އަދާ އިފެކްޓިވް އޭރިއާ ބޭސްޑް ކޮންޒަވޭޝަން މެޝާޒް (އޯއީސީއެމް) ގެ ކެންޑިޑޭޓެއް ގޮތުގައި ތައިލެންޑުގެ ގްރޫޕް އޮފް ސިންހާ އެސްޓޭޓް ޕީއެލްސީން ރާއްޖޭގައި ހިންގާ ކްރޮސްރޯޑްސް މޯލްޑިވްސް ކަނޑައަޅައިފި އެވެ.
އޯއީސީއެމްއަކީ އދ. ގެ ކޮންވެންޝަން އޮން ބަޔޮލޮޖިކަލް ޑައިވާސިޓީގައިވާ ގޮތުން، ގައުމީ ފެންވަރުގައި ފާހަގަކޮށްފައިވާ ހިމާޔަތް ކުރެވިފައިވާ ސަރަހައްދުތަކުގެ އިތުރުން ގުދުރަތީ ވެށި ރައްކާ ކުރުމާއި ދެމެހެއްޓިނިވި ގޮތެއްގައި ވެށި ބެލެހެއްޓުމަށް މަސައްކަތް ކުރާ ތަނެކެވެ.
އޯއީސީއެމްގެ ކެންޑިޑޭޓެއް ގޮތުގައި ކަނޑައެޅޭ ތަންތަނަކީ ހިމާޔަތް ކުރެވިފައިވާ ސަރަހައްދުތަކަށް ވެގެން ނުވާނެ އެވެ. އެ ސަރަހައްދަކީ މުއްސަނދި ގުދުރަތީ ވެއްޓެއް ހިމެނޭ، ގުދުރަތީ ވަސީލަތްތައް ދެމެހެއްޓިނިވި ގޮތުގައި ބަލަހައްޓަމުންދާ ސަރަހައްދަކަށް ވާން ޖެހެ އެވެ.
މީގެއިތުރުން އެ ސަރަހައްދަކީ އެތަނެއްގެ ސަގާފަތާއި، އިގުތިސާދާއި އިޖުތިމާއީ އަދި މުޖުތަމައީ އަގުމަގުތައް ދަމަހައްޓާ، ހިންގާ ހުރިހާ ހަރަކާތްތަކަކީ ގުދުރަތީ ވެށި ރައްކާކޮށް ދެމެހެއްޓިނިވި ގޮތެއްގައި އިކޯސިސްޓަމް ބަލަހައްޓާ ތަނަކަށް ވެސް ވާން ޖެހެ އެވެ.
1.75 މިލިއަން އަކަމީޓަރުގެ ކްރޮސްރޯޑްސް މޯލްޑިވްސް ސަރަހައްދަކީ ރަސްމީކޮށް ބަޔޯޑައިވާސިޓީ އޭރިއާއެއް ގޮތުގައި އަދި އޯއީސީއެމް ކެންޑިޑޭޓެއް ގޮތުގައި ކަނޑައެޅީ ރާއްޖޭގެ އެންވަޔަރަމަންޓް މިނިސްޓްރީންނެވެ. އެގޮތަށް ތައިލެންޑްގެ މިނިސްޓްރީ އޮފް ކްލައިމެޓް ޗޭންޖުން ވެސްް ވަނީ ކަނޑައަޅާފަ އެވެ.
އެސްއެޗްއާރުގެ ދެމެހެއްޓިނިވި ތަރައްގީގެ ސްޓްރެޓަޖީގައި ކްރޮސްރޯޑްސް މޯލްޑިވްސް އަދާކުރާ މުހިންމު ދައުރު މިކަމުން ދައްކުވައިދޭ ކަމަށާއި މި ނިންމުމާއެކީ ގްލޯބަލް 30x30 އިނީޝިއޭޓިވްގެ ދަށުން 2030 ވަނަ އަހަރުގެ ނިޔަލަށް ދުނިޔޭގެ ބަޔޯޑައިވާސިޓީ 30 ޕަސަންޓު ރައްކާކުރުމަށް އެޅޭ ފިޔަވަޅަކަށް ވާނެ ކަމަށް ވެސް ކްރޮސްރޯޑްސް މޯލްޑިވްސް އިން ބުންޏެވެ.
ވެލާނާ އިންޓަނޭޝަނަލް އެއާޕޯޓާއި 15 މިނެޓު ކައިރީގައި އޮންނަ ކްރޮސްރޯޑްސް މޯލްޑިވްސްއަކީ އެނބޫދޫ ފަޅުގައި އޮންނަ، އިންޑިއާ ކަނޑުގައި ތަރައްގީކުރި ފުރަތަމަ މަލްޓި-އައިލެންޑް އިންޓަގްރޭޓަޑް މަންޒިލެވެ.
ކްރޮސްރޯޑްސް ހިންގާ ގްރޫޕް އޮފް ސިންހާ އެސްޓޭޓް ޕީސީއެލްގެ ދަށުން ހިންގާ ރިސޯޓުތަކުގެ ތެރޭގައި ސައި ލެގޫން މޯލްޑިވްސް، ކިއުރިއޯ ކަލެކްޝަން ބައި ހިލްޓަން، ހާޑްރޮކް ހޮޓެލް މޯލްޑިވްސް، އެސްއޯ މޯލްޑިވްސްގެ އަދި ދަ މެރީނާ އެޓް ކްރޮސްރޯޑްސް ހިމެނެ އެވެ.
