އިދިކޮޅު އެމްޑީޕީން އޮކްޓޯބަރު 3، ގައި ބޭއްވި ބޮޑު މުޒާހަރާގައި ބައިވެރިވި މީހުންގެ ގައިގައި ތަޅައި އަނިޔާ ކުރުމަށާއި އެމީހުންގެ ގަޔަށް ބަޑި ޖަހަން ގޮވައިލި ޝުއައިބު އަލީގެ މައްސަލައިގައި އެއްޗެއް ބުނަން ފުލުހުން ދެކޮޅު ހަދައިފި އެވެ.
މުޒާހަރާ ކުރި މީހުންގެ އިތުރުން ވިސްލްބްލޯވަރު ހަސަން ކުރުސީގެ "ބޯކަނޑާލާނަން" ކަމަށް ވެސް ބުނެފައިވާ ޝުއައިބުގެ މައްސަލަ ބަލަމުންދާކަން ނުވަތަ ނޫންކަން ކަށަވަރުކޮށްދިނުމަށް ވެސް ފުލުހުން ވަނީ ދެކޮޅު ހަދައިފަ އެވެ.
"މުޒާހަރާގެ ބައިވެރިން، ހުއްދަ ދިން ގޮތާ ހިލާފު ވާނަމަ، ތަޅައި ތިރިކޮށްލަންވީ. ބަޑިވެސް ޖަހަންވީ،" ޝުއައިބު ބުނެފައިވެ އެވެ.
އެމްޑީޕީގެ މެންބަރުން މެރުމަށާއި އެމީހުން އެކި ގޮތްގޮތަށް އަނިޔާ ކުރުމަށް ގޮވާލާފައި ހުރި ބައެއް މެސެޖުތައް ސޯޝަލް މީޑިއާ ޕްލެޓްފޯމް އެކްސްގައި ވެސް ވަނީ ލީކުކޮށްލައިފަ އެވެ. އެ މެސެޖުތައް ލީކުވީ މުޒާހަރާ ފެށުމުގެ ކުރިންނެވެ. އެ މެސެޖުތަކުގެ މައްސަލަ ފުލުހުން ތަހުގީގު ކުރަމުންދާ ވާހަކަ ވެސް ބުނެފައެއް ނުވެ އެވެ.
ނަމަވެސް ސޯޝަލް މީޑިއާ ޕްލެޓްފޯމް ފޭސްބުކް ގައި ލިޔުނު ޕޯސްޓަކާ ގުޅިގެން އިދިކޮޅު އެމްޑީޕީގެ ގައުމީ މަޖިލީހުގެ މެންބަރުން އަދި އެ ޕާޓީގެ ހުޅުމާލެ އުތުރު ދާއިރާ ރައީސް ފާތިމަތު ޒަހިއްޔާ (ޒާޔާ) ގެ ފޯނު ފުލުހުން އިއްޔެ ހިފެހެއްޓި އެވެ.
އިދިކޮޅު ސިޔާސީ ފަރާތްތަކަށް ލާއިންސާނީ އަދަބު ދިނުމަށް ގޮވައިލާ މިންވަރު މިފަހަކަށް އައިސް ވަނީ އިތުރުވެފަ އެވެ. ނަމަވެސް އެފަދަ އެއްވެސް މައްސަލައެއް ސީރިއަސްކޮށް ތަހުގީގު ކޮށްފައެއް ނުވެ އެވެ.
