ދުނިޔޭގަ ބާއްވާ އެންމެ ބޮޑު ރޮބޮޓިކްސް ކޮންޕެޓިޝަންގައި ރާއްޖެ ބައިވެރިވަނީ!

ރިޕަބްލިކް އޮފް ކޮރެޔާގެ އިންޗިއޮންގައި 2026 އޮކްޓޫބަރު 7 އިން 10 އަށް ބޭއްވުމަށް ހަމަޖެހިފައިވާ "ފަސްޓް ގްލޯބަލް ޗެލެންޖް 2026" ގައި ދިވެހިރާއްޖެ ތަމްސީލުކުރުމަށް ޓީމް މޯލްޑިވްސް ދަނީ ތައްޔާރުވަމުންނެވެ.

މި ބައިނަލްއަގުވާމީ ރޮބޯޓިކްސް މުބާރާތުގައި 2023 ވަނަ އަހަރުން ފެށިގެން ދިވެހިރާއްޖެ ތަމްސީލުކުރަމުންދަނީ، ފަރސްޓް ގްލޯބަލްގެ ރާއްޖޭގެ އޮފިޝަލް ޕާޓްނަރު، ވުމަން އިން ޓެކް މޯލްޑިވްސް ގެ އިސްނެގުމުގެ ދަށުންނެވެ. އެ ޖަމްއިއްޔާގެ އިސްނެގުމާއި މަސައްކަތުން، ދުނިޔޭގެ އެކި ކަންކޮޅުތަކުން ބައިވެރިވާ ގައުމުތަކާއެކު ދިވެހިރާއްޖޭގެއިންވެސް ދަނީ ބައިވެރިވަމުންނެވެ.

މިއަހަރުގެ ގައުމީ ޓީމަށް ތަމްރީނު ފޯރުކޮށްދެނީ ރޮބޯޓިކްސް އާއި ޓެކްނޮލޮޖީގެ ދާއިރާއިން ޒުވާނުން ބާރުވެރިކުރުމަށް މަސައްކަތްކުރާ ސްޓެމް ސަރޓިފައިޑް އިންސްޓިޓިއުޓެއް ކަމަށްވާ ފޯރލޫޕް ކޯޑިންގ އެކަޑަމީ (ForLoop Coding Academy) އިންނެވެ.

މި ޓީމުގައި ބައިވެރިވާ 10 ދަރިވަރުންނަކީ ރާއްޖޭގެ އެކި ސަރުކާރު އަދި އަމިއްލަ ސްކޫލްތަކުގައި ތައުލީމު ހާސިލުކުރަމުންދާ ދަރިވަރުންނެވެ. މި ދަރިވަރުންނަށް ހާއްސަ ފަންނީ ތަމްރީނުތައް ފޯރުކޮށްދެނީ ފޯރލޫޕް ކޯޑިން އެކަޑަމީއިންނެވެ. މިއީ ވޭތުވެދިޔަ އަހަރު ރާއްޖޭގެ ޓީމުން ހޯދި ކާމިޔާބީގެ މައްޗަށް ބިނާކޮށް ކުރެވޭ މަސައްކަތެކެވެ. އެގޮތުން، ޕެނަމާގައި ބޭއްވުނު ފަރސްޓް ގްލޯބަލް ޗެލެންޖުގައި 190 އަށްވުރެ ގިނަ ގައުމުތަކުގެ ތެރެއިން ދުނިޔޭގެ ގަދަ 55 ގައުމުގެ ތެރޭގައި ދިވެހިރާއްޖެ ވަނީ ހިމެނިފަ އެވެ.

ބައިނަލްއަގުވާމީ އެހީތެރިކަމުގެ އިތުރުން، ދިވެހިރާއްޖޭގެ އެކި ކުންފުނިތަކާއި ޖަމްއިއްޔާތަކުންވެސް އަންނަނީ މި ދަތުރުގައި އެހީތެރިކަން ފޯރުކޮށްދެމުންނެވެ. އެގޮތުން 2026 ވަނަ އަހަރުގެ މުބާރާތުގައި ޓީމް މޯލްޑިވްސްގެ މެއިން ސްޕޮންސަރަކީ އެމް.ޑަބްލިއު.އެސް.ސީ (MWSC) އެވެ. އަދި ވިޒިޓް މޯލްޑިވްސް، އައިލެންޑް އާޓް އަދި އެލައިޑް އިންޝުއަރެންސްގެ ފަރާތުން އެހީތެރިކަން ވަނީލިބިފަ އެވެ.

