ކްރޮސް ސަބްސިޑީގެ ގޮތުގައި ރިސޯޓުތައް ތަރައްގީކުރުމަށް ދޫކުރާ ރަށްރަށާއި ފަޅުތަކުގެ ތެރެއިން ދެ އަހަރު ވަންދެން ސޭލް އަގުގައި ދޫކުރާ ފަސް އަތޮޅުގެ ރަށްތަކުގެ އަގު މިހާރު ހުރި އަގަށް ވުރެ ކުޑަކޮށްފި އެވެ.
ޓޫރިޒަމް މިނިސްޓްރީން މިދިޔަ އަހަރުގެ ޖޫންގައި ނެރުނު އިއުލާނެއްގައި ވަނީ ހއ، ހދ، ށ، ތ، ލ، އަދި އައްޑޫ ސިޓީން ރިސޯޓު ހަދަން ދޫކުރާ ރަށްތަކާއި ފަޅުތަކާއި ބިންތަކުގެ އަގު ހެޔޮކޮށްފަ އެވެ.
މި އިއުލާނަށް އަހަރަކަށް ވުރެ ގިނަ ދުވަސް ފަހުން އެ މިނިސްޓްރީން ވަނީ މި އަތޮޅުތަކުން ދޫކުރާ ރަށްތަކުގެ އަގުން 25 ޕަސެންޓު ކަނޑާލާފަ އެވެ. ނަމަވެސް ފަޅުތައް ކުއްޔަށް ދޫކުރާ އަގަކަށް އެއްވެސް ބަދަލެއް ނުގެނެ އެވެ.
ޓޫރިޒަމުން ގެނައި ބަދަލުތަކާ އެކީ ބޭސް ރޭޓާއި ރަށުގެ ބޮޑުމިނަށް ބަލައި ހެކްޓަރަކަށް ޖެހޭ ރޭޓު ވެސް ވަނީ ކުޑަކޮށްފަ އެވެ. އެ ގޮތުން ލ. އަތޮޅު ނޫން އެހެން ހުރިހާ އަތޮޅަކުން ރަށްތައް ދޫކުރާ ބޭސް ރޭޓު ނުވަތަ ފަށާ އަގު ވަނީ ފަސް ލައްކަ ޑޮލަރުން ހަތަރު ލައްކަ ޑޮލަރަށް ކުޑަކޮށްފަ އެވެ. އަދި ހެކްޓަރަކަށް ޖެހޭ ރޭޓު ވަނީ 35،000 ޑޮލަރުން 25،000 ޑޮލަރަށް ކުޑަކޮށްފަ އެވެ.
ލ. އަތޮޅުގެ ރަށްތަކުގެ ބޭސް ރޭޓު ވަނީ އަށް ލައްކަ ޑޮލަރުން ހަތް ލައްކަ ޑޮލަރަށް ކުޑަކޮށްފަ އެވެ. އަދި ހެކްޓަރަކަށް ޖެހޭ ރޭޓު ވަނީ 75،000 ޑޮލަރުން 60،000 ޑޮލަރަށް ކުޑަކޮށްފަ އެވެ.
މީގެ އިތުރުން، ބޮޑެތި ރަށްތަކުން ނަގާ ލޮކޭޝަން ޕްރީމިއަމް ސައިޒް ޕްރީމިއަމްއަށް ބަދަލުކޮށް، އެ އަގުތައް ވެސް ވަނީ ހެޔޮކޮށްފަ އެވެ. މިހާރު 41 ހެކްޓަރަށް ވުރެ ބޮޑު ރަށަކުން ޕްރީއަމްގެ ގޮތުގައި ނަގާނީ ފަސް ލައްކަ ޑޮލަރެވެ. ކުރިން އޮންނަނީ މިލިއަން ޑޮލަރު ނަގާ ގޮތަށެވެ.
ސަރުކާރުން މި ހުރިހާ ލުއިތަކެއް ދެމުން އަޔަސް، ފާހަގަކޮށްލެވޭ ކަމަކީ ގިނަ ތަންތަން ދޫކުރަން އިއުލާންކޮށްފައި ހުއްޓަސް، އެކަށީގެންވާ ވަރަށް އިންވެސްޓަރުން ނުވާ ކަމެވެ.
މިހާރު ވެސް ރާއްޖޭގެ އެކި ސަރަހައްދުތަކުގައި އެތައް ރިސޯޓެއް ތަރައްގީކުރުމުގެ މަސައްކަތް ކުރިއަށްދާއިރު، އޭގެ ތެރެއިން ވަރަށް ގިނަ ތަންތަނަކީ މަސައްކަތް ނިންމަން ދިން މުއްދަތު ހަމަވެފައިވާ ތަންތަނެވެ. އަދި، އެއްވެސް ވަރަކަށް މަސައްކަތެއް ނުހިނގާ ތަންތަނާއި، އަމަލީ މަސައްކަތް އެއްގޮތަކަށް ވެސް ނުފަށާ ހުރި ރަށްތައް ވެސް މަދެއް ނޫނެވެ.
