ޑރ. އަޒްމިރާލްދާ ޒާހިރު އާއި މަހާޒް އަލީ ޒާހިރު ސުޕްރީމް ކޯޓުގެ ފަނޑިޔާރުކަމުން ވަކި ކުރުމަށް ނިންމައި ޖުޑީޝަލް ސާވިސް ކޮމިޝަނުން ފޮނުވި ރިޕޯޓު ދިރާސާކުރުމަށް މިއަދު ތާވަލުކުރި ރައްޔިތުންގެ މަޖިލީހުގެ ޖުޑީޝަރީ ކޮމިޓީގެ ބައްދަލުވުން ކެންސަލްކޮށްފި އެވެ.
ކޮމިޓީގެ ބައްދަލުވުން ފުރަތަމަ ތާވަލުކުރީ މިއަދު ހެދުނު 11:00 އަށެވެ. ފަހުން އެ ބައްދަލުވުން ބާއްވާ ގަޑި މެންދުރު 1:00 އަށް ބަދަލުކުރި އެވެ. ކޮމިޓީ ބައްދަލުވުން ކެންސަލްކުރިކަމަށް މަޖިލީހުގެ މީޑިއާ ޓީމުން ބުނީ 12:59 ގަ އެވެ.
މިކަމާ ގުޅިގެން ޖުޑީޝަރީ ކޮމިޓީގައި އިންނަވާ މަޖިލީހުގެ މައިނޯރިޓީ ލީޑަރު އިބްރާހިމް ނާޒިލް އަދަދު ނޫހާ ވާހަކަދައްކަވަމުން ވިދާޅުވީ، ބައްދަލުވުން ކެންސަލްކުރި ސަބަބެއް މަޖިލީހުގެ އިދާރާއިން ނާންގާ ކަމަށެވެ.
"އާންމުކޮށް މަޖިލިސް ބިޒީ ދުވަސް ދުވަހު ބައެއް ފަހަރު ގަޑި ބަދަލުވޭ. ނަމަވެސް މިއަދަކީ މަޖިލީހުގެ ތަޅުމުގަ އެގޮތަށް މަސައްކަތް އޮވެގެން ބިޒީ ވެގެންދިޔަ ދުވަހެއް ނޫން. 11:00 އާ ހަމައަށް ދިޔައިރު ތަޅުމުގައި ކުރަމުންދިޔަ މަސައްކަތް ނިމިއްޖެ،" ނާޒިލް ވިދާޅުވި އެވެ.
މިކަމުން ދޭހަވަނީ ޖޭއެސްސީން މި މައްސަލަ ބެލުމުގައި ގޯސްތަކެއް ހަދާފައިވާކަން ކަމަށް އިދިކޮޅު އެމްޑީޕީއަށް ނިސްބަތްވާ ކެންދޫ ދާއިރާގެ މެންބަރު މައުރޫފު ޒާކިރު ވެސް ވަނީ އެކްސްގައި ޕޯސްޓުކުރައްވާފަ އެވެ. އޭނާއަކީ ވެސް ޖުޑީޝަރީ ކޮމިޓީގެ މެންބަރެކެވެ.
ދެ ފަނޑިޔާރުން ވަކިކުރަން ފެންނަ ކަމަށް ޖޭއެސްސީން ނިންމީ އާދިއްތަ ދުވަހެވެ. އެ މައްސަލަ މަޖިލީހަށް ހުށަހެޅުމުން ކޮމިޓީއަށް ފޮނުވީ އިއްޔެ އެވެ. ކޮމިޓީން ބޭއްވި ފުރަތަމަ ބައްދަލުވުމުގައި ނިންމީ ޖޭއެސްސީން ފޮނުވި ރިޕޯޓާއި ލިޔެކިޔުންތައް ދިރާސާ ކުރުމަށް ފަހު އެ މައްސަލައިގެ ކޮމިޓީ މަރުހަލާ ކުރިއަށް ގެންދާނެ ގޮތެއް ނިންމުމަށެވެ.
