މެއި ޑޭ އަކީ މަސައްކަތްތެރިންގެ ހައްގުތައް ހަނިކުރުމަށް ސަރުކާރުން ކުރަމުންދާ މަސައްކަތާ ދެކޮޅަށް ތެދުވުމަށް އަޒުމު ކަނޑައަޅަން ލިބޭ ފުރުސަތެއް ކަމަށް އެމްޑީޕީގެ ޗެއާޕާސަން، ފައްޔާޒް އިސްމާއިލް ވިދާޅުވެއްޖެ އެވެ.
ހުރިހާ މަސައްކަތްތެރިންނަށް މެއި ޑޭ ގެ ތަހުނިޔާ ވިދާޅުވެ، އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ މަސައްކަތްތެރިންގެ ހައްގުތައް ހޯދުމަށް ކުރީގައި އޮތް ނުރައްކާތެރި މާހައުލުގެ ތެރެއިން ކުރެވުނު މަސައްކަތްތައް މިއަދު ހަނދާން ކުރަންޖެހޭ ކަމަށެވެ. އަދި މަސައްކަތްތެރިންގެ ހައްގުތައް ކަށަވަރު ކުރުމުގެ މަސައްކަތުގެ ތެރެއިން ރާއްޖެއިން ހޯދާފައިވާ ކާމިޔާބުތައް ވެސް މިއަދު ހަނދާން އައު ކުރަންޖެހޭ ކަމަށް އޭނާ ވިދާޅުވި އެވެ.
"[މެއި ޑޭ އަކީ މަސައްކަތްތެރިންގެ] އެ ހައްގުތައް ސަރުކާރު އިސްވެ ހަނިކުރަމުންދާ ދަނޑިވަޅެއްގައި، އެ ބޭއިންސާފު އަމަލުތަކާ ދެކޮޅަށް ހިތްވަރާއެކު މަސައްކަތް ކުރުމުގެ އަޒުމު ކަނޑައަޅަން ލިބޭ މުހިންމު ފުރުސަތެއް،" ފައްޔާޒް ވިދާޅުވި އެވެ.
އެމްޑީޕީ އަކީ މަސައްކަތްތެރިންގެ ވާހަކަދައްކައި އެ ހައްގުތައް ހޯދައިދިނުމަށް ފުޅާ ދާއިރާއެއްގައި މަސައްކަތް ކޮށްފައިވާ ޕާޓީއެއް ކަމަށް ފައްޔާޒް ވިދާޅުވި އެވެ. އަދި އެ ޕާޓީން އަބަދުވެސް މަސައްކަތް ކުރާނީ މަސައްކަތްތެރިންނަށް ހައްގުވާ މިންވަރު ހޯދައިދީ ވަރުގަދަ އިގުތިސާދެއް ބިނާ ކުރަން ކަމަށް އޭނާ ވިދާޅުވި އެވެ.
ކޮންމެ އަހަރެއްގެ ވެސް މެއި 1، އަކީ ބައިނަލްއަގުވާމީ ފެންވަރުގައި ފާހަގަ ކުރާ މަސައްކަތްތެެރިންގެ ދުވަހެވެ. މި ދުވަހާ ގުޅުވައި އެކި ދާއިރާތަކުގައި މަސައްކަތް ކުރާ މަސައްކަތްތެރިން އެމީހުންގެ ހައްގުތައް ހޯދުމަށް ދުނިޔޭގެ އެކި ކަންކޮޅުގައި އަޑު އުފުލަ އެވެ.
އެގޮތުން މާލޭގައި ވެސް މިއަދު މަސައްކަތްތެެރިންގެ ޔޫނިއަންތަކުން ހާއްސަ ހަރަކާތެއް ހިންގުމަށް ދަނީ ތައްޔާރުވަމުންނެވެ.
