އާޓިފިޝަލް އިންޓެލިޖެންސް (އޭއައި) ބޭނުންކުރުމުގައި ގެންގުޅެންޖެހޭ އުސޫލުތަކާ ގުޅޭގޮތުން ދެކެވޭ "ބިރުވެރި ވާހަކަތަކަށް" ޗައިނާއިން ވަރުގަދަ ރައްދެއް ދީފި އެވެ. އަދި އޭއައިގެ ދާއިރާއިން އެއް ގައުމު އަނެއް ގައުމާ ކުރިމަތިލުމަށާއި، ނުބައި ނިޔަތެއްގައި ވާދަވެރިކަން އުފެއްދުމާ ދެކޮޅަށް ޗައިނާއިން ވަނީ އިންޒާރު ދީފަ އެވެ.
ޗައިނާއިން މިފަދަ ރައްދެއް ދީފައި މިވަނީ، އޭއައި ރޭހުގައި ޗައިނާ ކުރިއަރައިގެން ދިޔަ ނުދީ، އޭއައި ތަރައްގީކުރުމުގެ ދުވެލި މަޑުޖައްސާލުމަށް "އެންތްރޮޕިކް" ކުންފުނީގެ ސީއީއޯ ޑާރިއޯ އަމޯޑޭއީ ގޮވާލާފައިވާ ދަނޑިވަޅެއްގަ އެވެ.
ވޭތުވެދިޔަ ހަފުތާގެ ތެރޭގައި، އެމެރިކާގެ އޭއައި އުފައްދާ އެންމެ ކުރިއަރާފައިވާ ލެބްތަކުގެ މާހިރުން ވަނީ އޭއައިގެ ސަބަބުން ކުރިމަތިވެދާނެ ނުރައްކާތަކާ މެދު ވަރަށް ބޮޑަށް އިންޒާރު ދީފަ އެވެ. އޭގެ ތެރެއިން ބައެއް ފަރާތްތަކުން ބުނާ ގޮތުގައި އޭއައިގެ ސަބަބުން އިންސާނީ ނަސްލު މުޅިން ނެތިގެން ދިއުމުގެ ބިރު އެބައޮތެވެ.
ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ އެމަނިކުފާނުގެ އެންމެ އިސް އަމާޒަކީ ޗައިނާއަށް ވުރެ ހަލުވި ދުވެއްޔެއްގައި އެމެރިކާއިން މި ޓެކްނޮލޮޖީ ތަރައްގީކުރުން ކަމަށެވެ.
ހޯމަ ދުވަހު ނޫސްވެރިންނާ ވާހަކަދައްކަވަމުން ޗައިނާގެ ފޮރިން މިނިސްޓްރީގެ ތަރުޖަމާނު ގުއޯ ޖިއާކުން ވިދާޅުވީ، ބިރުވެރިކަން އުފެއްދުމާއި، ކުރިމަތިލުންތަކަށް މަގުފަހިކުރުމާއި، ނުބައި ނިޔަތުގައި ވާދަވެރިކަން އުފެއްދުމަކީ އޭއައި ބޭނުންކުރުމުގެ ބައިނަލްއަގުވާމީ އުސޫލުތައް އެކުލަވާލުމަށް ހުރަސްއެޅޭ ކަންކަން ކަމަށާއި، އެއީ އެއްވެސް ބައެއްގެ މަސްލަހަތު އޮތް ކަމެއް ނޫން ކަމަށެވެ.
އޭނާ އިތުރަށް ވިދާޅުވީ، ހުރިހާ ފަރާތްތަކުން ގުޅިގެން މަސައްކަތް ކުރަންޖެހޭނީ ހުޅުވާލެވިފައިވާ، ހުރިހާ އެންމެންގެ ބައިވެރިވުން އޮތް، އަދި އިންސާނިއްޔަތަށް ފައިދާހުރި ގޮތެއްގައި އޭއައި ކުރިއެރުވުމަށް ކަމަށެވެ.
