ދުބާއީ، ޔުނައިޓެޑް އަރަބް އެމިރޭޓްސް (ސެޕްޓެމްބަރު 22) - މިހާރު ކުރިއަށްދާ އޭޝިއާ ކަޕް ކްރިކެޓް މުބާރާތުގެ ސުޕަ 4 ގައި، އެންމެ ފަހުގެ ޗެމްޕިއަން، އިންޑިއާ އިން ކުޅުނު ފުރަތަމަ މެޗުގައި ވާދަވެރި ޕާކިސްތާން އަތުން މޮޅުވެއްޖެ އެވެ.
އޭޝިއާ ކަޕްގެ އެންމެ ކާމިޔާބު ޓީމު އިންޑިއާ އިން ވަނީ، މި ފަހަރުގެ މުބާރާތުގެ ގްރޫޕް ސްޓޭޖު ބުރުގައި ވެސް ޕާކިސްތާން ބަލިކޮށްފަ އެވެ. އެ ގޮތުން، އޭޝިއާ ކަޕްގެ ޗެމްޕިއަންކަން، އަށް ފަހަރު ހޯދާފައިވާ އިންޑިއާ އިން ގްރޫޕް މެޗުގައި ޕާކިސްތާން ބަލިކުރީ، ހަތް ވިކެޓުންނެވެ. އަދި، ރޭ، ސުޕަ 4 ގައި ކުޅުނު މެޗުން އިންޑިއާ މޮޅުވީ، ހަ ވިކެޓުންނެވެ.
ދުބާއީ އިންޓަނޭޝަނަލް ސްޓޭޑިއަމްގައި ކުޅުނު މެޗުގައި، ޓޮސް ދިމާވުމުން އިންޑިއާ އިން ނިންމީ ފީލްޑް ކުރުމަށެވެ. އެ ގޮތުން، އިންޑިއާ އިން ހޮވަން އެރިއިރު، ޕާކިސްތާނުން ކުޅެން އަރައި، 20 އޯވަރުގެ ތެރޭގައި، ފަސް ކުޅުންތެރިން ނުބައިވެގެން، ހެދުނީ 171 ލަނޑެވެ. އެ ޓީމުން އެންމެ ރަނގަޅަށް ކުޅުނީ، 45 ބޯޅައިން 58 ލަނޑު ހެދި، ޝަހީބްޒާދާ ފަރްހާން އެވެ. މި އިނިންސްގައި، އިންޑިއާގެ ޝިވަމް ދޫބޭ ވަނީ ހަތަރު އޯވަރަށް ދެ ވިކެޓް ނަަގައިފަ އެވެ.
ޖަވާބުގައި ކުޅެން އަރައި، އިންޑިއާ އިން ވަނީ، 18.5 އޯވަރުގެ ތެރޭގައި، ހަތަރު ކުޅުންތެރިން ނުބައިވިއިރު، 174 ލަނޑު ހަދައި، މެޗުން މޮޅުވެފަ އެވެ. އިންޑިއާ އަށް އެންމެ ރަނގަޅު ކުުޅުމެއް ދައްކައިދިނީ، އޯޕަނިން ބެޓްސްމަނުންގެ ގޮތުގައި އަރައި، ރަނގަޅު ޕާޓްނާޝިޕެއް ހެދި، އަބިޝޭކް ޝަރުމާ އާއި ޝުބްމަން ގިލް އެވެ. އަބިޝޭކް ވަނީ 39 ބޯޅައިން 74 ލަނޑު ހަދައިފަ އެވެ. އަދި، ޝުބްމަން ވަނީ 28 ބޯޅައިން 47 ލަނޑު ހަދައިފަ އެވެ.
ސުޕަ 4 ގައި، ދެން އެންމެ އަވަހަށް ކުޅޭ މެޗުގައި، މާދަމާ، ޕާކިސްތާނުން ސްރީ ލަންކާއާ ކުޅޭނެ އެވެ. ލަންކާ އިން ސުޕަ 4 ފެށި މެޗުން ވަނީ ހަތަރު ވިކެޓުން ބަންގްލަދޭޝް އަތުން ބަލިވެފަ އެވެ.
