ރައްޔިތުންގެ މަޖިލީހުގެ ހިތަދޫ އުތުރު ދާއިރާއަށް މެންބަރަކު ހޮވަން މިއަދު ބޭއްވި ބައި-އިލެކްޝަން ބޮޑު ތަފާތަކުން އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ކެންޑިޑޭޓު އަބްދުﷲ ސޯދިގު (ސޯބެ) ކާމިޔާބު ކުރައްވައިފި އެވެ.
އިންތިހާބުގެ ވަގުތީ ނަތީޖާއިން ދައްކާ ގޮތުގައި ސޯބެ ވަނީ 51 ޕަސެންޓު ވޯޓު ހޯއްދަވައިފަ އެވެ. އެއީ 1375 ވޯޓެވެ. ސޯބެއާ ވާދަ ކުރެއްވީ ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓު އަހުމަދު ސައީދު (ސޮޑާ) އަށް ލިބިވަޑައިގަތީ 48 ޕަސެންޓު ވޯޓެވެ. އެއީ ޖުމްލަ 1313 ވޯޓެވެ.
އެހެންކަމުން ހިތަދޫ އުތުރު ދާއިރާގެ އިންތިހާބުން ސޯބެއަށް ކާމިޔާބު ލިބިވަޑައިގަތީ 62 ވޯޓުގެ ތަފާތަކުންނެވެ.
މިއަދުގެ އިންތިހާބުގައި ވޯޓު ދިނުމުގެ ހައްގު ލިބޭ 4121 މީހުންގެ ތެރެއިން 66.2 ޕަސެންޓު މީހުން ވަނީ ވޯޓު ލައިފަ އެވެ. އެއީ 2730 މީހުންނެވެ.
އިދިކޮޅު އެމްޑީޕީގެ ކެންޑިޑޭޓ ސޯބެ މި އިންތިހާބު ކާމިޔާބު ކުރެއްވުމުން އެ ޕާޓީގެ މަޖިލިސް މެންބަރުންގެ އަދަދު 12 އިން 13 އަށް އިތުރުވީ އެވެ. އަދި ޕީއެންސީގެ މެންބަރުންގެ އަދަދު 75 އިން 74 އަށް ވެއްޓުނީ އެވެ.
މިއީ ވެރިކަން ހިންގާ ޕާޓީއަށް ވިދިވިދިގެން ލިބުނު ތިން ވަނަ ބައްޔެވެ. މިދިޔަ އޭޕްރީލް މަހު ބޭއްވި ލޯކަލް ކައުންސިލްތަކުގެ އިންތިހާބާއި ފެންނަ ނުފެންނަ ވޯޓުން ވެސް ސަރުކާރަށް ވަނީ ބޮޑު ނާކާމިޔާބީއެއް ލިބިފަ އެވެ.
ލޯކަލް ކައުންސިލްތަކުގެ އިންތިހާބުގައި ގިނަ ކައުންސިލްތަކުގެ މެޖޯރިޓީ ހޯދީ އެމްޑީޕީއިންނެވެ. އަދި ރާއްޖޭގެ ފަސް ސިޓީގެ މޭޔަރުގެ މަގާމާއި ސިޓީތަކުގެ މެޖޯރިޓީ ވެސް ކާމިޔާބު ކުރީ އެމްޑީޕީއިންނެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އިންތިހާބު އެއްކޮށްލަން ފެނޭތޯ ބަލަން ނެގި ވޯޓުގައި 75 ޕަސެންޓު މީހުން ބުނެފައި ވަނީ ދެ އިންތިހާބު އެއްކޮށްލަން ނުފެންނަ ކަމަށެވެ. ސަރުކާރާއި ރައީސް މުހައްމަދު މުއިއްޒު ވަކާލާތު ކުރެއްވީ ދެ އިންތިހާބު އެއްކޮށްލުމަށެވެ.
މީގެ ކުރިން 2024 ވަނަ އަހަރު ބޭއްވި މަޖިލިސް އިންތިހާބުގައި ހިތަދޫ އުތުރު ދާއިރާގެ ގޮނޑި ސިނާނު ކާމިޔާބު ކުރެއްވީ 1079 ވޯޓާއެކު 39 ޕަސެންޓު ވޯޓާއެކު އެވެ. އެންމެ ކައިރިން ވާދަކުރެއްވީ ނަވާރަވަނަ މަޖިލީހުގެ ރައީސް މުހައްމަދު އަސްލަމް އެވެ. އެމްޑީޕީގެ ޓިކެޓުގައި ވާދަކުރެއްވި އަސްލަމްއަށް 838 ވޯޓު ލިބިވަޑައިގަތެވެ. އެފަހަރު އަމިއްލަ ކެންޑިޑޭޓެއްގެ ގޮތުގައި ސައީދު ވާދަކޮށް ލިބުނީ 306 ވޯޓެވެ.
