ލަންޑަން (ޖުލައި 11) - ޗެލްސީ އަށް ކުޅެމުން އަންނަ އިނގިރޭސި ފޯވާޑް، ނޯނީ މަޑުއޭކޭ، 70 މިލިއަން ޑޮލަރުގެ ފީ އަކަށް އާސެނަލަށް ގަންނަން އެއްބަސްވުމަކަށް އަތުވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
ނެދަލެންޑްސްގެ ޕީއެސްވީ އައިންދޯވަން އިން 2023 ވަނަ އަހަރު ޖެނުއަރީ މަހު، މަޑުއޭކޭ، ޗެލްސީ އަށް ސޮއިކުރީ، 40 މިލިއަން ޑޮލަރުގެ ފީ އަަކަށެވެ. އުމުރުން 23 އަހަރުގެ މަޑުއޭކޭ، ޗެލްސީއާ އެކު، ހަދާފައި އޮތް ކޮންޓްރެކްޓްގައި ބާކީ ފަސް އަހަރު އެބައޮތެވެ.
އެކަމަކު، ޗެލްސީން މި ވަނީ، އެ ކްލަބްގެ ޓެކްނިކަލް ޓީމާ މަޝްވަރާކޮށް، އާސެނަަލުން ބޮޑު އަގެއް ދިނުމުން މަޑުއެކޭ ދޫކޮށްލަން ނިންމީ އެވެ.
ރިޕޯޓްތައް ބުނާގޮތުން، މަޑުއެކޭގެ ޑީލް އަވަހަށް ނިންމަން އާސެނަލްގެ ކޯޗު މިކޭލް އާޓެޓާ ވެސް ވަނީ ބާރުއަޅައިފަ އެވެ.
މިދިޔަ ސީޒަނުގައި ޗެލްސީން ޔުއެފާ ކޮންފަރެންސް ލީގުގެ ޗެމްޕިއަންކަން ހޯދިއިރު، މުޅި ސީޒަނުގައި މަޑުއޭކޭ ވަނީ ޗެލްސީގެ 45 މެޗުގައި ކުޅެ، 11 ގޯލު ޖަހައި، ފަސް ލަނޑު ޖަހަން ފުރުސަތު ތަނަވަސްކޮށްދީފަ އެވެ. އަދި، ޗެލްސީ އަށް ބަދަލުވި ފަހުން މިހާތަނަށް އެ ޓީމަށް، 91 މެޗު ވަނީ ކުޅެދީފަ އެވެ.
މަޑުއޭކޭ ވެގެންދާނީ މި ފަހަރުގެ ޓްރާންސްފާގައި އާސެނަލާ ގުޅޭނެ ތިން ވަނަ ކުޅުންތެރިޔާ އަށެވެ. އާސެނަލުން ވަނީ ރެއާލް ސޮސިއެޑާޑްގެ މާޓިން ޒުބިމެންޑީ އާއި ބްރެންޓްފޯޑްގެ ކްރިސްޓިއަން ނޯގާޑް ސޮއިކޮށްފަ އެވެ. ޒުބިމެންޑީ ގަންނަން 77 މިިލިއަން ޑޮލަރު ހޭދަކުރިއިރު، ނޯގާޑް ގަންނަން 14 މިލިއަން ޑޮލަރު ދެއްކި އެވެ.
