ލަންޑަން (އޮގަސްޓް 21) - މި ފަހަރުގެ ޓްރާންސްފާ މާކެޓްގައި ޗެލްސީން ކުޅުންތެރިން ވިއްކައިގެން 340 މިލިއަން ޑޮލަރު ހޯދައިފި އެވެ.
މި ފަހަރުގެ ޓްރާންސްފާ މާކެޓްގައި، ޗެލްސީން ވަނީ 11 ކުޅުންތެރިން ވިއްކައިގެން 340 މިލިއަން ޑޮލަރު ހޯދައިފަ އެވެ. އަދި، މިހާތަނަށް ނުވަ ކުޅުންތެރިން ގަންނަން، 375 މިލިއަން ޑޮލަރު ޗެލްސީން ވަނީ ހަރަދުކޮށްފަ އެވެ. ޗެލްސީން އަންނަ މަހު އެއް ވަނަ ދުވަހު ޓްރާންސްފާ މާކެޓް ބަންދުވުމުގެ ކުރިން، އިތުރު ކުޅުންތެރިން ގަންނާނެ ކަމަށް ބެލެވެ އެވެ.
ޗެލްސީން އެންމެ ފަހުން ވިއްކާލަން އެއްބަސްވީ ޕޯޗުގީސް ޑިފެންޑަރު، ރެނާޓޯ ވެއިގާ، 30 މިލިއަން ޑޮލަރަށް ވިޔަރެއާލަށެވެ. އެއީ މީގެ އަހަރެއް ކުރިން ސްވިޒަލެންޑްގެ ބާސެލް އަށް 15 މިލިއަން ޑޮލަރު ދީފައި ގަތް ކުޅުންތެރިއެކެވެ. ވެއިގާ، ޗެލްސީ އަށް ސޮއިކުރީ ހަތް އަހަރުގެ ކޮންޓްރެކްޓެއްގަ އެވެ. މިދިޔަ ސީޒަނުގެ ފަހު ބައި އޭނާ ހޭދަކުރީ، ލޯނަކަށް އިޓަލީގެ ޔުވެންޓަސްގަ އެެވެ.
މި ފަހަރުގެ ޓްރާންސްފާގައި ޗެލްސީން އެންމެ ބޮޑު އަގުގައި ވިއްކާލީ އާސެނަަލަށް އިނގިރޭސި ފޯވާޑް ނޯނީ މަޑުއޭކޭ އެވެ. ފީފާ ކްލަބް ވޯލްޑް ކަޕްގެ ޗެމްޕިއަންކަން ހޯދި ޗެލްސީ ދޫކޮށް މަޑުއޭކޭ އާސެނަލަށް ބަދަލުވީ 70 މިލިއަން ޑޮލަރުގެ ޑީލެއްގަ އެެވެ.
ރަޝިއާގެ މަހުޖަނު، ރޯމަން އަބްރަމޮވިޗް އަތުން، 2022 ވަނަ އަހަރު ޗެލްސީ ގަންނަން ކޮންސޯޓިއަމް ގްރޫޕުން ހެދި އެވެ. އެމެރިކާގެ މަހުޖަނު ޓޮޑް ބޯލީ އިސްވެ، އުފައްދާފައިވާ ކޮންސޯޓިއަމް ގްރޫޕުން ޗެލްސީ ގަތީ، އެ ކްލަބްގެ ދަރަނި ހަލާސްކުރާގޮތަށް، 5.2 ބިލިއަން ޑޮލަރަށެވެ. އެ ޑީލަށް ބަލާއިރު، ކްލިއާލޭކް ކެޕިޓަލް އިން ޗެލްސީގެ 61.5 ޕަސެންޓް ހިއްސާ ގަތެވެ. ބާކީ 38.5 ޕަސެންޓް ހިއްސާ އަކީ ޓޮޑް ބޯލީ އާއި ހަންސްޖޯގް ވައިސް އަދި މާކް ވޯލްޓާ އަށް އެއްވަރަށް ބަހާލައިފައިވާ ހިއްސާތަކެކެވެ. އެއީ، ގާތްގަނޑަކަށް، ކޮންމެ މައިނޯރިޓީ ހިއްސާދާރަކަށް 13 ޕަސެންޓް ވަރެެވެ.
ޗެލްސީން މި ދިޔަ ތިން އަހަރު ތެރޭ ކުޅުންތެރިން ގަންނަން ކުރި އިންވެސްޓް، 1.5 ބިލިއަން ޑޮލަރަށް ވުރެން އިތުރެވެ.
