ދިވެހިންގެ ތެރޭގައި ވިޔަފާރިކުރަން މަގުބޫލު ބައެއް ސައިޓުތަކަށް ފައިސާ ދައްކާ ކޮންމެ ފަހަރަކު 30 ޕަސެންޓުގެ ފީއެއް ނަގަން ފަށަން ނިންމާ އެކަން އިއުލާނުކުރި ދުވަހު ޖެހި އޯޑަރުތަކުން ވެސް އެ ފީ ނެގި މައްސަލަތަކެއް ފެންމަތިވެއްޖެ އެވެ.
ބީއެމްއެލް އިން މި ފީ ނަގާނެކަން އިއުލާނުކުރީ ޖޫން 30، ގަ އެވެ. އެ އިއުލާނުގައި ބުނެފައިވަނީ ޓީމޫ، ޝީއިން، އަލިބާބާ، އަލީ އެކްސްޕްރެސް، ލަޒާޑާ އަދި އީބޭ ކުރާ ވިޔަފާރިތަކުން ފީ ނަގަން ފަށާނީ ޖުލައި 1، އިން ފެށިގެން ކަމަށެވެ.
ނަމަވެސް، މި ނޫހާ ވާހަކަ ދެއްކި އާންމުންގެ ބައެއް ފަރާތްތަކުން ބުނި ގޮތުގައި ޖޫން 30، ގެ ދުވާލު އަދި އެ ރޭ ޖެހި އޯޑަރުތަކުން 30 ޕަސެންޓު ވަނީ ނަގާފަ އެވެ. މީގެ ތެރޭގައި ފަހު ދުވަހު ޝެއިން އޯޑަރު ކުރި ރާއްޖޭގައި އޮންލައިން ވިޔަފާރި ކުރާ ބައެއް މީހުން ވެސް ހިމެނެ އެވެ.
މި ނޫހާ ވާހަ ކަދެއްކި އެކަކު ބުނި ގޮތުގައި އެ ރޭ ޖެހި އޯޑަރުތައް ބޭންކުން ޕެންޑިން ގައި ބެހެއްޓުމަށްފަހު އެ ރޭ ދަންވަރު ޕްރޮސެސްކުރީ 30 ޕަސެންޓު ފީ އާ އެކު އެވެ. މިކަމާ ގުޅިގެން ބައެއް މީހުންނަށް އެތައް ހާސް ރުފިޔާގެ ގެއްލުން ވަނީ ވެފަ އެވެ.
"ބޭންކުން ބުނަނީ އޮޅިގެންނޭ. ދެތިން ދުވަސް ފަހު ރިޓާން ކޮށްދޭނަމޭ. އެއީ އަހަރެން ގުޅައިގެން އެއްޗެހި ކީމަ. ކިތައް މީހުން ހުންނާނެ މިހެން ނޭގި އެ ދުވަހު އޯޑަރުން ފީ ނަގާފަ،" މި ނޫހާ ވާހަކަ ދެއްކި އެކަކު ބުންޏެވެ.
މިކަމާ ގުޅިގެން ބީއެމްއެލްގެ ރަސްމީ ބަހެއް ނުލިބެ އެވެ. ނަމަވެސް އެ ދުވަހު އޯޑަރު ޖެހި ބައެއް މީހުން ބޭންކަށް ގުޅުމުން އެއީ އޮޅިގެން ވީ ކަމެއް ކަމަށާއި ފައިސާ އަނބުރާ ދޭނެ ކަމަށް ބުނެފައިވާ ކަމަށް އެ މީހުން ބުންޏެވެ.
މި ފީ ނަގަން ފެށުމާއެކު އާންމުންގެ ރުޅިގަނޑު ފަޅައިގެން ގޮސް ގިނަ ބަޔަކު އަންނަނީ ބީއެމްއެލް އާއި ދެކޮޅަށް އަޑުއުފުލަމުންނެވެ. ބޭންކަކީ ސްކޭމެއް ކަމަށް ވެސް ބުނަމުންނެވެ.
ބީއެމްއެލްގެ ނިންމުމާ ދެކޮޅަށް ހިޔާލުފާޅުކުރި ބައެއް މީހުން ބުނެފައި ވަނީ ބީއެމްއެލްގެ ނިންމުމަކީ ކުދި ވިޔަފާރިތައް ކުރާ މީހުންނަށާއި އަމިއްލަ ބޭނުމަށް ބޭރުން ތަކެތި ގަންނަ މީހުންނަށް ހުރަސް އެޅުމަށް ކުރި ކަމެއް ކަމަށެވެ. އަދި އެ ނިންމުން ދިވެހި ރައްޔިތުން ބަލައި ނުގަންނާނެ ކަމަށް އެމީހުން ބުނެފައިވެ އެވެ.
