ވީރަން އިން އިންތިޒާމުކޮށްގެން "ދަ ޝޯ ރަނިން ފެސްޓިވަލް" ގެ ނަމުގައި ދުވުމެއް ނޮވެމްބަރު 28، ގައި ހުޅުމާލޭ ބީޗުގައި ބޭއްވުމަށް ނިންމައިފި އެވެ.
ހުރިހާ އުމުރުފުރާތަކަށް ވެސް ބައިވެރިވެވޭ އެ ދުވުމުގައި ހިމެނެނީ 10 ކިލޯމީޓަރުގެ ސަންރައިޒް ރޭސް ކެޓަގަރީ އާއި ފަސް ކިލޯ މީޓަރުގެ ސަންސެޓް ރަން ކެޓަގަރީގެ އިތުރުން 2 ކިލޯ މީޓަރުގެ ކިޑްސް ޑޭޝް ކެޓަގަރީ އެވެ.
ކުޑަކުދިންގެ ކެޓަގަރީގައި ވާދަކުރެވޭނީ ހަތަރު އަހަރާއި 12 އަހަރާއި ދެމެދުގެ ކުދިންނަށް އެކަނި ކަމަށް ވީރަން އިން ބުންޏެވެ.
އެ ދުވުމުގައި ބައިވެރިވުމަށް ރަޖިސްޓްރޭޝަން ފީއެއްގެ ގޮތުގައި ނަގަނީ 250ރ. އެވެ.
ދުވުންތަައް ފަށާ ގަޑި:
- 10 ކިލޯ މީޓަރު ސަންރައިޒް ދުވުން - ހެނދުނު 6:00 ޖަހާއިރު (1 ގަޑިއިރާއި 45 މިނެޓު).
- ފަސް ކިލޯ މީޓަރު ސަންސެޓް ދުވުން - ހަވީރު 4:40 (55 މިނެޓު).
- ދެ ކިލޯ މީޓަރު ކިޑްސް ޑޭޝް - ހަވީރު 4:45
ވީރަންއިން ބުނީ ދަ ޝޯ ރަނިން ފެސްޓިވަލް ބާއްވަން ރާވަމުންދަނީ އާއިލާތަކަށް އައިސް ވަގުތު ހޭދަކޮށްލެވޭ ގޮތަށް އެކި ހަރަކާތްތަކާއެކު ކަމަށެވެ. އެގޮތުން އެކި ސްޓޯލްތައް ވެސް ހުންނާނެ ކަމަށް ވީރަންއިން ބުންޏެވެ.
ރާއްޖޭގައި ބީޗުގައި ބާއްވާ ފުރަތަމަ ފަހަރަށް ދުވުން ބާއްވާ ވީރަންގެ އަމާޒަކީ ރާއްޖޭގެ މޫދާއި ބީޗުގެ ރީތިކަން ދުވުމުން ދެއްކުމެވެ.
