ޗައިނާގެ ބޮޑު އިންޓަނެޓް ކުންފުނި ބައިޑޫއިން އެ ކުންފުނިން އަމިއްލައަށް ތައްޔާރުކޮށްފައިވާ ތިންވަނަ ޖީލުގެ ޕީ800 ކުންލުން ޗިޕްގެ 30،000 ޗިޕް އެކުލެވޭ ކްލަސްޓަރެއް "އިލުމިނޭޓް" ކޮށްފައިވާ ކަމަށާއި، މި ކްލަސްޓަރުން ޑީޕްސީކް ފަދަ މޮޑެލްތައް ތަމްރީނު ކުރެވޭނެ ކަމަށް ބައިޑޫގެ ސީއީއޯ ރޮބިން ލީ ބުނެފިއެވެ.
ބައިޑޫގެ އަހަރީ ޑިވެލޮޕަރ ކޮންފަރެންސްގައި ހުކުރު ދުވަހު ވާހަކަދައްކަމުން ރޮބިން ލީ ބުނި ގޮތުގައި ޕީ800 ކްލަސްޓަރުން ސަތޭކަ ބިލިއަން ޕެރަމީޓަރުގެ ޑީޕްސީކް ފަދަ މޮޑެލްތައް ތަމްރީނު ކުރެވޭނެއެވެ. އަދި އެއްފަހަރާ 1000 ކަސްޓަމަރުންނަށް ބިލިއަނަކަށްވުރެ ގިނަ ޕެރަމީޓަރުގެ މޮޑެލްތައް ފައިން ޓިއުން ކުރެވޭނެއެވެ. ޕީ800 ޗިޕްތައް ޗައިނާގެ ބޭންކުތަކާއި އިންޓަނެޓް ކުންފުނިތަކުން ބޭނުންކުރަން ފަށާފައިވާ ކަމަށްވެސް ބައިޑޫއިން ބުނެފައިވެއެވެ.
މީގެ އިތުރުން ބައިޑޫގެ އެންމެ ފަހުގެ އާޓިފިޝަލް އިންޓެލިޖެންސް މޮޑެލް ކަމަށްވާ އަރނީ 4.5 ޓާބޯ ވެސް ރޮބިން ލީ ވަނީ ތަޢާރަފުކޮށްދީފައެވެ. މި މޮޑެލްގެ ޤާބިލުކަން ވަރަށް މަތި ކަމަށާއި، ކޯޑިންގ އާއި ބަހުގެ ދޭހަ ފަދަ ކަންކަމުގައި އިންޑަސްޓްރީގެ އެންމެ މޮޅު މޮޑެލްތަކާ އެއްހަމައެއްގައި ހުރި ކަމަށް އޭނާ ބުންޏެވެ. އަދި އަރނީ އެކްސް1 ޓާބޯ ނަމަކަށް ކިޔާ އައު ރީޒަނިންގ މޮޑެލްއެއްވެސް ތަޢާރަފުކޮށްދީފައިވެއެވެ.
ބައިޑޫގެ ސީއީއޯ ރޮބިން ލީ ބުނި ގޮތުގައި އާޓިފިޝަލް އިންޓެލިޖެންސްގެ ދުނިޔޭގައި އެންމެ މުހިންމު އެއްޗަކީ އެޕްލިކޭޝަންތަކެވެ. އެފަދަ އެޕްލިކޭޝަންތަކެއް ނެތި މޮޑެލްތަކާއި ޗިޕްތަކަކީ އަގެއް ނެތް އެއްޗެހި ކަމަށް އޭނާ ބުންޏެވެ. އެހެންކަމުން ބައިޑޫގެ އެޕްލިކޭޝަންތަކުގައި އާޓިފިޝަލް އިންޓެލިޖެންސްގެ ޤާބިލުކަން ހިމަނަމުންދާނެ ކަމަށްވެސް އޭނާ ބުންޏެވެ.
ބައިޑޫގެ މި އައު އުފެއްދުން ތަޢާރަފުކޮށްފައި މިވަނީ ޗައިނާގެ އާޓިފިޝަލް އިންޓެލިޖެންސް މާކެޓުގައި ވާދަވެރިކަން އިތުރުވެފައިވާ ދަނޑިވަޅެއްގައެވެ. މިހާރު ޓެކްނޮލޮޖީ ކުންފުނިތަކުން ފައުންޑޭޝަން މޮޑެލްތައް ތަރައްޤީކުރުމުގެ ބަދަލުގައި ފޯކަސް ކުރަމުންދަނީ އޭއައި ޗެޓްބޮޓްތަކުގެ އިތުރުން އެހެން އެޕްލިކޭޝަންތައް ހޯދުމަށެވެ. މިގޮތުން ޔޫޒަރުން ޝައުޤުވެރިކުރުވައި، ހިފެހެއްޓޭނެ އެޕްލިކޭޝަންތަކެއް ހޯދުމަށް މަސައްކަތްކުރަމުންދެއެވެ.
2022ވަނަ އަހަރު އޯޕަންއޭއައިގެ ޗެޓްޖީޕީޓީ ނެރުމާއެކު، އާޓިފިޝަލް އިންޓެލިޖެންސްއަށް ބޮޑެތި އިންވެސްޓްމަންޓްތައް ކުރި ޗައިނާގެ ފުރަތަމަ ބޮޑެތި ކުންފުނިތަކުގެ ތެރޭގައި ބައިޑޫ ހިމެނެއެވެ. ނަމަވެސް، ބައިޑޫގެ އަރނީ ބޮޓަށް ވަނީ އޭއައިގެ ވާދަވެރިކަމުގެ ތެރޭގައި ކުރިއެރުން ހޯދުމަށް ދަތިވެފައެވެ.
