ފަލަސްތީނުގެ ރައްޔިތުންނަށް، އެހީގެ ސާމާނު ހިފައިގެން ކަނޑުމަގުން ދަތުރުކުރާ ގްލޯބަލް ސުމޫދް ފްލޮޓީލާ އިޒްރޭލުގެ އަސްކަރިއްޔާއިން ހަމަލާދީ ބޯޓުތަކަށް އަރައިގަންނަން ފެށުމާއެކު ފްލަޓީލާގައި ހުރި ދިވެހި މީހާ ދަތުކުރަމުންދިޔަ ބޯޓު ސައިޕްރަސް އަށް ދަތުރުކުރަން ފަށައިފި އެވެ.
ފްލޮޓިލާގައި ހިމެނޭ ބޯޓެއްގައި ގާޒާއަށް ދަތުރުކުރަމުންދާ ދިވެއްސަކީ އިބްރާހިމް ޝާޒް އެވެ. އޭނާ ހުރީ ފްލޮޓީލާގެ ސްޓިއަރިން ކޮމިޓީގެ މެންބަރުން ވެސް ތިބި ބޯޓެއް ކަމަށްވާ "ސަމަޓައިމް ޖޮންގް" ގަ އެވެ.
ޝާޒް އާއެކު މިކަމުގައި މަސައްކަތްކުރާ އަޒްހާދު އަހުމަދު އަދަދު އަށް މައުލޫމާތު ދިން ގޮތުގައި ޝާޒް ހުރި ބޯޓަކީ ފްލޮޓީލާގެ ކަންކަން އޮބްޒާވް ކުރަމުންދިޔަ ބޯޓެއް ކަމަށެވެ. އެންމެ ފަހުން ލިބުނު މައުލޫމާތުން އެނގޭ ގޮތުގައި އެ ބޯޓު ދަތުރުކުރަމުންދަނީ ސައިޕްރަސް އަށެވެ.
ފަންސާހަށްވުރެ ގިނަ އުޅަނދާއެކު 46 ގައުމަކުން 497 މީހަކު މި ދަތުރުގައި ބައިވެރިވަމުން އަންނައިރު އޭގެ ތެރޭގައި އެކި ގައުމުތަކުގެ ގާނޫނު ހަދާ މަޖިލީހުގެ މެންބަރުންނާއި ގާނޫނީ ވަކީލުންނާއި ސިޔާސީ ބޭފުޅުންނާއި އެކި ދާއިރާތަކުގެ މަޝްހޫރު އެކްޓިވިސްޓުން ވެސް ހިމެނެ އެވެ.
މި ބޯޓުތަކަށް އިޒްރޭލުން ހަމަލާދޭން ފެށިތާ ދުވަސްކޮޅެއް ވީ ނަމަވެސް، އަސްކަރީ ބޯޓުތައް ކައިރިކޮށް ފްލޮޓީލާގެ ބޯޓުތައް ހިސޯރުކުރަން ފެށީ ރޭގަ އެވެ.
އަލް ޖަޒީރާއިން ރިޕޯޓުކޮށްފައިވާ ގޮތުގައި އިޒްރޭލު ސިފައިން ބޯޓުތަކަށް އަރައިގަތީ އަސްކަރީ އުޅަނދުތަކުން އެ ބޯޓުތައް ވަށާލުމަށްފަހު އެވެ. އެ ވަގުތު ބޯޓުތައް މަތިން އިޒްރޭލުގެ އަސްކަރީ ހެލިކޮޕްޓަރުތައް ވެސް ދިޔައީ ދުއްވަމުންނެވެ.
ބޯޓުތައް ހުއްޓުވައި 37 ގައުމަކަށް ނިސްބަތްވާ 201 މީހަކު އިޒްރޭލުން ވަނީ ހައްޔަރުކޮށްފަ އެވެ. މީގެ ތެރޭގައި އިންސާނީ ހައްގުތަކަށް ވަކާލާތުކުރާ ސްވިޑަންގެ އެކްޓިވިސްޓު ގްރެޓާ ތަންބާގް ހިމެނެ އެވެ. އަދި ސްޕެއިން ގެ 30 މީހަކާއި، އިޓަލީގެ 22 މީހަކާއި، ތުރުކީގެ 21، މީހަކު އަދި މެލޭޝިއާގެ 12 މީހަކު ހައްޔަރުކުރި މީހުންގެ ތެރޭގައި ހިމެނެ އެވެ.
ބައެއް ބޯޓުތައް ހުއްޓުވި ނަމަވެސް އަދިވެސް 30 އަށްވުރެ ގިނަ ބޯޓުން ގާޒާގެ އައްސޭރިއަށް ދެވޭތޯ ދަތުރުކުރަމުންދާ ކަމަށް ފްލޮޓީލާގެ ތަރުޖަމާނު ސައިފް އަބުކެޝެކް ވިދާޅުވެފައިވެ އެވެ. މި ބޯޓުތަކުގެ ލައިވް ޓްރެކިން ސައިޓުން ދައްކާ ގޮތުގައި އިޒްރޭލުން މިހާތަނަށް 11 ބޯޓަކަށް ވަނީ އަރައިގަނެފަ އެވެ. އިތުރު 15 ބޯޓަކުން ވަނީ ކުއްލި ހާލަތު އިއުލާނުކޮށްފަ އެވެ.
ފްލޮޓީލާ އަށް ހަމާލާދީ، ބޯޓުތަކަށް ސިފައިން އަރައިގަތުން ރައީސް މުހައްމަދު މުއިއްޒު ވެސް ވަނީ ކުށްވެރިކުރައްވާފަ އެވެ. މުއިއްޒު އެފަދައިން ޕޯސްޓެއް ކުރެއްވީ ހުރަސް އެޅުން ކުށްވެރި ކުރުމަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައަކަށް ބަހުސް ކުރަމުން ދަނިކޮށެވެ.
