ދިވެހި ޒުވާނުން އިގްތިސާދީ އެކިއެކި މައުލޫތަކަށް ހިޔާލުފާޅުކޮށް، އިލްމީ ނަޒަރަކުން މާލީ ކަންކަމަށް ދެނެގަތުމަށް ޒުވާނުން ބައިވެރިކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކޮށްގެން ބާއްވާ ތަމްވީލް އިކޮންކުއެސްޓް ބަހުސް މުބާރާތުގައި ބައިވެރިވުމުގެ ފުރުސަތު ހުޅުވާލައިފި އެވެ.
އެމްއެމްއޭއިން ބުނީ މުބާރާތުގައި ބައިވެރިވާން ބޭނުންވާ ޓީމުތަކުން، ތިން މެންބަރުންނާއި ފަސް މެންބަރުން ހިމެނޭ ގޮތަށް، އެ ޓީމުގެ ލީޑަރެއް ކަނޑައަޅައި ސެޕްޓެމްބަރު 30، (މާދަމާ) ރޭ 23:59 ގެ ކުރިން އެޕްލިކޭޝަން ހުށަހަޅަން ޖެހޭނެ ކަމަށެވެ.
ގްރޭޓާ މާލެ ސަރަޙައްދުގައި ހިމެނޭ ސްކޫލްތަކާއި، ކޮލެޖްތަކާއި، ޔުނިވާސިޓީތަކުގެ 16 އަހަރާއި 25 އަހަރާ ދެމެދުގެ ދަރިވަރުންނަށް ހުޅުވާލެވިފައިވާ އެ ބަހުސް ކުރިއަށްގެންދާނީ މާލީ ދާއިރާއާއި، މޫސުމަށް އަންނަ ބަދަލުތަކާއި، ޑިޖިޓަލް ފައިސާއާއި، އިސްލާމީ އިގްތިސަދު ފަދަ ތީމްތަކުގެ މައްޗަށެވެ.
އެ މުބާރާތުގެ މަގްސަދަކީ ކުރިމަގުގެ ލީޑަރުންގެ މެދުގައި މާލީ ހޭލުންތެރިކަމާއި، މަދަނީ ހޭލުންތެރިކަމާއި، މާލީ ކަންކަމަށް ވިސްނުން އިތުރުކުރުމެވެ.
ބަހުސް މުބާރާތުގައި ކޮންމެ ވާހަކަދައްކާ ފަރާތަކަށް ވެސް ފަސް މިނެޓުގެ ވަގުތު ދެވޭނެ އެވެ. އަދި ކޮންމެ ބަހުސަކުގެ ކުރިން 30 މިނެޓުގެ ތައްޔާރުވުމުގެ ވަގުތު ދެވޭނެ އެވެ.
މުބާރާތުގެ ޗެމްޕިއަން ޓީމަށް 8،000ރ. ތަށްޓަކާއި ސެޓްފިކެޓްތައް ލިބޭނެ އެވެ. ރަނަރަޕް ޓީމަށް 5،000ރ. އާއި ސެޓްފިކެޓްތައް ލިބޭނެ އެވެ. އަދި އެންމެ މޮޅު ވާހަކަދެއްކުންތެރިޔާއަށް 2،000ރ. ލިބޭނެ އެވެ. އޭގެ އިތުރުން، އުފެއްދުންތެރިކަމުގެ އިތުރުން ތަފާތު ނަޒަރިއްޔާތަކުގެ ހުށަހެޅުމަށް 1،000ރ. އިނާމެއް ދޭނެ އެވެ.
އެމްއެމްއޭއިން ބުނީ އެ މުބާރާތުން ދަރިވަރުންނަށް ދުނިޔޭގެ އިގްތިސާދީ ގޮންޖެހުންތައް ދިރާސާކުރުމަށާއި ދެމެހެއްޓެނިވި މާލީ މުސްތަގްބަލަކަށް އައު އުފެއްދުންތެރި ހައްލުތައް ހުށަހެޅުމަށް ބާރުވެރިކުރުވުމެވެ.
ޝައުޤުވެރިވާ ޓީމުތަކުން، 3 އާއި 5 އާ ދެމެދުގެ މެންބަރުން ހިމެނޭ ގޮތަށް، އެ ޓީމުގެ ލީޑަރެއް ކަނޑައަޅައި، 30 ސެޕްޓެމްބަރު 2025 ވާ ދުވަހުގެ ރޭ 11:59 ގެ ކުރިން އެޕްލިކޭޝަން ހުށަހަޅަންވާނެ އެވެ.
