އިދިކޮޅު އެމްޑީޕީން މިރޭ އާޓިފިޝަލް ބީޗުގައި ބާއްވާ ބޮޑު މުޒާހަރާ ފެށެން ކުޑަތަން ވެފައިވަނިކޮށް، މިއަދާއި މިރޭ މާލޭގެ އެކި ސަރަހައްދުތަށް ބަންދުކުރާނެ ކަމަށް ފުލުހުން ބުނެފި އެވެ.
ފުލުހުންގެ ރަސްމީ އެކްސް އެކައުންޓުން ދެންމެ ކުރި ޕޯސްޓެއްގައި ބުނީ އާންމުންނަށާއި ޓްރެފިކަށް އެކި ސަރަހައްދުތައް ބަންދުކުރަނީ ފުލުހުން ކުރިއަށް ގެންދާ އޮޕަރޭޝަނަކާއި ގުޅިގެން ކަމަށެވެ. އިތުރު އެއްވެސް ތަފުސީލެއް ނުދެ އެވެ.
ފުލުހުން މިހެން ބުނެ ޕޯސްޓެއް ކޮށްފައި ވާއިރު، އެ ހިދުމަތުން އިއްޔެ ނެރުނު ބަޔާނެއްގައި މިރޭގެ އެއްވުމުގައި, އަމާން މަސްލަހަތު ނަގާލައި، ކުށްކުރަން އުޅޭ ކަމަށް ތުހުމަތުކޮށް އެ މުޒާހަރާ ހުއްޓުވާނެކަމުގެ އިޝާރާތެއް ވަނީ ދީފަ އެވެ. އެ ބަޔާނުގައި ފުލުހުން ބުނީ ބޮޑު އެއްވުމުގައި ކުށްކުރާ ގުރޫޕުތައް ނެރެ މާލެ ހަލަބޮލިކުރަން އުޅޭކަމުގެ މައުލޫމާތުތަކެއް ފުލުހުންނަށް ލިބިފައިވާ ކަމަށެވެ.
"އެކި ބައިބަޔަށް ބެހި ކުށްކުރާ ގްރޫޕުތައް މަގުމައްޗަށް ނެރެ މާލެ ތެރެ ހަލަބޮލިކޮށް ތަންތަނަށް ގެއްލުން ދިނުމަށް ރާވާފައިވާކަމުގެ މައުލޫމާތު ފުލުހުންނަށް ވަނީ ލިބިފަ،" ފުލުހުން ބުނެފައިވެ އެވެ.
އެމްޑީޕީއަށް ބޮޑެތި ތުހުމަތުތަކެއް ކުރުމަށްފަހު ފުލުހުން ބުނީ ރައްޔިތުންގެ ސަލާމަތް ކަށަވަރު ކުރަން ކުރަންޖެހޭ ކަންކަން ފުލުހުން ކުރާނެ ކަމަށެވެ. ބޮޑު މުޒާހަރާގައި މާލެ ތެރެ ހަލަބޮލިކުރަން އުޅޭ ކަމަށް ފުލުހުން ތުހުމަތު ކުރި ނަމަވެސް އެ މައްސަލައިގައި މިހާތަނަށް މީހަކު ހައްޔަރެއް ނުކުރެ އެވެ. އަދި އެކަމުގެ ތަފުސީލެއް ވެސް ފުލުހުން ނުދެ އެވެ.
މިރޭގެ މުޒާހަރާގައި ބައިވެރިވުމަށް އެ ޕާޓީއަށް ތާއީދުކުރާ އަދި މި ސަރުކާރާއި އިދިކޮޅު ރައްޔިތުންގެ އެތައް ސަތޭކަ ބަޔަކު ވަނީ މާލޭ ދަތުރުކޮށްފަ އެވެ. ލޯންޗުތަކާއި ބޯޓުތައް އަދި ދުރު ސަރަހައްދުތަކުން ވައިގެ މަގުން މާލެއަށް މީހުން ދަތުރުކުރާ ފޮޓޯތަކާއި ވީޑިއޯތައް ސޯޝަލް މީޑިއާގައި ދަނީ ދައުރުވަމުންނެވެ. އޭގެތެރޭގައި ރާއްޖޭގެ ދެކުނާއި އުތުރު އަދި މެދު ރާއްޖެތެރޭގެ ސަރަހައްދުތަކުން ދަތުރުކުރާ މީހުން ހިމެނެ އެވެ.
މީގެ އިތުރުން، ރެޔާއި މިއަދު ހެދުނު އަތޮޅުތެރެއިން މާލެއަށް މީހުން އައިސްފައިވެ އެވެ. ލޯންޗުތަކުގައި އައި މީހުން މާލެ އެރީ އެމްޑީޕީގެ ދިދަތައް ވެސް ހިފައިގެންނެވެ. އެމްޑީޕީން އުއްމީދު ކުރަނީ މި ފަހުގެ ތާރީހެއްގައި އެއްވުމެއްގައި ބައިވެރިނުވާ ވަރަށް މިރޭގެ އެއްވުމުގައި ބައިވެރިވާނެ ކަމަށެވެ.
