ފަލަސްތީނުގެ ރައީސް މަހްމޫދު އައްބާސް އަދި އެ ގައުމުގެ ސަރުކާރުގެ އިސް ވެރިންނަށް ވިސާ ދިނުމަށް އެމެރިކާއިން ދެކޮޅު ހަދައިފި އެވެ.
އެމެރިކާއިން ފަލަސްތީނުގެ ރައީސް މަހްމޫދު އައްބާސް އާއި 80 އެއްހާ އިސް ފަލަސްތީނު އޮފިޝަލުންނަށް ވިސާ ދިނުމަށް އިންކާރުކޮށްފައި ވުމުގެ ސަބަބުން އެ ފަރާތްތަކަށް އެމެރިކާގެ ނިއުޔޯކުގައި ބޭއްވުމަށް ހަމަޖެހިފައިވާ އދ.ގެ އާންމު މަޖިލީހުގެ ޖަލްސާތަކުގައި ބައިވެރިވުމުގެ ފުރުސަތު ގެއްލިގެންދާނެ އެވެ.
އޯގަސްޓް 29 ވަނަ ދުވަހު އެމެރިކާގެ ސްޓޭޓް ޑިޕާޓްމަންޓުން އިއުލާނުކުރި މި ނިންމުމާ ގުޅިގެން ފަލަސްތީނުގެ ލީޑަރުންގެ ފަރާތުން އަދި ދުނިޔޭގެ އެހެން ގައުމު ތަކުގެ ލީޑަރުންގެ ފާޑުކިޔުން ވެސް ދަނީ އެމެރިކާ އަށް އަމާޒުވަމުންނެވެ.
އެމެރިކާގެ ސްޓޭޓް ޑިޕާޓްމަންޓްގެ ތަރުޖަމާނު ވިދާޅުވި ގޮތުގައި މި ނިންމުން ނިންމާފައިވަނީ ގައުމީ ސަލާމަތާ ގުޅޭ ކަންކަމަށް ރިއާޔަތްކޮށެވެ.
"ހުރިހާ އެޕްލިކޭޝަންތަކެއް ދިރާސާކުރުމަށްފަހު، ފަލަސްތީނުގެ ރައީސް އައްބާސް ހިމެނޭ ގޮތަށް ވިސާ އަށް އެދިފައިވާ ބައެއް ފަރާތްތަކަކީ މިހާރުގެ ސަލާމަތީ އުސޫލުތަކުގެ ދަށުން އެމެރިކާއަށް ވަނުމުގެ ޝަރުތުތައް ފުރިހަމަވާ ބައެއް ނޫން،" ތަރުޖަމާނު ވިދާޅުވި އެވެ.
ފަލަސްތީނުގެ ރައީސް އަދި ސަރުކާރުގެ އިސް އޮފިޝަލުންނަށް އެމެރިކާ އިން ވިސާ ދިނުމަށް އިންކާރުކޮށް, އެމެރިކާ އަށް އެރުން މަނާކޮށްފައި އޮތް ނަމަވެސް، ނިއުޔޯކުގައި މަސައްކަތްކުރާ ފަލަސްތީނު މިޝަންގެ މުވައްޒަފުންނަށް ޖަލްސާތަކުގައި ބައިވެރިވުމުގެ ހުއްދަ ލިބޭނެ އެވެ. ފަލަސްތީނުގެ ލީޑަޝިޕުން މި ނިންމުމާ ދެކޮޅު ހަދައި، އަދި މިއީ ސިޔާސީ ގޮތުން ކަންކަން ގޯސްކުރުމަށް އަޅާފައިވާ ފިޔަވަޅެއް ކަމަށް ތުހުމަތު ކުރެ އެވެ.
ރާމަﷲގައި ހުންނަ އައްބާސްގެ އޮފީހުން ނެރުނު ބަޔާނެއްގައި ބުނެފައި ވަނީ، މި ފިޔަވަޅަކީ އދ.ގެ ހެޑްކުއާޓާސް އެގްރީމަންޓާ ހިލާފަށް އެމެރިކާއިން އަޅާފައިވާ ފިޔަވަޅެއް ކަމަށެވެ. އެ އެގްރީމަންޓްގެ ދަށުން ހޯސްޓް ގައުމުގެ ހައިސިއްޔަތުން ޖަލްސާގެ ބައިވެރިންނަށް އެ ގައުމަށް ވަނުމުގެ ހުއްދަ ދޭންޖެހެއެވެ.
