ރިސޯޓު ތަރައްގީކުރަން ދޫކޮށްފައި ހުރި ރަށްތަކުގެ ތެރެއިން އެއްވެސް މަސައްކަތެއް ނުކުރާ ކަމަށް ފާހަގަކުރެވިފައިވާ 22 ރަށުގެ އެއްބަސްވުން ބާތިލުކުރުމާ މެދު ބަންޑާރަ ނައިބު އޮފީހުގެ ލަފައަކަށް އެދިފައިވާ ކަމަށް ޓޫރިޒަމް މިނިސްޓްރީން ބުނިތާ ހަތް މަސްދުވަސް ވެގެން ދިޔަ އިރު ވެސް އެ މައްސަލައިގައި ވަކި ގޮތަކަށް ލަފާ ނުދޭ ކަމަށް އެ އޮފީހުން ބުނެފި އެވެ.
ޓޫރިސްޓު ރިސޯޓު ހަދަން ދޫކޮށްފައިވާ ރަށްތަކުގެ ތެރެއިން "ޒީރޯ ޕްރޮގްރެސް" ގައި ހުރި 22 ތަނެއްގެ އެއްބަސްވުން ބާތިލުކުރުމާ މެދު ގޮތެއް ނިންމަން ބަންޑާރަނައިބުގެ ލަފަޔަކަށް އެދިފައިވާ ކަމަށް ކުރީގެ ޓޫރިޒަމް މިނިސްޓަރި އިބްރާހިމް ފައިސަލް ރައްޔިތުންގެ މަޖިލީހުގައި ވިދާޅުވީ ހުސްވި އަހަރުގެ އޮކްޓޯބަރު 23، ގައި އެވެ.
ފައިސަލް އެ ދުވަހު މަޖިލީހުގައި ވިދާޅުވީ، ރިސޯޓު ތަރައްގީކުރަން ދޫކޮށްފައި ހުރި ރަށްތަކުގެ ތެރެއިން މަސައްކަތް ހުއްޓިފައިވާ 58 ރަށެއް ދެނެގަނެވިފައިވާ ކަމަށެވެ. އަދި މިހެން މަސައްކައް ހުއްޓިފައި ހުރި ރަށްތަކުގެ ތެރޭގައި 15 އަހަރާއި 20 އަހަރާއި 30 އަހަރު ވެފައިވާ ރަށްތައް ހިމެނޭ ކަމަށް ވެސް އޭނާ ވިދާޅުވި އެވެ.
ނަމަވެސް އެ ފަހުން މި މައްސަލައިގެ އަދާހަމައެއް ސަރުކާރުން ހިއްސާއެއްނުކުރެ އެވެ. މިކަމާ ގުޅޭ ގޮތުން ޓޫރިޒަމް މިނިސްޓްރީގައި ސުވާލުކުރުމުން އެ މިނިސްޓްރީގެ އޮފިޝަލަކު ބުނީ އެ ކަމުގައި ގޮތެއް ނުނިމި ވަނީ އޭޖީ އޮފީހުގެ ލަފާ އަދި ނުލިބޭތީ ކަމަށެވެ. މި ލަފާ ހޯދަން މައުލޫމާތު ހޯދައި ލިބިގަތުމުގެ ހައްގުގެ (އާރުޓީއައި) ގާނޫނުގެ ދަށުން ހުށަހެޅުމުން އެ އޮފީހުން ބުނީ އެ މައްސަލައިގައި ވަކި ގޮތަކަށް ލަފާ ނުދޭ ކަމަށެވެ.
"ޓޫރިސްޓު ރިސޯޓު ހަދަން ދޫކުރި ރަށްތަކުގެ ތެރެއިން 22 ރަށެެއް ތަރައްގީކުރަން އެއްވެސް މަސައްކަތެއް ނުކުރާތީ، އެ ރަށްތަކާ ގުޅޭ އެއްބަސްވުން ބާތިލުކުރުމާ ގުޅޭގޮތުން ވަކި ގޮތަކަށް މި އޮފީހުން އަދި ލަފާ ދީފައެއް ނުވޭ،" އޭޖީ އޮފީހުގެ ޖަވާބުގައި ބުންޏެވެ.
ނުހެދި ހުރި ރިސޯޓުތަކުގެ މައްސަލައިގައި ދިން ލަފާގެ އިތުރުން، އެ ރަށްތަކަކީ ކޮބައިތޯ ހިއްސާކޮށްދޭން ވެސް އާރުޓީއައިގައި އެދިފައިވާނެ އެވެ. ނަމަވެސް އޭޖީ އޮފީހުން ވަނީ އެ މައުލޫމާތު ހާމަކުރަން އެންމެ "އައުލާކަން" ބޮޑީ އެ ކަންކަން ބަލަހައްޓާ ވުޒާރާއިން ކަމަށް ބުނެ، އެ ރަށްތަކުގެ ލިސްޓެއް ދޭން އެ އޮފީހުން ވަނީ ދެކޮޅު ހަދައިފަ އެވެ.
ރިސޯޓު ހަދަން ދޫކުރާ ރަށްތައް ނުނިމި ދިގުލައިގެންދާ މައްސަލަ މިހާރު ވަރަށް ބޮޑެވެ. މިކަން ހައްލުކުރަން އެކި ސަރުކާރުތަކުން ސިޔާސަތުތައް ބަދަލުކޮށް، ގާނޫނާއި ގަވާއިދުތަކަށް ބަދަލު ގެނެސްފައިވެ އެވެ. މި ގޮތުން އެންމެ ފަހުން ގާނޫނުތައް ބަދަލުކޮށްގެން ރިސޯޓު ތަރައްގީކޮށް ނިންމަން ފުރުސަތު ދިނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުންނެވެ.
