ލަންޑަން (އޮގަސްޓް 21) - އާސެނަލްގެ ޖަރުމަނު ފޯވާޑް، ކައި ހަވާޓްޒްގެ ކަކުލަށް އަނިޔާވެ، އޭގެ ތަފްސީލް ދެނެގަންނަން އިތުރު ޓެސްޓްތަކެއް ހަދަން އެ ކްލަބުން ނިންމައިފި އެވެ.
އާސެނަލުން އެމިރޭޓްސް ސްޓޭޑިއަމްގައި އިއްޔެ ހުޅުވާލައިގެން ކުރިއަށްގެންދިޔަ ޓްރެއިނިން ސެޝަންގައި ހަވާޓްޒް ބައިވެރިއެއްނުވެ އެވެ.
ރިޕޯޓްތައް ބުނާގޮތުން، އިނގިރޭސި ޕްރިމިއާ ލީގުގެ މި ސީޒަނުގައި އާސެނަލުން ކުޅުނު ފުރަތަމަ މެޗުގައި، ބަދަލަކަށް ކުޅެން އެރި ހަވާޓްޒް، 25، ގެ ކަކުލަށް ޓްރެއިނިން ތެރޭގައި ވަނީ އަނިޔާވެފަ އެވެ. އަދި، އާސެނަލުން ނިންމާފައިވަނީ، އެ އަނިޔާއާ ބެހޭ ކަންކަން ފުރިހަމަ އަށް ދެނެގަތުމަށެވެ.
ފައިގެ ފަަލަމަސްގަނޑަށް ލިބުނު އަނިޔާއެއްގެ ސަބަބުން ހަވާޓްޒް، މި އަހަރުގެ ފެބްރުއަރީ މަހުން ފެށިގެން މެއި މަހާ ހަމައަށް ހުރީ އަނިޔާގަ އެވެ. މި ފަހަރުގެ އަނިޔާއާ ހެދި ހަވާޓްޒް ދިގު މުއްދަތަކަށް ކުޅުމާ ދުރަށް ދާން ޖެހިއްޖެނަމަ، އާސެނަލުން ޓްރާންސްފާ މާކެޓްގައި، އިތުރު ފޯވާޑެއް ހޯދުުމުގެ މަސައްކަތް ކުރާނެ އެވެ.
މީގެ އެއް އަހަރު ކުރިން ޗެލްސީ ދޫކޮށް، 65 މިލިއަން ޕައުންޑް (73 މިލިއަން ޑޮލަރު)ގެ ޓްރާންސްފާ ފީއެއްގައި އާސެނަލަށް ބަދަލުވި ހަވާޓްޒް މިދިޔަ ސީޒަނުގައި އަނިޔާވުމާ ހަމައަށް، ޖުމްލަކޮށް ބަލާއިރު، އާސެނަލްގެ ގިނަ މެޗުތަކެއްގައި ކުޅެފައިވެ އެވެ.
އާސެނަލަށް ބަދަލުވެ، މިހާތަނަށް ކުޅުނު 88 މެޗުން ހަވާޓްޒް ވަނީ 29 ގޯލު ޖަހައި، 13 ގޯލު ޖަހަން ފުރުސަތު ތަނަވަސްކޮށްދީފަ އެވެ.
