ސޯޝަލް މީޑިއާ ޕްލެޓްފޯމް، އެކްސްގައި ކާކުކަން ނޭނގޭހެން 'ހަސަން ކުރުސީ' ގެ ނަމުގައި ހިންގާ އެކައުންޓުގެ ވެރިފަރާތް އެނގޭ ދުވަހަކުން އެ މީހެއްގެ ކަރު ބުރިކޮށްލާނެ ކަމަށް ބުނެ މީހަކު އިންޒާރު ދީފި އެވެ.
މިފަދައިން އިންޒާރުދީ ފޭސްބުކުގައި ލިޔުނީ ޝުއައިބު އަލީ ނަމަކަށް ކިޔާ އެކައުންޓެއް ހިންގާ މީހެކެވެ. އެ އެކައުންޓުން ވަނީ މިއީ މަރުގެ އިންޒާރެއްކަން ސާފުކޮށް ބުނެ، އެކަން ކުރުމުން ފިޔަވަޅެއް ނޭޅޭނޭ ބުނާ ބީދައިން ލިޔެފަ އެވެ.
"ކުރުސީއަކީ ކާކުކަން އެނގި ކަށަވަރުވާ ދުވަހަކުން، ކުރުސީގެ ބޯ، ކަނދުރާއިން ވަކި ކުރާނަން. ފޭކު އައިޑީ ހިންގާ މީހަކަށް، މަރުގެ އިންޒާރު ދިނީމަ، އަޅާ ފިޔަވަޅެއް އެނގިދާނެތާއެވެ. ނިކަން މަށަށް ފިޔަވަޅެއް އަޅާބަލަ،" ޝުއައިބު ލިޔެފައިވެ އެވެ.
މަރުގެ އިންޒާރު ދިނުމަށްފަހު ޝުއައިބު ވަނީ އޭނާއަށް ގާނޫނީ ފިޔަވަޅު ނޭޅޭނެކަމަށް ބުނެ ގޮން ޖަހާފަ އެވެ. އެގޮތުން ފޭކު އެކައުންޓު ހިންގަނީ ކާކުކަން ނޭނގޭ ހިނދަކު، އެ އެކައުންޓަކަށް މަރުގެ އިންޒާރު ދިނަސް ފިޔަވަޅު ނޭޅޭނެ ކަމަށް ޝުއައިބު ލިޔެފައިވެ އެވެ.
މި މައްސަލަ މިހާތަނަށް ފުލުހުން ބަލަމުންދާ ކަމަކަށް ނުވެ އެވެ. މީގެ އިތުރުން މިދިޔަ ހުކުރު ދުވަހު އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ފަރާތުން ބޭއްވި މުޒާހަރާގައި ބައިވެރިވި މީހުންގެ ގައިގައި ތަޅައި އަނިޔާ ކުރުމަށާއި އެމީހުންގެ ގަޔަށް ބަޑި ޖަހަން ގޮވާލާ ވެސް ޕޯސްޓެއް ކޮށްފަ އެވެ.
"މުޒާހަރާގެ ބައިވެރިން، ހުއްދަ ދިން ގޮތާ ހިލާފު ވާނަމަ، ތަޅައި ތިރިކޮށްލަންވީ. ބަޑިވެސް ޖަހަންވީ،" ޝުއައިބު ބުނެފައިވެ އެވެ.
އެމްޑީޕީ އިން ކުރި ބޮޑު މުޒާހަރާގެ ބައިވެރިން މަރަން ގޮވާލި މައްސަލަ ބަލަންތޯ ސުވާލު ކުރުމުން ފުލުހުން އެއްވެސް ޖަވާބެއް ދީފައެއް ނުވެ އެވެ. މި ނޫހަށް އެނގިފައިވާ ގޮތުގައި އޭނާ މިހާތަނަށް ހައްޔަރެއް ނުކުރެ އެވެ.
އެމްޑީޕީގެ މެންބަރުން މެރުމަށާއި އެމީހުން އެކި ގޮތްގޮތަށް އަނިޔާ ކުރުމަށް ގޮވާލާފައި ހުރި ބައެއް މެސެޖުތައް ސޯޝަލް މީޑިއާ ޕްލެޓްފޯމް އެކްސްގައި ވެސް ވަނީ ލީކުކޮށްލައިފަ އެވެ. އެ މެސެޖުތައް ލީކުވީ މުޒާހަރާ ފެށުމުގެ ކުރިންނެވެ. އެ މެސެޖުތަކުގެ މައްސަލަ ފުލުހުން ތަހުގީގު ކުރަމުންދާ ވާހަކަ ބުނެފައެއް ނުވެ އެވެ.