ތަރުޖަމާނުގެ މި ވާހަކަތަކުން ހާމަވަނީ، އޭއައިގެ ދާއިރާގައި ދުނިޔޭގެ އެންމެ ނުފޫޒުގަދަ ދެ ބާރު ކަމަށްވާ އެމެރިކާ އާއި ޗައިނާއާ ދެމެދު އެއްބަސްވުމަކަށް އައުމަށް ހުރި ގޮންޖެހުންތަކެވެ.
ދުނިޔޭގެ އެންމެ ބޮޑު ދެ އިގްތިސާދުން ކުރިއަރާފައިވާ ޓެކްނޮލޮޖީގެ ދާއިރާއިން ކުރިހޯދުމަށް މަސައްކަތް ކުރަމުންދާއިރު، އޭއައި މިހާރު ވެފައިވަނީ އެމެރިކާ އާއި ޗައިނާގެ ވާދަވެރިކަމުގެ މައިގަނޑު އަސާސަށެވެ. އޭއައި އުފެއްދުމަށް ބޭނުންވާ މުހިންމު ޗިޕްތައް ޗައިނާއަށް އެކްސްޕޯޓް ކުރުން އެމެރިކާއިން މަނާކޮށްފައިވީ ނަމަވެސް، އޯޕަން ސޯސް ޓެކްނޮލޮޖީ އާއި ޗައިނާ ސަރުކާރުގެ އެހީތެރިކަމާއެކު އެ ގައުމުގެ އޭއައި އީޖާދުތައް ދަނީ ފުޅާވަމުންނެވެ.
ގިނަ މާހިރުން ގަބޫލުކުރާ ގޮތުގައި އެމެރިކާ އަދިވެސް އުޅެނީ ކުރީގަ އެވެ. އެމެރިކާގެ އޭއައި ކުންފުނިތަކަށް އިންވެސްޓަރުން އެތައް ބިލިއަން ޑޮލަރެއް އޮއްސަމުންދާއިރު، ޗައިނާގެ ކުންފުނިތައް ދަނީ އެވަރުގެ ފަންޑު ހޯދުމަށް ދަތިތަކާ ކުރިމަތިލަމުން، އެމެރިކާއާ އަރާ ހަމަކުރުމަށް މަސައްކަތް ކުރަމުންނެވެ.
މިދިޔަ ޖުލައި މަހު ޗައިނާއިން ވަނީ އޭއައި ބޭނުންކުރުމުގެ ބައިނަލްއަގުވާމީ އުސޫލުތައް އެކުލަވާލުމަށް އަމާޒުކޮށް "ވޯލްޑް އޭއައި ކޯޕަރޭޝަން އޯގަނައިޒޭޝަން" އުފައްދާފަ އެވެ. އަދި އިންޑިއާގައި ބޭއްވި ބްރިކްސް ސަމިޓުގައި ވާހަކަދައްކަވަމުން ރައީސް ޝީ ވަނީ އޯޕަން ސޯސް އޭއައިއަށް ޚާއްސަ މުޖުތަމައެއް އުފެއްދުމަށް ހުށަހަޅުއްވާފަ އެވެ.
އަންނަ ހަފުތާގައި އެމެރިކާގެ ރައީސް ޑޮނަލްޑް ޓްރަމްޕް، ޗައިނާގެ ރައީސް ޝީ ޖިންޕިންއާ ވައިޓް ހައުސްގައި ބައްދަލުކުރެއްވުމަށް ތައްޔާރުވަމުންދާއިރު، އެ ބައްދަލުވުމުގެ އެޖެންޑާގައި އޭއައިގެ މައުލޫއު ހިމެނުމަށް ދެ ގައުމުން މަސައްކަތް ކުރަމުންދާ ކަމަށް ސައުތު ޗައިނާ މޯނިން ޕޯސްޓުން ރިޕޯޓްކުރެ އެވެ.
