ދަރަނި ނުދެއްކިދާނެ ކަމުގެ ހިރާސް އިންތިހާއަށް ބޮޑު ކަމަށް ބަލައި ބައިނަލްއަގުވާމީ ރޭޓިން އެޖެންސީ، ފިޗް ރޭޓިންސްއިން ރާއްޖޭގެ ކްރެޑިޓު ރޭޓިން "ސީސީ" ގައި މިފަހަރު ވެސް ދެމެހެއްޓުން މައްސަލައެއް ގޮތުގައި ނުބަލައި، އެއީ ކުރިއެރުމެއް ކަމަށް ސަރުކާރުން ގަބޫލުކުރި ކަމަށް އިއްޔެ ރިޕޯޓުކުރި އެވެ.

މިދިޔަ އަހަރުގެ ތެރޭގައި ދެ ފަހަރަށް ފިޗުން ރާއްޖޭގެ ރޭޓިން ދަށްކުރި އެވެ. އެގޮތުން، "ބީ ނެގެޓިވް" ގައި 2023 އަދި 2022 ގައި ހުރި ރޭޓިން "ސީސީސީ ޕްލަސް" އަށް ދަށްކުރީ މިދިޔަ އަހަރުގެ ޖޫން މަހުގެ ތެރޭގަ އެވެ. އެއަށް ފަހު އަނެއްކާ ވެސް މިދިޔަ އަހަރުގެ އޮގަސްޓު މަހު ރާއްޖޭގެ ރޭޓިން "ސީސީ" އަށް ދަށްކުރި އެވެ.

ރޭޓިން ދެމެހެއްޓުމާ ގުޅިގެން ފިނޭންސް މިނިސްޓްރީން އިއްޔެ ނެރުނު ބަޔާނުގައި ބުނީ މިއީ ފަތުރުވެރިކަމުގެ ދާއިރާގެ ހަރުދަނާކަމާއި، ފައިސާއާ ގުޅޭ އިސްލާހުތަކާ ގުޅިގެން ބޭރު ފައިސާގެ ރިޒާވް އިތުރުވެފައިވުމާއި، އިންޑިއާގެ ރިޒާވް ބޭންކާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާ ދެމެދު ހެދިފައިވާ ކަރަންސީ ސްވޮޕް ފެސިލިޓީ ހަރުދަނާ ގޮތެއްގައި ބޭނުންކުރުމުގެ ނަތީޖާ ކަމަށެވެ.

އާމްދަނީ ރަނގަޅުވަމުން އަންނަ ކަމަށާއި ހަރަދުތައް ކޮންޓްރޯލް ކުރެވި އެކަށީގެންވާ މިންވަރަކަށް ގެނައުމުގެ ސަބަބުން މިހާތަނަށް ފިސްކަލް ސާޕްލަސް ހުރީ 1.1 ބިލިއަން ރުފިޔާގައި ކަމަށް ވެސް ފިނޭންސުން މިއަދު ބުންޏެވެ. އާމްދަނީ އިތުރުވީ ޓޫރިޒަމް އަދި އެއާޕޯޓު ޓެކްސް ތަކާއި ފީތައް ބޮޑުކުރުމުން ކަން ސަރުކާރުން ފާހަގަކޮށްފައިވެ އެވެ.

ނަމަވެސް ފިޗުން ބުނަނީ، ރާއްޖޭގެ ދަރަނިތައް ރީފައިނޭންސް ކުރުމަށާއި ބޭރުން ފައިސާ ހޯދުމަށް ދަތިތަކެއް ހުރިކަމަށެވެ. ސިޔާސީ އެދުންވެރިކަމުގެ ސަބަބުން ސަރުކާރުގެ ހަރަދުތައް ކުޑަކުރަން އަޅަން ނިންމި ފިޔަވަޅުތަކަށް އަމަލުކުރުން ފަސްކުރަމުންދާތީ ބަޖެޓު ޑެފިސިޓް ބޮޑުވާނެ ކަމަށް ވެސް ފިޗުން އަންދާޒާ ކުރެ އެވެ.

މި ވާހަކަތަކަށް ބެލުމެއްނެތި ފިނޭންސްގެ ބަޔާނުގައި ބުނެފައިވަނީ އިސްލާހީ ފިޔަވަޅުތައް ތަންފީޒުކުރަމުންދާ ކަމަށެވެ. އޭގެ ސަބަބުން ޖީޑީޕީއާ އަޅާބަލާއިރު ދައުލަތުގެ ދަރަނި ދަށަށް ދިއުމުގެ މަގު ތަނަވަސްވެގެންދާނެ ކަމަށް ވެސް އެ މިނިސްޓްރީން ނެރުނު ބަޔާނުގައި ބުނެފައިވެ އެވެ.

ފިނޭންސްގެ ބަޔާނުގައި ދެން ފާހަގަކޮށްފައިވަނީ ފަތުރުވެރިކަމާއި ޖުމްލަ އިގުތިސޯދަށް ލިބެމުންދާ އަދި އަންދާޒާކުރާ ކުރިއެރުމާއި ރިޒާވް މަތިވަމުންދާ މިންވަރެވެ.

މި އަހަރުގެ މިހާތަނަށް ރާއްޖެ އައި ޓޫރިސްޓުންގެ އަދަދު 9.4 އިންސައްތަ ވަނީ އިތުރުވެފަ އެވެ. މިއީ ފިޗުން ލަފާކުރާ ގޮތަށް 4.6 އިންސައްތައަށް ޖީޑީޕީ ކުރިއެރުމަށް ބާރުއަޅާ ކަމެއް ކަމަށް ފިނޭންސުން ބުނެ އެވެ.

މީގެ އިތުރުން، ރާއްޖޭގެ ބޭންްކުތަކަށް ބޭރު ފައިސާ މާރުކުރުން ލާޒިމް ކުރުމުގެ ފައިދާ ބޭރު ފައިސާގެ ރިޒާވުން ދައްކަމުންދާ ކަމަށް ވެސް ފިނޭންސުން ބުނެފައިވެ އެވެ. އެޕްރީލް މަހުގެ ނިޔަލަށް ރަސްމީ ރިޒާވް 856.3 މިލިއަން ޑޮލަރަށް އަރާފައިވާ ކަމަށާއި ކުރިއަށް އޮތްތަނުގައި ރިޒާވް އިތުރުވާނެ ކަމަށް ސަރުކާރުން ވަނީ ބުނެފަ އެވެ.

titledesc

ނަމާދު ވަގުތު

• ފަތިސް 04:35
• އިރުއަރާ 05:53
• މެންދުރު 12:10
• އަޞްރު 15:34
• މަޣްރިބް 18:19
• ޢިޝާ 19:37

މުހިއްމު ބައެއް ހަބަރު