ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި މިހާތަނަށް ވޯޓުލީ 26 ޕަސެންޓު މީހުން ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަނުން އާންމު ކޮށްފައިވާ ހިސާބުތަކުން ދައްކާގޮތުން މިއަދުގެ މެންދުރު 12:00 އާ ހަމައަށް ވޯޓު ލާފައި ވަނީ 1080 މީހުންނެވެ. އެއީ 529 ފިރިހެނުންނާއި 551 އަންހެނުންނެވެ.
މިއަދުގެ ވޯޓުލުން ފެށުނީ ހެނދުނު 8:00 ގަ އެވެ. ވޯޓު ފޮށިތައް ބަންދުކުރާނީ މިއަދުގެ ހަވީރު 4:00 ގަ އެވެ. ބައި-އިލެކްޝަންގައި ވޯޓު ލުމުގެ ހައްގު ލިބިގެން ވަނީ 3041 މީހުންނަށެވެ.
ހިތަދޫ އުތުރު ދާއިރާގެ ބައި-އިލެކްޝަންގައި ވޯޓުލުމަށް ޖުމުލަ ހަތް ފޮށި ބަހައްޓާފައިވެ އެވެ. އޭގެ ތެރެއިން ދެ ފޮށި ބަހައްޓާފައި ވަނީ މާލޭގެ ދަރުމަވަންތަ ސްކޫލުގަ އެވެ. ބާކީ ފޮށިތައް ބަހައްޓާފައި ވަނީ ހިތަދޫގަ އެވެ.
މިއަދުގެ އިންތިހާބުގައި ވާދަ ކުރައްވަނީ އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ފަރާތުން އަބްދުﷲ ސޯދިގު (ސޯބެ) އާއި ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ފަރާތުން އަހުމަދު ސައީދު (ސޮޑާ) އެވެ.
ހިތަދޫ އުތުރު ދާއިރާގެ ގޮނޑީގައި ކުރިން އިންނެވި މުހައްމަދު ސިނާނުގެ ގޮނޑި ގެއްލުނީ އޭނާގެ ކިބައިން މެންބަރުކަމުގެ ޝަރުތު ގެއްލިފައިވާ ކަމަށް އޭޕްރީލް 12، ގައި ސުޕްރީމް ކޯޓުން ކަނޑައެޅުމުންނެވެ. މެންބަރު ކަމުގެ ޝަރުތު ގެއްލުނީ ސާބިތު ދަރަންޏެއް އޮވެ ހުކުމާ އެއްގޮތަށް ފައިސާ ދައްކަމުން ނުދިޔުމުންނެވެ.
ހުކުމާ އެއްގޮތަށް ސިނާނު ނުދެއްކީ މޯލްޑިވްސް އިސްލާމިކް ބޭންކުން ނަގާފައި އޮތް ފަސް މިލިއަން ރުފިޔާގެ ލޯނެކެވެ. އެ ލޯނު އޭނާ އަދާ ކުރީ އެ މައްސަލަ ސުޕްރީމް ކޯޓަށް ވެއްދުމުނެވެ. އެހެންކަމުން، އޭނާއަށް ވެސް އަލުން މަޖިލިސް މެންބަރުކަމަށް ކުރިމަތިލެވޭނެ އެވެ.
