ކުރިއަށް އޮތް އީދު ބަންދާ ދިމާކޮށް އެތެރޭގެ އުދުހުންތަކަށް ޑިމާންޑު ބޮޑުވާތީ މަންޓާއިން އުދުހޭ ރަށްތަކަށް އަޅާ ފްލައިޓުގެ އަދަދު އިތުރުކޮށްފި އެވެ.
މަންޓާ އެއާ އިން ބުނީ ފްލައިޓު އަޅާ އަދަދު އިތުރުކުރީ ދ. ކުޑަހުވަދޫ (ދާލު އެއާޕޯޓް)، ބ. ދަރަވަންދޫ (ދަރަވަންދޫ އެއާޕޯޓް)، ރ. އިފުރު (އިފުރު އެއާޕޯޓް) އަދި ޅ. މަޑިވަރު (މަޑިވަރު އެއާޕޯޓް) އަށް ކަމަށެވެ.
މަންޓާ އިން ކަސްޓަމަރުންނަށް ފަސޭހަކަމާ އެކު ދަތުރުކުރެވޭނެ އިންތިޒާމު ހަމަޖައްސަން އިތުރުކުރި ފްލައިޓްތައް އަޅާނީ އެ އެއާލައިންގެ ATR 72-600 ފްލީޓުންނެވެ.
މަންޓާ މެދުވެރިކޮށް ދަތުރުކުރަން ބޭނުންވާ މީހުންނަށް އެ އެއާލައިންގެ ވެބްސައިޓު މެދުވެރިކޮށް ބުކިން ހެއްދޭނެ އެވެ. އަދި ބުކިން އެޖެންޓްސް މެދުވެރިކޮށް ވެސް ބުކިން ހެއްދޭނެ ކަމަށް އެ އެއާލައިނުން ބުންޏެވެ.
މަންޓާ އެއާ އަކީ އެތެރޭގެ އުދުހުންތަކަށް އަދި ރިސޯޓްތަކަށް ފަތުރުވެރިންގެ ޓްރާންސްފާ ހަމަޖައްސައިދީ ފަސިންޖަރުންނަށް ރަނގަޅު ހިދުމަތެއް ފޯރުކޮށްދިނުމުގެ ޓްރެކް ރެކޯޑެއް އޮތް އެއާލައިނެކެވެ.
މަންޓާ އެއާ އިން އަންނަނީ އެތެރޭގެ އުދުހުންތަކުގެ އިތުރުން އިންޑިއާގެ ބެންގަލޫރަށް ދަތުރުކުރަމުންނެވެ. އެ އެއާލައިނުން ބެންގަލޫރަށް ދަތުރުކުރަނީ ދާލު އެއާޕޯޓުންނެވެ.