ސޯލިހު ސަރުކާރުން ވަނީ މި ފުރުސަތަށް އެދި ހުށަހެޅި ކުންފުނިތަކަށް ރިސޯޓު ތަރައްގީކުރަން ދީފައިވާ މުއްދަތު ފަސްކޮށްދީ، ކުލި ނުދައްކާ މުއްދަތަށް އަރާފަރި ހުރި ޖޫރިމަނާ ކުޑަކޮށްދީ، ތިން އަހަރުގެ ތެރޭގައި ރަށްތައް ނިންމާ ގޮތަށް އެއްބަސްވުންތައް މުރާޖައުކޮށްދީފަ އެވެ. އޭރު ޝަރުތު ކުރީ އެ މުއްދަތުގެ ތެރޭގައި ރަށްތައް ނުނިންމައިފި ނަމަ އެއްބަސްވުން ބާތިލުކުރާނެ ކަމަށް ބުނެފަ އެވެ.
އެކަމަކު އެއްވެސް އެއްބަސްވުމެއް ބާތިލުކުރި ކަމުގެ މައުލޫމާތެއް އަދި ނުލިބެ އެވެ. އަދި އެ ފުރުސަތު ދިނީ ކޮން ބަޔަކަށް ކަން އޭރު ސަރުކާރުން ހާމަނުކުރާތީ، އެއްބަސްވުންތައް މުރާޖާކުރި ތަންތަނަކީ ކޮބައި ކަމެއް ވެސް ނޭނގެ އެވެ.
ނުހެދި ހުރި ރަށްތަކާ ގުޅިގެން މި ސަރުކާރުން ގެންގުޅޭ ސިޔާސަތަކީ އެއްވެސް މަސައްކަތެއް ނުކުރާ ނަމަ އެ ތަންތަނުގެ އެއްބަސްވުން ބާތިލުކުރުމެވެ. ފައިސަލް އޭރު ވިދާޅުވީ މިކަމާ ގުޅޭ ޕޮލިސީ ޕޭޕަރެއް ތައްޔާރުކޮށް، އިކޮނޮމިކް ކައުންސިލުން ގޮތްތަކެއް ނިންމާ، ޓޫރިޒަމް ގާނޫނަށް ގެންނަން ޖެހޭ ބަދަލުތައް ގެންނަން ނޮވެމްބަރުގައި މަޖިލީހަށް ހުށަހަޅުއްވާނެ ކަމަށެވެ.
ގާނޫނު ބަދަލުކުރަން ޖެހެނީ، ފައިސަލް ވިދާޅުވި ގޮތުގައި، އެއްބަސްވުން ބާތިލުކުރުމުން ކޯޓަށް ގޮސް އެކަށީގެން ނުވާ ބަދަލު ހޯދަން އެއްވެސް ފުރުސަތެއް ނުދިނުމަށެވެ. އޭނާ މިހެން ވިދާޅުވީ ކުރިން ބާތިލުކުރި އެއްބަސްވުންތަކުގެ މައްސަލައިގައި ކޯޓަށް ގޮސްގެން އެކަށީގެންނުވާ ބަދަލު ހޯދާފައިވާ ކަމަށް ބަޔާންކުރައްވަމުންނެވެ.
ފައިސަލް މިހެން ވިދާޅުވި ފަހުން، ސަރުކާރުން ބޭނުންވެގެން ޓޫރިޒަމް ގާނޫނު ބަދަލުކުރި އެވެ. އެކަމަކު މަސައްކަތް ނުހިނގާ ތަންތަނުގެ މައްސަލައިގައި ފައިސަލް ހޯދަން ބޭނުންވި މައްސަލައާ ގުޅޭ އެއްވެސް މާއްދާއަކަށް ބަދަލެއް ނުުގެނެ އެވެ. ބަދަލު ގެނައި މަރާމާތަށް ބަންދުކުރާ ރިސޯޓުތައް ނުވަތަ ރީޑިވެލޮޕް ކުރަން ބަންދުކުރާ ރިސޯތުތައް އަލުން ހުޅުވުމާ ގުޅޭ މާއްދާތަކަށެވެ. މި ބަދަލުތަކުގެ ދަށުން ބުނާ ތާރީހަށް ރިސޯޓު ނުހުޅުވައިފި ނަމަ އެއްވެސް ބަދަލެއް ނުދީ އެ ތަން އަތުލެވެ އެވެ.
ނުނިމޭ ރަށްތައް އަތުލަން ގާނޫނީ ހުރަސްތަކެއް ހުރި ކަމަށް ސަރުކާރުން ބުނާއިރު، މި ރަށްތައް މާކެޓަށް ނުނެރެވުމުގެ ސަބަބުން އިގުތިސާދުން ގެއްލިގެންދާ އާމްދަނީއަކީ ވެސް ބޮޑު މައްސަލައެކެވެ.
ފިނޭންސް މިނިސްޓްރީން 2023 ގައި އާންމުކޮށްފައި ފިސްކަލް ހިރާސްތަކުގެ ބަޔާނުގައި ބުނީ، އެހާތަނަށް ނުހުޅުވި ހުރި 88 ރިސޯޓުތަކުގެ އޮޕަރޭޝަންތައް ފެށިއްޖެ ނަމަ، ސީދާ ގޮތުންނާއި ނުސީދާ ގޮތުން އިގުތިސޯދަށް އަހަރެއްގެ މައްޗަށް 1.7 ބިލިއަން ރުފިޔާ އިތުރު ވާނެ އެވެ. އަދި 16،000 ވަޒީފާ އުފެދިގެން ދާނެ އެވެ.
