ދުނިޔޭގެ ފުރަތަމަ ހިއުމަނޮއިޑް ހާފް މެރަތަން ރޭހުގައި 21 ރޮބަޓު ވާދަކޮށްފިއެވެ.
ބެއިޖިންގެ އީ-ޓައުން ޓެކްނޮލޮޖީ ސަރަޙައްދުގައި ދުނިޔޭގެ ފުރަތަމަ ހިއުމަނޮއިޑް ހާފް މެރަތަން ރޭސް ބޭއްވިއިރު، މި ރޭހުގައި ރޮބޯޓުންނާއެކު އިންސާނުން ވެސް ބައިވެރިވިއެވެ.
ބްލޫމްބާގް އިން ރިޕޯޓުކުރި ގޮތުގައި، މި ރޭހުގައި އެންމެ ކުރިއަށް ދިޔަ ރޮބަޓަކީ "ތިއަންގޮން އަލްޓްރާ" އެވެ. މި ރޮބަޓު ރޭސް ނިންމީ 2 ގަޑިއިރާއި 40 މިނެޓުންނެވެ. އެހެން ނަމަވެސް އިންސާނުންގެ ތެރެއިން އެންމެ ކުރިއަށް ދިޔަ ފަރާތުން 1 ގަޑިއިރާއި 2 މިނެޓުން މި ރޭސް ނިންމިއެވެ.
ތިއަންގޮން އަލްޓްރާ ރޭސް ކުރިއަށް ގެންދިޔުމަށް އިންސާނެއްގެ އެހީތެރިކަން ބޭނުންވި އެވެ. އެގޮތުން އިންސާނަކު ރޮބަޓުގެ ކުރިން ދުވެ، އޭނާގެ ފަހަތުގައި ހަރުކޮށްފައިވާ ސިގްނަލް ދޭ އާލާތަކުން ރޮބަޓަށް މަގު ދައްކަމުން ދިޔައެވެ. އެހެން ގިނަ ރޮބަޓުތައް ވެސް ކޮންޓްރޯލް ކުރީ އެ ރޮބަޓުތަކުގެ އަރިމަތިން ދުވަމުންދިޔަ އިންސާނުންނެވެ.
ރޭހުގައި ބައިވެރިވި ގިނަ ރޮބަޓުތަކަށް ރޭސް ނިންމުމަށް 3 ގަޑިއިރަށްވުރެ ގިނަ ވަގުތު ނެގިއެވެ. އަދި މީގެ ތެރެއިން 4 ރޮބަޓަކަށް ރޭސް ނިންމުނީ 4 ގަޑިއިރުގެ ތެރޭގައެވެ.
ބައެއް ރޮބަޓުތަކަށް ފެށުމުގެ ރޮނގުން ރޭސް ފަށަންވެސް ދަތިވިއެވެ. މިސާލަކަށް "ޝެންނޮން" ނަމަކަށް ކިޔާ ރޮބަޓު އިންސާނެއްގެ ގައިގައި ޖެހުމުގެ އިތުރުން ފާރެއްގައި ޖެހި ހަލާކުވެގެން ދިޔައެވެ. އަދި "ލިޓްލް ޖަޔަންޓް" ނަމަކަށް ކިޔާ ރޮބަޓުގެ ބޮލުން ދުން އަރަން ފެށުމާއެކު ރޭސް މެދުކަނޑާލަން ޖެހުނެވެ.
މި ރޭހުން ދައްކައިދެނީ އިންސާނުންނާ އަޅާބަލާއިރު ރޮބަޓުތަކުގެ ދުވުމުގެ ގާބިލުކަން އަދިވެސް ވަރަށް ބޮޑަށް ދަށްކަމެވެ. އަދި މި ދާއިރާއިން އިތުރު ކުރިއެރުންތަކެއް ހޯދުމަށް ގިނަ މަސައްކަތްތަކެއް ކުރަން ޖެހޭކަމެވެ.
