މެންޗެސްޓާ (މެއި 6) - މެންޗެސްޓާ ޔުނައިޓެޑަށް ގެންނަ ބަދަލުތަކުގެ ތެރެއިން ފަސް ކުޅުންތެރިން ފިޔަވައި މި ވަގުތު ސްކޮޑުގައި ތިބި ބާކީ ހުރިހާ ކުޅުންތެރިންނަކީ ވެސް ވިއްކާ ކުޅުންތެރިންގެ ގޮތުގައި ޔުނައިޓެޑުގެ މެނޭޖްމަންޓުން ކަނޑައަޅާފައިވާ ކަމަށް ރިޕޯޓްތައް ބުނެފި އެވެ.
އިނގިރޭސި މަހުޖަނު، ޖިމް ރެޓްކްލިފްގެ އިނިއޯސް ކުުންފުނިން، މެންޗެސްޓާ ޔުނައިޓެޑްގެ ޓީމަށް ގެންނަ ބަދަލުތަކުގެ ތެރެއިން، ވިއްކާނުލާނެ ކުޅުންތެރިންގެ ގޮތުގައި ކަނޑައަޅާފައިވަނީ، ބްރޫނޯ ފެނާންޑޭސް، އަމަދު ޑިއާލޯ، ހެރީ މެގުއާ، ނުޒައިރު މަސްރައޮއީ އަދި ޕެޓްރިކް ޑޯގޫ އެވެ.
މީގެ ތެރެއިން، ޑޯގޫ އަކީ، ޔުނައިޓެޑްގެ ކޯޗުކަމާ ރުބެން އަމޮރިމް ހަވާލުވި ފަހުން، 35 މިލިއަން ޑޮލަރު ޖުމްލަ އެކު ދައްކާ ގޮތަށް ޖެނުއަރީ މަހުގެ ޓްރާންސްފާގައި ލެއްޗޭ އިން ގަތް ކުޅުންތެރިއެކެވެ.
ރިޕޯޓްތައް ބުނާގޮތުގައި، ކުރިއަށް އޮތް ދެ ޓްރާންސްފާ މާކެޓްގެ ތެރޭގައި ޔުނައިޓެޑަށް ގިނަ ބަދަލުތަކެއް އަންނާނެ އެވެ. އެ ގޮތުން، އެ ޓީމުގައި ބޮޑު މުސާރަ ލިބޭ ގޮތަށް ޓީމަށް ބޭނުންނުހިފޭ، މުސްތަގުބަލެއް ނެތް ގިނަ ކުޅުންތެރިންތަކެއް ދޫކޮށްލަން ވަނީ މެެނޭޖްމަންޓުގެ އިއްތިފާގުން ނިންމައިފަ އެެވެ. އެ ގޮތުން، އެ ކުޅުންތެރިން ގަތް އަގު އަނބުރާ ނުލިބުނު ކަމުގައި ވިޔަސް ބައެއް ކުޅުންތެރިން ދޫކޮށްލުމަކީ ޔުނައިޓެޑްގެ ވިސްނުމެވެ.
އޭގެ ތެރޭގައި، ގޯލްކީޕަރު އަންދްރޭ އޮނާނާ، މިޑްފީލްޑަރުން ކަމަށްވާ، ކަސެމީރޯ، މެނުއަލް އުގާޓޭ، ކްރިސްޓިއަން އެރިކްސަން ފަދަ ކުޅުންތެރިން ހިމެނެ އެވެ. ޔުނައިޓެޑްގެ އުންމީދީ ކުޅުންތެރިޔާ، ކޯބީ މައިނޫ ވެސް ބޮޑު މުސާރަ އަށް ޑިމާންޑް ކުރާތީ، މެނޭޖްމަންޓުގެ ވިސްނުމަކީ، އޭނާ އަށް ކްލަބުން ދޭ ކޮންޓްރެކްޓަށް ނުރުހޭނަމަ ވިއްކާލުމަށް ކަމަށް ރިޕޯޓްތައް ބުނެ އެވެ.
މީގެ އިތުރުން، ޔުނައިޓެޑްގެ އާޖެންޓީނާ ފޯވާޑް، އަލެހަންދްރޯ ގާނާޗޯ ހޯދަން 65 މިލިއަން ޑޮލަރަށް ވުރެ ބޮޑު ބިޑެއް ލިބިއްޖެނަމަ، އޭނާ ވެސް ދޫކޮށްލަން ޔުނައިޓެޑުން އޮތީ ތައްޔާރަށެވެ.
ޕްރިމިއާ ލީގުގެ 15 ވަނައިގައި މި ވަގުތު އޮތް ޔުނައިޓެޑުން ޔޫރޮޕާ ލީގުގެ ސެމީ ފައިނަލުގައި ވެސް އަންނަނީ ވާދަކުރަމުންނެވެ.
