އަހުމަދުއާބާދު، އިންޑިއާ (މާޗް 8) - ޓީ20 ކްރިކެޓް ވޯލްޑް ކަޕް ފައިނަލުގައި އިންޑިއާ އާއި ނިއު ޒީލެންޑުން ކުރިމަތިލާއިރު، މި މެޗު އެތައް ގޮތަކުން ކްރިކެޓްގެ ތާރީހާ ވަނީ ގުޅިފަ އެވެ. އިންޑިއާ އިން ތަށި ދިފާއުކުރަން ނުކުންނައިރު، ނިއު ޒީލެންޑުން ނުކުންނާނީ ފައިނަލުން ބަލިވުމުގެ ހިތި ހަނދާންތަކުން އަރައިގަތުމަށެވެ.
މެޗަކުން ބަލިނުވެ ސެމީ ފައިނަލާ ހަމައަށް ދަތުރުކުރި ދެކުނު އެފްރިކާ ނުވަ ވިކެޓުން ބަލިކޮށް، ނިއު ޒީލެންޑުން ފައިނަލަށް ދަތުރުކުރިއިރު، އިންޑިއާ އިން ޖެހިޖެހިގެން ދެ ވަނަ ފައިނަލުން ފުރުސަތު ހޯދީ ސެމީ ފައިނަލުގައި ވާދަވެރި ކުޅުމަކަށް ފަހު ހަތް ލަނޑުން އިންގްލެންޑް ބަލިކޮށްފަ އެވެ.
ފައިނަލަށް ނުކުންނައިރު، އިންޑިއާ އިން ވިސްނަން ޖެހޭ ތިން ކަމެއް އެބައޮތެވެ. ޓީ20 ވޯލްޑް ކަޕެއްގައި އިންޑިއާ އަށް އަދި ނިއު ޒީލެންޑް ބަލިކުރެވިފައިނުވެ އެވެ. އަމިއްލަ ގައުމުގައި ކުޅުނު ޓީމަކުން، ޓީ20 ވޯލްޑް ކަޕް ކާމިޔާބުކޮށްފައިނުވާއިރު، މިހާތަނަށް ނުވަ ފަހަރު ޓީ20 ވޯލްޑް ކަޕް ބޭއްވިއިރު، އެއްވެސް ޓީމަކަށް ތަށި ދިފާއުކުރެވިފައިނުވެ އެވެ.
އިންޑިއާ އަތުން މިދިޔަ އަހަރުގެ ޗެމްޕިއަންސް ޓްރޮފީ މުބާރާތުގައި ނިއު ޒީލެންޑް ވަނީ ތިން ފަހަރު ބަލިވެފަ އެވެ. ޓީ20 ވޯލްޑް ކަޕެއްގެ ފައިނަލުގައި މިހާތަނަށް ނިއު ޒީލެންޑުން ކުޅުނީ 2021 ވަނަ އަހަރު އެވެ. އެ ފަހަރު ފައިނަލުގައި އޮސްޓްރޭލިއާ އަތުން ވަނީ އަށް ވިކެޓުން ބަލިވެފަ އެވެ.
އެންމެ ފަހުން، 2024 ވަނަ އަހަރު ކެރީބިއަންގައި ކުރިއަށްދިޔަ، ޓީ20 ވޯލްޑް ކަޕް ފައިނަލުގައި އިންޑިއާ އިން ދެކުނު އެފްރިކާ ބަލިކުރިއިރު، މި ފަހަރުގެ މުބާރާތުގައި އިންޑިއާ އިން ވަނީ ސުޕަ 8 ބުރުގައި، 76 ލަނޑުން ދެކުނު އެފްރިކާ އަތުން ބަލިވެފަ އެވެ. އެއީ، މި ފަހަރުގެ މުބާރާތުގައި އިންޑިއާ ބަލިވި ހަމައެކަނި މެެޗެވެ.
ނަރެންދުރަ މޯޑީ ސްޓޭޑިއަމްގައި މިރޭ ކުޅޭ ފައިނަލަށް ނުކުތުމުގެ ކުރިން، އިންޑިއާގެ ކެޕްޓަން، ސޫރްޔަކުމާރު ޔާދަވް (ސްކައި) ބުނެފައިވަނީ، އެ ޓީމުގައި 2024 ވަނަ އަހަރުގެ ޓީ20 ވޯލްޑް ކަޕްގެ ކާމިޔާބީގައި ވެސް މުހިންމު ރޯލެއް އަދާކުރި ކުޅުންތެރިން އެބަތިބި ކަމަށެވެ. އަދި، ޕްރެޝަރު ވަގުތުތަކުގައި އެ ކުޅުންތެރިންނަށް ބަރޯސާވެވޭނެކަން ސާބިތުކޮށްދީފައިވާ ކަމަށް ސްކައި ވަނީ ބުނެފަ އެވެ.
