ރާއްޖޭގެ ކެޕިޓަލް މާކެޓްގައި ފާހަގަކޮށްލެވޭ އިންވެސްޓްމަންޓް އެޑްވައިޒަރީ ކުންފުނި، ދިވެހި އިންވެސްޓްމަންޓް ޕާޓްނާސް (ޑީއައިޕީ) އިން ދިވެހި އިންވެސްޓްމަންޓް ނަފާ ފަންޑް (ދިނާފް) މިއަދު އިފްތިތާހުކޮށްފި އެވެ.
ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގެ އިންވެސްޓްމަންޓް އެޑްވައިޒާ ލައިސެންސް ލިބިފައިވާ ޑީއައިޕީ އިން ހިންގައި މެނޭޖްކުރާ، އެ ފަންޑަކީ ސީއެމްޑީއޭއިން ރެގިއުލޭޓްކޮށް ލައިސަންސް ދީފައިވާ ޕްރައިވެޓް އިންވެސްޓްމަންޓް ފަންޑެކެވެ.
ބާސެލޯ ނަސަންދުރާގައި ބޭއްވި އެ ފަންޑު އިފްތިތާހުކުރުމުގެ ރަސްމިއްޔާތުގައި ރާއްޖޭގެ ކެޕިޓަލް މާކެޓާއި ވިޔަފާރީގެ ދާއިރާގައި ފާހަގަކޮށްލެވޭ ގިނަ ފަރާތްތަކުން ބައިވެރިވި އެވެ.
ކޮލިފައިޑް އިންވެސްޓާގެ ގޮތުގައި ޝަރުތުހަމަވާ އާންމު ފަރާތްތަކާއި އިންސްޓިޓިއުޝަންތަކަށް މި ފަންޑުގައި އިންވެސްޓް ކުރުމުގެ ފުރުސަތު ހުޅުވާލީ އެއް އަހަރާއި ތިން އަހަރާއި ދެމެދުގެ ޝޯޓް ޑިއުރޭޝަން އިންވެސްޓްމަންޓަކަށެވެ.
ޑީއައިޕީގެ ޗެއާމަން، އަބްދުއް ވާހިދު ތައުފީގު ރަސްމިއްޔާތުގައި ވާހަކަ ދައްކަވަނީ -- ފޮޓޯ: މިރާޝް ނާޝިމް / އަދަދު
ޑީއައިޕީގެ ޗެއާމަން، އަބްދުއް ވާހިދު ތައުފީގު ވިދާޅުވީ ދިނާފް ފަންޑުން ކުރު މުއްދަތަށް މިވަގުތު އިންވެސްޓު ކުރުމުގެ ފުރުސަތު މިވަގުތު ހުޅުވާލި ނަމަވެސް، މުސްތަގުބަލުގައި ދިގު މުއްދަތަށް އަދި ވަކިވަކި ޕްރޮޖެކްޓްތަކަށް އިންވެސްޓްކުރަން ހުޅުވާލާނެ ކަމަށެވެ.
އޭގެއިތުރުން މިވަގުތު ޕްރައިވެޓް ފަންޑެއް ގޮތަށް އިވެސްޓް ކުރަން ހުޅުވާލާފައިވާއިރު، މުސްތަގުބަލުގައި އާންމުންނަށް ދިނާފް ފަންޑު ހުޅުވާލުމަކީ އަމާޒެއް ކަމަށް އޭނާ ވިދާޅުވި އެވެ.
ޑީއައިޕީން ބުނީ އެ ފުރުސަތުތަކުގެ ސަބަބުން އިންވެސްޓަރުންނަށް ރާއްޖޭގެ މާލީ ބާޒާރުން އާންމުކޮށް ލިބޭ ރޭޓްތަކާ އަޅާބަލާއިރު ރަނގަޅު ރިޓާނެއެއް ލިބި، އިންވެސްޓްކުރާ ފަރާތްތަކުގެ އިތުރަށް ފަންޑުން ކުރާ އިންވެސްޓްމަންޓްތަކާއެކު އިގްތިސާދު ދެމެހެއްޓެނިވި ގޮތެއްގައި ކުރިއެރުވުމަށް މަގުފަހިވެގެންދާނެ ކަމަށެވެ.
ދިވެހިރާއްޖޭގެ ފުރަތަމަ ޝޯޓް-ޑިއުރޭޝަން، އިންވެސްޓްމަންޓް ޕްލެޓްފޯމްގެ ގޮތުގައި، ދިނާފް ތައާރަފުކުރުމާއެކު ފުޅާވަމުންދާ ޕުރައިވެޓް ކެޕިޓަލް މާކެޓަށް އިތުރު ކުރިއެރުންތަކެއް ލިބިގެންދާނެ ކަމަށް ޑީއައިޕީން ބުންޏެވެ.
