ޗައިނާގެ ޓެކް ކުންފުނި ވާވޭ އިން އަމިއްލައަށް ތައްޔާރުކުރި ހާމަނީ އޮޕަރޭޓިން ސިސްޓަމް ބޭނުންކޮށްގެން އުފެއްދި ފުރަތަމަ ލެޕްޓޮޕްތައް ނެރެފި އެވެ.
ވާވޭ އިން ހޯމަ ދުވަހު ދެ އާ ލެޕްޓޮޕް މޮޑެލް ތައާރަފުކޮށްފައިވާއިރު، މިއީ އެ ކުންފުނިން އަމިއްލައަށް ތައްޔާރުކުރި ހާމަނީ އޮޕަރޭޓިން ސިސްޓަމް ބޭނުންކޮށްގެން ވިއްކާ ފުރަތަމަ ލެޕްޓޮޕްތަކެވެ. މި ލެޕްޓޮޕްތައް ނެރެފައިވަނީ ހުޅަނގުގެ ބޮޑެތި ޓެކްނޮލޮޖީ ކުންފުނިތަކާ ވާދަކުރުމަށެވެ.
އެމެރިކާއިން ވާވޭއަށް މުހިންމު ޗިޕްތައް ލިބުމަށް ހުރަސްތަކެއް ކުރިމަތިކުރަމުން ދާއިރު، ޗައިނާއަކީ ޓެކްނޮލޮޖީގެ ހާޑްވެއާ އުފެއްދުމުގައި ދުނިޔޭގެ އެންމެ ކުރިއަރާފައިވާ ގައުމަކަށް ވީނަމަވެސް، ކޮމްޕިއުޓަ އޮޕަރޭޓިން ސިސްޓަމްތައް ތަރައްގީކުރުމުގައި މައިކްރޯސޮފްޓް އަދި އެޕަލްއާ އަޅާބަލާއިރު މާ ފަހަތުގައި އުޅޭ ގައުމެކެވެ. މައިކްރޯސޮފްޓްގެ ވިންޑޯސް އަދި އެޕަލްގެ މެކްއޯއެސް ވަނީ ދުނިޔޭގެ މާކެޓްގައި ގިނަ ދުވަސްތަކެއް ވަންދެން އެއްވަނައިގައި ހިފަހައްޓާފަ އެވެ.
ވާވޭއިން އަލަށް ނެރުނު މޭޓްބުކް ފޯލްޑް އަދި މޭޓްބުކް ޕްރޯ ދެ ލެޕްޓޮޕްވެސް ރަން ކުރަނީ ހާމަނީ އޯއެސް 5 ގަ އެވެ. މިއީ ވާވޭ ޓެކްނޮލޮޖީސް އިން 2015 ވަނަ އަހަރު ތަރައްގީ ކުރަން ފެށި އަދި 5 އަހަރު ފަހުން މޭޓް ސީރީޒްގެ ސްމާޓްފޯނުތަކުގައި ތައާރަފުކުރި އޮޕަރޭޓިން ސިސްޓަމްގެ އެންމެ ފަހުގެ ވާޝަނެވެ. ލެޕްޓޮޕްތަކުގެ ޕްރޮޓޯޓައިޕް ތައްޔާރުކުރަން ފަށާފައިވަނީ 2021 ވަނަ އަހަރު އެވެ.
މޭޓްބުކް ފޯލްޑްގެ އަސާސީ މޮޑެލްގައި ފިޒިކަލް ކީބޯޑެއް ނުހިމެނެއެވެ. އަދި ފުރިހަމައަށް ހުޅުވާލުމުން 18 އިންޗީގެ އޯލެޑް ޑަބަލް ސްކްރީނެއް ލިބެއެވެ. މި މޮޑެލްގެ އަގަކީ 23,999 ޔުއާން (3,328 އެމެރިކާ ޑޮލަރު) އެވެ. އާންމު ލެޕްޓޮޕް ކީބޯޑެއް ބޭނުންކުރާ މޭޓްބުކް ޕްރޯ މޮޑެލްގެ އަގު ފެށެނީ 7,999 ޔުއާން އިންނެވެ.