"މިއީ ދުނިޔޭގެ މުހިންމު މަޝްވަރާތަކުގައި ފަލަސްތީނުގެ ބައިވެރިވުމަށް ހުރަސްއެޅުމަށް ކުރިން ދުވަހަކު ވެސް ނޭޅި ފިޔަވަޅެއް. އެމެރިކާގެ އިދާރާއިން މި ނިންމުން ވަގުތުން އަނބުރާ ގެންދިއުމަށް އަޅުގަނޑުމެން ގޮވާލަން" ބަޔާނުގައި ބުނެފައިވެއެވެ.
ގާނޫނީ މާހިރުން ބުނާ ގޮތުގައި ފަލަސްތީނަކީ އޮބްޒާވަ ސްޓޭޓެއްގެ ހައިސިއްޔަތު ލިބިފައިވާ ގައުމަކަށް ވެފައި، އދ.ގެ އާންމު މަޖިލީހުގެ ޖަލްސާގައި އައްބާސް މުހިންމު ތަގުރީރެއް ދެއްވުމަށް ހަމަޖެހިފައިވާތީ، އެމެރިކާގެ މި ނިންމުމަކީ 1947 ގެ އ.ދގެ ހެޑްކުއާޓަސް އެގްރީމަންޓްގެ ދަށުން އެ ގައުމުގެ ޒިންމާތަކާ ފުށުއަރާ ކަމެކެވެ. ނަމަވެސް، އެމެރިކާ އިން ބުނަނީ ގައުމީ ސަލާމަތާ ގުޅޭ ގާނޫނުތަކަކީ އެފަދަ އެއްބަސްވުންތަކަށްވުރެ އިސްކަން ދޭންޖެހޭ ކަންކަން ކަމަށެވެ.
މި ނިންމުމާ ގުޅިގެން ދުނިޔޭގެ އެކި ކަންކޮޅުތަކުން ހަރުކަށި ރައްދުތައްކެއް ދީފައި ވެ އެވެ. ޔޫރަފިއަން ޔޫނިއަން އިން ވަނީ އެމެރިކާގެ މި ނިންމުމާމެދު އަލުން ވިސްނުމަށް އެގައުމަށް ގޮވާލާފަ އެވެ. އޮސްޓްރޭލިއާ، ކެނެޑާ އަދި ޔުނައިޓެޑް ކިންގްޑަމުން އިން ވަނީ ކުރިއަށް އޮތް އާންމު މަޖިލީހުގައި ފަލަސްތީނު ދައުލަތެއްގެ ގޮތުގައި ބަލައިގަތުމަށް މަސައްކަތްކުރާނެކަން އިޝާރާތްކޮށްފައިވެއެވެ. އެހެންނަމަވެސް، އިސްރާއީލުން ވަނީ އެމެރިކާގެ މި ނިންމުމަށް މަރުހަބާ ކިޔައި، އެމެރިކާއިން އެޅި މި ފިޔަވަޅަށް ތައުރީފުކޮށްފަ އެވެ.
ފަލަސްތީނުގެ ރައީސް އެމެރިކާ އަށް އެރުމުގެ ހުއްދަ ނުދީ, އެކަމަށް އިންކާރުކޮށްފައި މި ވަނީ ގައްޒާގައި އަނިޔާވެރިކަން އިތުރުވަމުންދާ ދަނޑިވަޅެއްގައެވެ. އިސްރާއީލުން ވަނީ އެ ސަރަހައްދުގައި ހިންގާ އަސްކަރީ އޮޕަރޭޝަންތައް ހަރުކަށިކޮށްފަ އެވެ. އަދި ގައްޒާ ސިޓީއަކީ ހަނގުރާމައިގެ ސަރަހައްދެއްގެ ގޮތުގައި މިހާރު ވަނީ އިއުލާނުކޮށްފަ އެވެ.