ފަނޑިޔާރު މަހާޒް އަދި އަޒްމިރަލްދާ ވަނީ ތަހުގީގު ކުރިއަށް ގެންގޮސްފައިވަނީ ބޭއިންސާފުން ކަމަށް ވިދާޅުވެ ހަގީގަތް ހާމަ ކުރެއްވުމުގެ ފުރުސަތައް އެދިފަ އެވެ. ފަނޑިޔާރުންނަށް ފުރުސަތު ދިނުމާމެދު ކޮމިޓީން މިހާތަނަށް ގޮތެއް ނުނިންމަ އެވެ.
މަހާޒް އާއި އަޒްމިރާލްދާގެ މައްޗަށް ތުހުމަތު ކުރީ އަޒްމިރާލްދާގެ ފިރިކަލުން ކްރިމިނަލް ކޯޓުން ދޫކޮށްލުމުގައި އެ ކޯޓުގެ ފަނޑިޔާރުންނަށް ނުފޫޒުފޯރުވި ކަމަށެވެ. ނަމަވެސް މައްސަލަ ބަލަން ފެށިއިރު ކުރި ތުހުމަތާއި، ޖޭއެސްސީގެ ކޮމިޓީން މައްސަލަ ބަލައި ނިމުނުއިރު އޮތް ތުހުމަތު ބަދަލުވެފައިވާ ކަމަށް އެ ދެ ފަނޑިޔާރުންގެ ވަކީލުން ވަނީ މައުލޫމާތު ދީފަ އެވެ.
އެ ގޮތުން އަޒްމިރާލްދާގެ މައްސަލަ ބަލަމުންދާ ކަމަށް ޖޭއެސްސީން ފޮނުވި ސިޓީގައި އޮތީ އެ ކޮމިޝަނުން ބަލަމުން ދަނީ، އޭނާގެ ފިރިކަލުން މައްސަލައެއްގައި ހައްޔަރުކޮށް ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން އެ ކޯޓުގެ ފަނޑިޔާރުންނަށް އަޒްމިރާލްދާ ފޯނުން ގުޅުއްވައި ނުފޫޒު ފޯރުވި މައްސަލަ ކަމަށެވެ.
ނަމަވެސް މި މައްސަލައިގައި ޖޭއެސްސީގެ ކުޑަ ކޮމިޓީން ތައްޔާރުކުރި ރިޕޯޓުގައި އޮތީ، އަޒްމިރާލްދާ ފަނޑިޔާރުކަމުން ވަކި ކުރަން ފެންނަނީ ސުޕްރީމް ކޯޓުގެ ފަނޑިޔާރު، މަހާޒު އަލީ ޒާހިރު މެދުވެރިކޮށް ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވި މައްސަލައިގައި ކަމަށެވެ.
އޭގެ އިތުރުން މި މައްސަލައިގައި، ދެ ފަނޑިޔާރުންގެ ފަރާތުން ހުށަހެޅި އެއްވެސް ހެއްކެއް ބަލައި ނުގަތުމަށް ވެސް ޖޭއެސްސީގެ ކޮމިޓީން ވަނީ ނިންމާފަ އެވެ. ދިފާއުގައި ފަނޑިޔާރުން ހުށަހެޅި އެއްވެސް ހެއްކެއް ބަލައި ނުގަތުމަށް އެ ކޮމިޓީން ނިންމި ސަބަބެއް ކަމަށް ބުނީ، އެ ހެކި ހުށަހެޅިޔަސް މައްސަލައިގައި ނިންމާފައިވާ ގޮތަށް ބަދަލެއް ނާންނާނެ ކަމަށް ބުނެ އެވެ.
އެ މައްސަލައިގެ އިތުރުން ހައި ކޯޓުގެ ކުރީގެ ރަޖިސްޓްރާ ހުސެއިން މުހައްމަދު ހަނީފު ސުޕްރީމް ކޯޓަށް ހާޒިރުކޮށް އެ ކޯޓުގެ ކުރީގެ ފަނޑިޔާރު ހުސްނުއްސުއޫދު އޭނާއާ ހުތުރުބަހުން ވާހަކަދެއްކެވިއިރު ފަނޑިޔާރު މަހާޒް އާއި އަޒްމިރަލްދާ ތިއްބެވި ކަމަށް ބުނާ މައްސަލައެއް ވެސް ޖޭއެސްސީން ސުލޫކީ މައްސަލައެއްގެ ގޮތުގައި ތަހުގީގު ކުރި އެވެ.
