ސަރުކާރުން ކްލަބްތަކަށް ދޭން ޖެހޭ ފައިސާ ޔުނައިޓެޑް ވިކްޓްރީ (ޔޫވީ) އަށް މިހާތަނަށް ލިބިފައިނުވާތީ އެ ކްލަބުން ފަރިތަކުރުން ފަށާފައިނުވުމާ އެކު އެ ކްލަބްގެ ކުޅުންތެރިން އެ ކަންބޮޑުވުން ފާޅުކޮށްފި އެވެ.
"އަދަދު ސްޕޯޓްސް" އަށް މައުލޫމާތު ލިބިފައިވާ ގޮތުގައި، ޔުނައިޓެޑް ވިކްޓަރީ އަށް ފައިސާ ނުލިބިވަނީ އެ ކްލަބުން ފުރިހަމަ ކުރަން ޖެހޭ ބައެއް ލިޔެކިޔުންތައް މިހާތަނަށް ވެސް ފުރިހަމަ ކޮށްފައިނުވާތީ އެވެ. އަދި އެ ކްލަބުން އަންނަނީ އެ ލިޔެކިޔުންތައް ފުރިހަމަ ކުރުމަށް ސްޕޯޓްސް ކޮމިޝަނާ އޮފީހާ އެކު މަސައްކަތްތަކެއް ކުރަމުންނެވެ.
"އަދަދު ސްޕޯޓްސް" އާ ވާހަކަ ދެއްކި ޔުނައިޓެޑް ވިކްޓަރީގެ ބައެއް ކުޅުންތެރިން ބުނެފައިވަނީ، ކްލަބުން ފަރިތަކުރުންތައް ފަށާނެ ދުވަހެއް މިހާތަނަށް ވެސް އަންގާފައިނުވާ ކަމަށެވެ. އަދި ފަރިތަކުރުންތަށް އެންމެ އަވަހަށް ފެށޭނީ ވެސް ސަރުކާރުން ދޭން ޖެހޭ ފައިސާ ލިބުމުން ކަމަށް އެ ކްލަބުގެ މެނޭޖުމަންޓުން ކުޅުންތެރިންނަށް އަންގައިފައިވާ ކަމަށް ވެސް އެ ކުޅުންތެރިން ބުނެފައިވެ އެވެ.
"އަސްލު އަހަރެމެން މި ޖެހެނީ މި ސީޒަނުގައި ކުޅެވޭނެ ކަމުގެ ޔަގީންކަން ވެސް ނެތި. އެހެން ހުރިހާ ކްލަބަކުން އެބަ (ޕްރީ ސީޒަން) ޕްރެކްޓިސް މިހާރު ކުރޭ. އެހެންވެ، އެންމެ ފަހުން ވެސް އެކަމުގެ ވާހަކަ ކްލަބް މެނޭޖްމަންޓާ ދެއްކީމަ މި ބުނަނީ ޕްރެކްޓިސް ފެށޭނެ ދުވަހެއް އަދި ބުނަން ނޭނގެއޭ. ދެން ރިލީޒް ދޭން ބުނީމަ އެކަން ވެސް ކޮށްނުދޭ." ޝުއޫރު ފާޅުކުރި ޔުނައިޓެޑް ވިކްޓަރީގެ ކުޅުންތެރިޔަކު "އަދަދު ސްޕޯޓްސް" އަށް ބުންޏެވެ.
ސަރުކާރުން ދޭން ޖެހޭ ފައިސާ ޔުނައިޓެޑް ވިކްޓަރީ އަށް ލިބިފައިނުވަނީ އެ ކްލަބް އިން ކޮމިޝަނާ އޮފް ސްޕޯޓްސްގައި ރަޖިސްޓްރީވުމުގައި ފުރިހަމަކުރަން ޖެހޭ ލިޔެކިޔުންތައް ބަރާބަރަށް ފުރިހަމަ ކޮށްފައިނުވާތީ އެވެ.
ސަރުކާރުން ފުރަތަމަ ޑިވިޝަނުގެ 10 ކްލަބްގެ ތެރެއިން ނުވަ ކްލަބަށް މިހާތަނަށް ފައިސާ ދީފައިވެ އެވެ. އޭގެ ތެރެއިން، ކްލަބް ގްރީން ސްޓްރީޓްސް އަށް މިހާތަނަށް ދީފައިވަނީ އެއް ޕޭމަންޓެވެ.
