މެޑްރިޑް (ސެޕްޓެމްބަރު 21) - ބްރެޒިލްގެ ޑިފެންޑަރު، އެޑާ މިިލިޓާއޯ ކާމިޔާބުކުރި މޮޅު ގޯލާ އެކު، 2-0 އިން އެސްޕަންޔޯލް ބަލިކޮށް، ސްޕެނިޝް ލީގުގެ އާ ސީޒަނުގައި ރެއާލް މެޑްރިޑުން ސައްތަ އިން ސައްތަ ރެކޯޑް ދަމަހައްޓައިފި އެވެ.
ސްޕެނިޝް ލީގުގެ އާ ސީޒަނުގައި ކުޅުނު ފަސް މެޗުން ވެސް މޮޅުވެ، 15 ޕޮއިންޓާ އެކު، ރެއާލް އޮތީ ލީގުގެ އެއް ވަނައިގަ އެވެ. ދެ ވަނައިގައި އޮތް ބާސެލޯނާ އަށް ހަތަރު މެޗުން 10 ޕޮއިންޓް ލިބިފައިވާއިރު، ތިން ވަނައިގައި އޮތް އެސްޕަންޔޯލަށް ވަނީ ފަސް މެޗުން 10 ޕޮއިންޓް ލިބިފަ އެވެ.
އަމިއްލަ ދަނޑުގައި ކުޅުނު ރެއާލުން ލީޑުނެގީ 22 ވަނަ މިނިޓްގައި މިލިޓާއޯ ޖެހި ހިތްގައިމު ގޯލުންނެވެ. އޭރިއާބޭރުން މިލިޓާއޯ ޖެހި ބާރު ބޯޅަ ވަނީ ގޯލުގެ މަތީ ކަނުގައި ތަތްވެފަ އެވެ. މިއީ، އަނިޔާގެ މައްސަލަތަކުގެ ސަބަބުން ފޯމަށް ވަރަށް ބޮޑަށް އަސަރުކޮށްފައިވާ މިލިޓާއޯގެ ކޮންފިޑެންސް ރަނގަޅުކުރަން ބަލާއިރު މޮޅު ގޯލެކެވެ.
ދެ ވަނަ ހާފުގެ ކުޅުން ފެށިގެން ދެ މިނިޓް ތެރޭ ރެއާލުން ދެ ވަނަ ގޯލު ޖަހައި، ލީޑުފުޅާކުރި އެވެ. މި ލަނޑު ޖެހީ މި ސީޒަނުގައި ރަނގަޅު ފޯމެއްގައި ހުރި ކީލިއަން އެމްބާޕޭ އެވެ. މެޗުގެ 47 ވަނަ މިނިޓްގައި އެސްޕަންޔޯލް ޑިފެންޑަރުން ހެދި ގޯހެއްގެ ފައިދާނަގައި، ރެއާލްގެ ވިނީޝިއުސް ޖޫނިއާ ދިން ބޯޅަ އެމްބާޕޭ ވަނީ ގޯލަށް ފޮނުވާލައިފަ އެވެ. މިއީ މި ސިޒަނުގެ ހުރިހާ މުބާރާތަކަށް ބަލާއިރު، އެމްބާޕޭ ޖެހި ހަތް ވަނަ ގޯލެވެ. ލީގުގައި ޖެހި ހަ ވަނަ ގޯލެވެ.
މެޗަށް ފަހު، ރެއާލްގެ ކޯޗު ޒަބީ އަލޮންސޯ ބުނީ، ހުރިހާ ކަމަކަށް ބަލާއިރު މި މެޗުގެ ނަތީޖާ ޕޮޒިޓިވް ކަމަށާއި އެކަމަކު މި އަށް ވުރެން ވެސް ރަނގަޅުކުރެވޭނެ ކަންކަން ފާހަގަކުރެވިފައިވާ ކަމަށެެވެ. އަދި، މި ވަގުތަށް ބަލާއިރު، ރެއާލުން އަންނަނީ މެޗުން މެޗަށް ކަންކަން ރަނގަޅުކުރަމުން ކަމަށް ވެސް އަލޮންސޯ ވަނީ ބުނެފަ އެެވެ.
