ރާއްޖޭގައި ފުރަތަމަ ފަހަރަށް ޗައިނީސް ޔުއާން އެކައުންޓް ތައާރަފުކޮށް އެފަދަ އެކައުންޓު ހުޅުވުމުގެ ފުރުސަތު ބޭންކް އޮފް މޯލްޑިވްސްގެ ކަސްޓަމަރުންނަށް ހުޅުވާލައިފި އެވެ.
މިހާރު އިންޓަނެޓް އަދި މޮބައިލް ބޭންކިން އެޕް މެދުވެރިކޮށް ވިޔަފާރިތަކަށާއި ފަރުދުންނަށް ޗައިނީސް ޔުއާންއިން ކަރަންޓް އެކައުންޓް ހުޅުވޭ ގޮތް ވަނީ ހަމަޖައްސާފަ އެވެ. ހަމައެހެންމެ، ބީއެމްއެލްއިން ރުފިޔާ އެކައުންޓަށް ދޫކޮށްފައިވާ ވިސާ އަދި މާސްޓާ ކާޑު ޑެބިޓް ކާޑުތަކާއި ކްރެޑިޓް ކާޑުތައް ވީޗެޓް ޕޭއަށް އެޑްކޮށް ޗައިނާގެ މާޗަންޓުންނަށް ފައިސާ ދެއްކޭނެ ގޮތް ވެސް ވަނީ ހަދާފަ އެވެ.
އޭގެ އިތުރުން ޗައިނީސް ޔުއާން އިން އިންޓަނޭޝަނަލް ޓްރާންސްފާ (ޓީޓީ) ހިދުމަތް ވެސް ލިބޭ ގޮތަށް ބީއެމްއެލްއިން ވަނީ ހަމަޖައްސާފަ އެވެ. އިމްޕޯޓް ކުރާ ފަރާތްތަކާއި އެކްސްޕޯޓް ކުރާ ފަރާތްތަކަށް ޗައިނީސް ޔުއާން އިން އެލްސީ ހެދޭ ގޮތް ވެސް ހަމަޖައްސާފައިވާ ކަމަށް ބީއެމްއެލްއިން ބުނެ އެވެ.
"މިއަދަކީ ރާއްޖޭގެ މާލީ ދާއިރާ ޒަމާނީކުރުމުގައި ކުރިއަށް އެޅުނު މުހިންމު ފިޔަވަޅެއް. ދުނިޔޭގެ އެންމެ ބޮޑު އެއް އިޤްތިޞާދާއި އެންމެ ގިނައިން ބޭނުންކުރާ އެއް ޕްލެޓްފޯމާ ގުޅުވާލުމުން އަޅުގަނޑުމެންގެ ކަސްޓަމަރުންނަށް އިތުރު ލުއި ފަސޭހަތަކެއް ލިބިގެންދާނެ،" ބީއެމްއެލްގެ ސީއީއޯ ވިދާޅުވި އެވެ.
ފުރަތަމަ ފަހަރަށް، ކަސްޓަމަރުންނަށް ވީޗެޓް ވޮލެޓަށް ޗައިނީސް ޔުއާން އިން ފައިސާ ލިބޭ ގޮތް ހަމަޖައްސައި، ވޮލެޓްގައި ހުންނަ ޗައިނީސް ޔުއާން ބޭނުންކޮށްގެން ޗައިނާގައި ފައިސާ ދެއްކޭނެ ގޮތް ހަދާފައިވާ ކަމަށް ބީއެމްއެލްއިން ބުނެ އެވެ.
އަންނަ އަހަރުގެ ޖެނުއަރީން ފެށިގެން ޔޫނިއަންޕޭގެ ކާޑުތައް ވެސް ބީއެމްއެލްއިން ދޫކުރަން ފަށާނެ އެވެ. އެއީ، ދުނިޔޭގެ 180 އަށްވުރެ ގިނަ ގައުމުގައި ބަލައިގަންނަ، ގްލޯބަލް ޕޭމަންޓް ނެޓްވޯކްގައި ބޭނުންކުރެވޭނެ ކާޑެކެވެ.