ގްރީން ސްޓްރީޓްސް އަށް ވެސް ފައިސާ ލިބުން ލަސްވީ އެ ކްލަބުން އޭރު ފުރިހަމަ ކުރަން ޖެހޭ ބައެއް ލިޔެކިޔުން ފުރިހަމަ ކޮށްފައިނުވާތީ އެވެ. އެކަމަކު، ގްރީން ސްޓްރީޓްސް އިން ލިޔެކިޔުންތައް ފުރިހަމަ ކުރުމާއެކު ފުރަތަމަ ޕޭމާންޓް (5 ލައްކަ ރުފިޔާ) ވަނީ ޖަމާކޮށްފަ އެވެ. އަދި ދެ ވަނަ ޕޭމަންޓް އަންނަ ހަފުތާތެރޭގައި ޖަމާވާނެ ކަމަށް މައުލޫމާތު ލިބެ އެވެ. އެ ކްލަބުން ވެސް މިހާރު ވަނީ ޕްރީ ސީޒަން ފަށައިފަ އެވެ.
މިދިޔަ ޖެނުއަރީ މަހުގެ ތެރޭގައި، ސިވިލް ކޯޓުން ވަނީ ޔުނައިޓެޑް ވިކްޓަރީގެ މައްޗަށް 30،000 ރުފިޔާ ދައްކަން ހުކުމެއް ކޮށްފަ އެވެ.
ސިވިލް ކޯޓުން ޖެނުއަރީ މަހު ނުވަ ވަނަ ދުވަހު، ޔުނައިޓެޑް ވިކްޓަރީގެ މައްޗަށް މި ފައިސާ ދެއްކުމަށް ހުކުމްކޮށްފައިވަނީ، ޔުނައިޓެޑް ވިކްޓަރީން ބިދޭސީ ކުޅުންތެރިން ބިޒްނަސް ވިސާގައި ރާއްޖެ އަށް ގެނައުމަށް ފަހު، ވިސާގެ މުއްދަތު ހަމަވުމުގެ ކުރިން، އެ އާ ކުރަން ހުށަހަޅާފައިނުވާތީ އެވެ. އަދި މި ދައުވާގައި، އެ ބިދޭސީ ކުޅުންތެރިން، ފުރުވާލުމުގައި ވެސް އެންމެ ރަނގަޅަށް ޔުނައިޓެޑް ވިކްޓަރީން އަމަލުކޮށްފައިނުވާކަން ހުށަހަޅާފައި އޮތް ލިޔުންތަކުން އެނގޭ ކަމަށް ކޯޓުން ވަނީ ބުނެފަ އެވެ.
އެ ގޮތުން، ކޯޓުން ޔުނައިޓެޑް ވިކްޓަރީގެ ގައިރުހާޒިރުގައި ހުކުމްކޮށްފައިވަނީ، މި މަހު ނުވަ ވަނަ ދުވަހުން ފެށިގެން ހަތް ދުވަސް ތެރޭ އިމިގްރޭޝަނަށް 30،000 ރުފިޔާ ދެެއްކުމަށެވެ.
ޔުނައިޓެޑް ވިކްޓަރީ (ޔޫވީ) އަށް ކުޅުނު ސާބިއާގެ މިލޯސް ކޮވަސިޗް އާއި ބެލަރޫސްގެ އިވާން ވެރާސް އަށް އެ ކްލަބުން ދޭން ޖެހޭ މުސާރަ އާއި ފައިސާގެ އެހެނިހެން ކަންކަން ހަމަޖައްސައިނުދޭތީ 2022 ވަނަ އަހަރުގެ އޮކްޓޫބަރު މަހު ގަލޮޅު ދަނޑުގެ ރޮސްޓްރަމްގައި ހަޅުތާލެއްކޮށްފަ އެވެ. އެކަމާ ގުޅޭގޮތުން ފަހުން، މިލޯސް ބުނީ ހަޅުތާލު ހުއްޓާލީ އެފްއޭއެމް އިން ޔުނައިޓެޑް ވިކްޓަރީއާ ވާހަކަދައްކައިގެން ކަންކަން ހައްލުކުރާނެ ކަމުގެ ޔަގީންކަން ދިނުމުން ކަމަށެވެ.