2026 ވަނަ އަހަރުގެ ޓީމު މެންބަރުން:

ކޮރެއާއަށް ދަތުރުކޮށް މުބާރާތުގައި ވާދަކުރާޓީމް

• ޔޫނުސް މުޙައްމަދު އަޙްމަދު

• އާއިޝަތު އީޝަލް އިސްމާޢީލް

• ޒައިދާން މުހައްމަދު ޒަމީރު

• އާއިޝަތު ބިންތި ތަލްހަތު އަހުމަދު

• މާހިލް މުހައްމަދު ސިނާން އަލީ

ހޯމް ޓީމް:

• ނޫރީން އަޝާ މުހައްމަދު

• އާމިނަތު ޝާޔާން ސާލިހު

• ހައްވާ ޔުޒުކާ ޔޫސުފު

• އައްމާރު ބިން ޒުބައިރު

• ޔޫސުފް ޔުއާން އަހުމަދު

އިންޗިއޮންގައި ބާއްވާ މި މުބާރާތުގައި ޓީމުން ވާދަކުރާނީ "Igniting Innovation"  މައުޟޫޢުގެ ދަށުންނެވެ. މި މައުލޫގެ ދަށުން ދަރިވަރުން ރޮބޯޓިކްސް، އީޖާދީ ވިސްނުން އަދި އިންޖީނިއަރިންގ ބޭނުންކޮށްގެން، ވާދަކުރާނީ ކާރިސާތަކާއި އަލިފާނުގެ ހާދިސާތަކުން ރައްކާތެރިވުމާއި، އެފަދަ ހާދިސާތަކުން އަރައިގަތުމަށް ބޭނުންވާ ހައްލުތައް ހޯދުމުގެ ދާއިރާއިންނެވެ.

މި މުބާރާތުގެ މުހިންމުކަމާ ގުޅޭގޮތުން ފޯރލޫޕް ކޯޑިންގ އެކަޑަމީގެ ސީއީއޯ ރިޔާޟް ބުނެފައިވަނީ

"ފަރސްޓް ގްލޯބަލް ޗެލެންޖުގައި ބައިވެރިވުމަކީ ދިވެހިރާއްޖެއަށްލިބޭ ވަރަށް ޚާއްޞަ އަދި މުހިންމު ފުރުސަތެކެވެ. ޒުވާނުންނަށް މިފަދަމުހިންމު ފުރުސަތެއް ހޯދައިދިނުމުގައި ވުމަން އިން ޓެކް މޯލްޑިވްސްއިން ކުރައްވާ މަސައްކަތަށް ނުހަނު އިހްލާސްތެރިކަމާއެކު ޝުކުރު ދަންނަވަމެވެ. މި ހަރަކާތުގެ ސަބަބުން STEM ތައުލީމުގެ ފުރުސަތުތައް ފުޅާވެ ގުޅިގެން މަސައްކަތްކުރުން އަދި މައްސަލަތައް ހައްލުކުރުމުގެ އަމަލީ ހުނަރުތައް ދަރިވަރުންނަށް ދަސްވެގެންދެއެވެ. މިއީ ދުނިޔޭގެ ކުރިއަރާފައިވާ ޤައުމުތަކާ އެއްފަދައިން ކުދި ޖަޒީރާ ގައުމުތަކުގެ ޒުވާނުންނަށްވެސް ތިމާވެށި ރައްކާތެރިކުރުމާއި ދެމެހެއްޓެނިވި ތަރައްގީފަދަ ދުނިޔޭގެ ބޮޑެތި ގޮންޖެހުންތަކަށް އީޖާދީ ހައްލުތައް ހުށަހެޅިދާނެކަން ސާބިތުކޮށްދޭ ކަމެކެވެ."

ޓީމު ރާއްޖެއިން ފުރުމަށް ހަމަޖެހިފައިވަނީ މިމަހު 4 ވަނަދުވަހުއެވެ. ޓީމުން އެންމެ ފަހުގެ ތައްޔާރީތައް ކުރިއަށްދާއިރު، ޓީމް މޯލްޑިވްސް އޮތީ އިންޗިއޮންގައި ދިވެހިރާއްޖޭގެ ފަހުރުވެރި ދިދަ އުފުލާލައި، ރޮބޯޓިކްސް އަދި އީޖާދީ ދާއިރާތަކުން ކުރިއަށްދިއުމަށް އިތުރު ދިވެހި ޒުވާނުންނަށް ހިތްވަރު ދިނުމަށް މިޓީމުއޮތީ ތައްޔާރަށެވެ.