ޝަރުތު ހަމަވާ ހުރިހާ އެންމެންނަށް މި ފަސް އަހަރު ތެރޭގައި ބޯހިޔާވަހިކަން ފޯރުކޮށްދޭނެ ކަމުގެ ވައުދާއެކު ވެރިކަމަށް އައި ސަރުކާރަށް ދެ އަހަރު ވާން ގާތްވާއިރު، އަދި އެންމެ ފްލެޓެއްގެ ބިންގާ ވެސް ނޭޅޭ ކަމަށް ވިދާޅުވެ ރައީސް މުހައްމަދު މުއިއްޒުގެ އެ ވައުދު ފުއްދޭނެތޯ ވެލިދޫ ދާއިރާގެ މަޖިލިސް މެންބަރު، މުހައްމަދު އައްބާސް މިއަދު ސުވާލު އުފައްދަވައިފި އެވެ.
މަޖިލީހުގެ ޖަލްސާގައި ވާހަކަދައްކަމުން އައްބާސް ވިދާޅުވީ ރައީސް މުއިއްޒު ވެރިކަމަށް ވަޑައިގަތުމުގެ ކުރިން އަދި ވެރިކަމަށް ވަޑައިގަތުމަށް ފަހު ވެސް މި ވެރިކަމުގައި 85،000 އަށްވުރެ ގިނަ ފްލެޓު އަޅުއްވައިދެއްވާނެ ކަމަށް ވައުދުވެޑައިގެންނެވި ކަމަށެވެ. އަދި ދައުރު ނިމޭއިރު ބޯހިޔާވަހިކަމަށް ޖެހިފައިވާ އެއްވެސް މީހަކު ނުހުންނާނެ ކަމަށް ވެސް އެމަނިކުފާނު ވައުދުވެވަޑައިގެންނެވި ކަމަށް އޭނާ ވިދާޅުވި އެވެ.
"އެހެންނަމަވެސް ރައީސް ޑރ. މުހައްމަދު މުއިއްޒުގެ ވެރިކަމަށް ދޮޅު އަހަރު ވެގެންދާއިރު، ދެ އަހަރާ ކައިރި ކުރަމުންދާއިރު، އަދި އެންމެ ފްލެޓެއްގެ ބިންގާ ވެސް އެޅިފައި އިން ކަމަކަށް އަޅުގަނޑަކަށް ނުފެނޭ،" އައްބާސް ވިދާޅުވި އެވެ.
އޭނާ ވިދާޅުވީ ބޯހިޔާވަހިކަމުގެ އެއްވެސް މަޝްރޫއުއެއްގެ އަމަލީ މަސައްކަތް މި ސަރުކާރުން އަދި ނުފަށާއިރު، މިދިޔަ ސަރުކާރުން ދޫކުރި 4000 ފްލެޓު ވެސް މި ސަރުކާރުން އުޅެނީ ސިޔާސީ ކަމަކަށް ހަދައިގެން ކަމަށެވެ.
"އެންމެ ކުޑަވެގެން ނިމިދިޔަ ސަރުކާރުން 4000 ފްލެޓެއްގެ ކަންތައް އެއީ ސިޔާސީ ކަމަކަށް ހަދައިގެން ގޮސް ހައްގުވެެރިންނަށް ނުލިބި، ހައްގު ނޫން މީހުންނަށް ލިބި، މިއަދާ ހަމައަށް ވެސް ލިބެނީ ކޮން ބަޔަކަށް ކަން ނުލިބެނީ ކޮން ބަޔަކަށް ކަން، ލިބެނީ ކޮން ދުވަހެއްގައި ކަން، ނިމެނީ ކޮން ދުވަހެއްގައި ކަން މިއަދާ ހަމައަށް ވެސް އަދި ނޭނގޭ،" އައްބާސް ވިދާޅުވި އެވެ.
"ސުވާލަކީ އެ ވިދާޅުވާ 85،000 ފްލެޓު ރައްޔިތުންނަށް ފެންނާނެތޯ،"
އައްބާސްގެ މި ސުވާލަށް ހައުސިން މިނިސްޓަރު އަބްދުالله މުއްތޮލިބު ޖަވާބެއް ނުދެއްވަ އެވެ. ސަބަބެއް ކަމަށް ވިދާޅުވި މިއަދު ސުވާލުކުރަން ހުށަހެޅުނު ދާއިރާގެ ތެރެއަށް ނުފެތުމެވެ.
ބޯހިޔާވަހިކަމުގެ މައްސަލަ އެއްކޮށް ހައްލު ކޮށްދިނުމަކީ ރައީސް މުއިއްޒުގެ ރިޔާސީ އެންމެ ބޮޑު އެއް ވައުދެވެ. އެގޮތުން ބޯހިޔާވަހިކަމަށް ޖެހިފައި ތިބި ހުރިހާ އެންމެންނަށް މި ވެރިކަމުގައި ބޯހިޔާވަހިކަން ފޯރުކޮށްދެއްވާނެ ކަމަށް ރައީސް ވައުދުވެވަޑައިގެންނެވި އެވެ.
އެކަމަށްޓަކައި ބޯހިޔަވަހިކަަމަށް އެދޭ އަދި ޝަރުތު ފުރިހަމަވާ 18 އަހަރުން މަތީގެ ކޮންމެ ރައްޔިތަކަށް ގޯއްޗެއް ނުވަތަ އެޕާޓްމަންޓެއް ކަށަވަރު ކޮށްދެއްވާނެ ކަމަށް ރައީސް ވަނީ ވިދާޅުވެފަ އެވެ.
އަދި ކުރިއަށް އޮތް 20 އަހަރަށް އަމާޒުކޮށް، 65،000 ގެދޮރު ޔަގީންވާނެގޮތަށް، ގައުމީ ތަރައްގީގެ މައި ތަނބުގެ ގޮތުގައި ގްރޭޓާ މާލޭ ސަރަހައްދު އިތުރަށް ތަރައްގީކުރަން ވައުދުވެ ވަޑައިގެން އެ ގޯތި ތަކުގައި ރައްޔިތު މީހާ ބޭނުންވާ ޑިޒައިނަކަށް، އަދި އުސްމިނަކަށް ދައުލަތުގެ ހަރަދުގައި ގެ އަޅައިދޭނެ ކަމަށް ވެސް ރައީސް ވައުދުވެ ވަޑައިގެންނެވި އެވެ.
