަށް ގެނައުން، އެއީ މި ސަރުކާރުގެ ރިޔާސީ ވައުދެއް،" މީކާއިލް ވިދާޅުވި އެވެ.
"އެހެންނަމަވެސް އެ ވައުދާ ހިލާފަށް ޖުޑީޝަލް ސާވިސް ކޮމިޝަނާއި އަދި ފަނޑިޔާރުގެ ބޭނުން ކުރައްވައިގެން ރައްޔިތުންނަށް ބިރު ދެއްކުމުގެ ބޭނުމުގައި މީހުންގެ ބަންދުގެ މުއްދަތު އިތުރު ކުރަމުންދާކަމީ އަޅުގަނޑުމެން ވަރަށް ކަންބޮޑުވާ ކަމެއް."
މުޒާހަރާގެ ތެރެއިން ހައްޔަރުކުރި މީހުން ފުލުހުން ހައްޔަރު ކޮށްފައި ވަނީ ގާނޫނާ ހިލާފަށް ކަމަށާއި އެމީހުން ހައްޔަރު ކުރުމަށްފަހު ވެސް ފޯރުކޮށްދޭން ޖެހޭ ގާނޫނީ ވަކީލެއްގެ ފުރުސަތާއި ބޭސްފަރުވާގެ އިންތިޒާމު އެކަށީގެންވާ ގޮތެއްގައި ހަމަޖައްސައިދީފައި ނުވާ ކަމަށް ކެންދޫ ދާއިރާގެ މެންބަރު، މައުރޫފް ޒާކިރު ވިދާޅުވި އެވެ.
"އަޅުގަނޑުމެން، ޕާލިމެންޓްރީ ގްރޫޕުން މި ފުރުސަތުގައި ވެސް ގޮވައިލަން އަޅުގަނޑުމެންގެ ތެރެއިން ހައްޔަރު ކޮށްފައިވާ ހަ ފަރާތް ވަގުތުން ވަގުތަށް ދޫކޮށްލުމަށް އަދި އެ ފަރާތްތަކަކީ ސުލްހަވެރި މުޒާހަރާއެއްގައި ބައިވެރިވި ފަރާތްތައް، އަދި އެ ފަރާތްތަކަކީ ހައްޔަރު ކުރަންޖެހޭ ފަދަ އެއްވެސް ކަމެއް ނެތި، [ހައްޔަރު ކުރި ބައެއް]،" މައުރޫފް ވިދާޅުވި އެވެ.
މައުރޫފް ވިދާޅުވީ އެ މީހުން ހައްޔަރު ކުރުމަށްފަހު އެ ރޭ ދޫކޮށްލާނެ ކަމަށް ފުލުހުން އެ ވަގުތު ބުނި ކަމަށެވެ. ނަމަވެސް ބުނި ގޮތާއި ހިލާފަށް އެ މީހުން ހައްޔަރު ކޮށްގެން ގެންގޮސް ބަންދުގެ މުއްދަތު ޖެހީ ކުރިއަށް އޮތް ތަނުގައި އެމްޑީޕީން އިންތިޒާމު ކުރާ އެއްވުންތަކުގައި މީހުން ބައިވެރިވުމަށް ހުރަސް އަޅަން ކަމަށް އޭނާ ވިދާޅުވި އެވެ.
އެމްޑީޕީން ކުރިއަށް ގެންދިޔަ މުޒާހަރާއިން އަށް މީހަކު ފުލުުހުން ހައްޔަރުކުރި އެވެ. އޭގެތެރެއިން ހަތް މީހަކު ބަންދުގެ މުއްދަތު ޖެހުމަށް ކޯޓަށް ހާޒިރުކުރި އެވެ. ނަމަވެސް ކޯޓުން ބަންދުގެ މުއްދަތު ޖަހައިދިނީ އޭގެތެރެއިން ހަ މީހަކަށެވެ.
ހައްޔަރުކުރި މީހުންގެ ތެރެއިން ބަންދަށް 15 ދުވަސް ޖެހި މީހުން
- މަޖިލީހުގެ ކުރީގެ މެންބަރު ޔާސިރު އަބްދުއްލަތީފު
- ރައްޔިތުންގެ މަޖިލީހުގެ ކުރީގެ މެންބަރު ޔައުގޫބު އަބްދުﷲ
- މާފުށީ ކައުންސިލްގެ ރައީސް ހަސަން ސޮލާހު
- އަލީ ޖުމާން
- އަޒްމީ އަލީ
- ހަސަން ޝާކިރު
މުޒާހަރާގެ ތެރެއިން ބަންދުގެ މުއްދަތު އިތުރުނުކޮށް ދޫކޮށްލީ އައްޑޫ ސިޓީ ކައުންސިލްގެ މެންބަރު ހަސަން ޒަރީރު އާއި މުހައްމަދު ޚަލަފު އިބްރާހިމް އެވެ. ޚަލަފު ދޫކޮށްލީ ތަހުގީގަށް އެއްބާރުލުން ދޭން ޝަރުތުކޮށް، އަދި ހުއްދަ ހޯދައިގެން ނޫން ގޮތަކަށް މާލޭން ބޭރަށް ނުދެވޭ ގޮތަށެވެ.
މުޒާހަރާގައި އެތައް ހާސް ބަޔަކު ޖަމާވެ، މަޖީދީ މަގުން ހިނގާފައި ދާން ދިމާކުރުމުން، ރަޔަޓު ގިޔަރުގައި ފުލުހުން ނުކުމެ ބާރުގެ ބޭނުންކޮށް، ޕެޕަ ސްޕްރޭ ޖެހި އެވެ. އަދި ފުރަތަމަ ފަހަރަށް ސޮނިކް ވެޕަން ބޭނުންކުރި އެވެ.
އާޓިފިޝަލް ބީޗުގައި ތިބުމަށް ފަހު އެއްވުމުގެ ބައިވެރިން ހިނގަން ރާވާފައި އޮތީ މަޖީދީ މަގުން އިރަށެވެ. އެކަން އެގޮތަށް ކުރާކަން އަންގާފައި ވާނެ ކަމަށް އެމްޑީޕީން ބުނެފައިވެ އެވެ.