ވޮޝިންގްޓަން އިން 2019 ވަނަ އަހަރުން ފެށިގެން ގައުމީ ސަލާމަތާ ގުޅޭ ކަންބޮޑުވުންތަކާ ހެދި ވާވޭއަށް އެމެރިކާގެ ޓެކްނޮލޮޖީ ލިބުން ހަނިކުރަން ފެށި އެވެ. މިކަމުގެ ސަބަބުން ވާވޭއިން ޗިޕްތަކާއި އޮޕަރޭޓިން ސިސްޓަމްތައް ތަރައްގީކޮށް އުފެއްދުމުގެ އަމިއްލަ ގާބިލުކަން ބިނާކުރުމަށް މަޖުބޫރުވި އެވެ.
ވާވޭއިން ބުނެފައިވާ ގޮތުގައި ކޮމްޕިއުޓަރުތަކަށް ހާމަނީއޯއެސް މިހާރު 150 އަށްވުރެ ގިނަ އެޕްލިކޭޝަން ހުށަހަޅަ އެވެ. މީގެ ތެރޭގައި މައިކްރޯސޮފްޓް އޮފީހުގެ ބަދަލުގައި ކިންގްސޮފްޓްގެ ޑަބްލިއުޕީއެސް އޮފީސް ހިމަނާފައިވާއިރު، އަދި ފޮޓޯ އެޑިޓްކުރާ އެޕް މެއިޓޫ ޝިއު ވެސް މި އޯއެސް ގައި ހިމެނެ އެވެ.
2024 ވަނަ އަހަރުގެ ނިޔަލަށް، 7.2 މިލިއަނަށްވުރެ ގިނަ ވަކިވަކި ޑިވެލޮޕަރުން ހާމަނީއޯއެސްއަށް އެޕްތައް ތަރައްގީ ކުރަމުން ގެންދިޔަ އެވެ. ވާވޭގެ އެންމެ ފަހުގެ އަހަރީ ރިޕޯޓުގައިވާ ގޮތުން، ސްމާޓްފޯނުތަކާއި ޓީވީތައް ހިމެނޭ ގޮތަށް ބިލިއަނަކަށްވުރެ ގިނަ ޑިވައިސްތަކުގައި ހާމަނީއޯއެސް އިންސްޓޯލްކުރެވިފައިވެ އެވެ.
އަލަށް ނެރުނު ލެޕްޓޮޕްތަކުގައި ބޭނުންކޮށްފައިވާ ޕްރޮސެސިންގ ޗިޕަކީ ކޮބައިކަން ވާވޭއިން ހާމަކޮށްފައެއް ނުވެ އެވެ. ނަމަވެސް ކުންފުނިން ބުނެފައިވަނީ ކޮމްޕިއުޓަރުތަކުގެ އަގު ނިސްބަތުން މަތިވެފައިވަނީ ޗިޕްސެޓަށް ބޭނުންކުރި އައު މެނުފެކްޗަރިން ޓެކްނޮލޮޖީގެ އަގުގެ ސަބަބުންކަމަށެވެ.
ރޮއިޓަރޒް އިން ފާއިތުވި އަހަރު ރިޕޯޓުކުރި ގޮތުގައި އެމެރިކާއިން އިންޓެލް އަދި ކުއަލްކޮމް ފަދަ ކުންފުނިތަކަށް ދީފައިވާ ލައިސަންސްތައް ބާޠިލުކޮށްފައިވެ އެވެ. މި ލައިސަންސްތަކުގެ ދަށުން އެ ކުންފުނިތަކުން ލެޕްޓޮޕްތަކާއި ހޭންޑްސެޓްތަކުގައި ބޭނުންކުރާ ޗިޕްތައް ވާވޭއަށް ފޮނުވަމުން ގެންދިޔަ އެވެ.
ވާވޭއިން ނެރުނު ފުރަތަމަ އާޓިފިޝަލް އިންޓެލިޖެންސް (އޭއައި) ލެޕްޓޮޕް ނެރުމާ ގުޅިގެން އެމެރިކާގެ ރިޕަބްލިކަން ޕާޓީއަށް ނިސްބަތްވާ މަޖިލިސް މެންބަރުން ކޯފާވެފައިވާއިރު، އެ ލެޕްޓޮޕް ރަންކުރަނީ އިންޓެލް ޕްރޮސެސާ ބޭނުންކޮށްގެންނެވެ.
