ސުޕްރީމް ކޯޓުގެ ފަނޑިޔާރު ހުސްނުއްސުއޫދުގެ އިސްތިއުފާގެ ސިޓީ ލިބިފައިވާކަން ޖުޑީޝަލް ސާވިސް ކޮމިޝަން (ޖޭއެސްސީ) އިން ކަށަވަރުކޮށްދީފި އެވެ.
ޖޭއެސްސީން މިއަދު ނެރުނު ނޫސް ބަޔާނެއްގައި ބުނީ ހުސްނުއްސުއޫދުގެ އިސްތިއުފާގެ ސިޓީ އިއްޔެ އެ ކޮމިޝަނަށް ލިބިފައި ވާތީ އިއްޔެއިން ފެށިގެން ސުޕްރީމް ކޯޓުގެ ފަނޑިޔާރުކަމުން ހުސްނުއްސުއޫދު ވަކިވެފައިވާ ކަމަށެވެ.
"ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުކަމުގައި ހުންނެވި ސ. މީދޫ، ހަސަންކާރިގެ، އަލްއުސްތާޒު ހުސްނުއްސުއޫދު، ފަނޑިޔާރުކަމުގެ މަގާމުން މާޗު 4، 2025 ގައި އިސްތިއުފާ ދެއްވާފައި ވާތީ އެ ދުވަހުން ފެށިގެން އަލްއުސްތާޒު ހުސްނުއްސުއޫދު ފަނޑިޔާރުކަމުގެ މަގާމުން ވަކިވެފައިވެ އެވެ،" ޖޭއެސްސީގެ ބަޔާނުގައި ބުންޏެވެ.
މަގާމުން އިސްތިއުފާ ދެއްވުމަށްފަހު ސުއޫދު ޖޭއެސްސީއަށް ފޮނުވި ސިޓީގައި ވިދާޅުވެފައި ވަނީ ސުޕްރީމް ކޯޓަށް ނުފޫޒު ފޯރުވަން މަސައްކަތް ކުރަނީ، ސިޔާސީ ޕާޓީތަކަށް ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި އިސްލާހު ބާތިލް ކުރަން ކޯޓަށް ހުށަހަޅާފައިވާ މައްސަލައަށް ނުފޫޒު ފޯރުވުމުގެ ގޮތުން ކަމަށެވެ.
"ސުޕްރީމް ކޯޓަށް ހުށަހެޅިފައިވާ މި ބަޔާން ކުރެވުނު މައްސަލަ ރައީސް ޑރ. މުހައްމަދު މުއިއްޒު އާއި އެޓާނީ ޖެނެރަލް އަހުމަދު އުޝާމް އެދޭ ގޮތަށް ނިންމުމަށް ރައީސުލްޖުމްހޫރިއްޔާ އާއި އެޓާނީ ޖެނެރަލް އަހުމަދު އުޝާމް އާއި ޖޭއެސްސީގެ ރައީސް ހުސެއިން ރިޒާ އާއި އެންޓި ކޮރަޕްޝަން ކޮމިޝަނުގެ ރައީސް [ދަނީ ގާނޫނުއަސާސީއާ ހިލާފަށް ނުފޫޒު ފޯރުވަމުން]،" ސުއޫދުގެ ސިޓީގައި ވިދާޅުވެފައިވެ އެވެ.
މަޖިލިސް މެންބަރުންގެ މެންބަރުކަން ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނު ބަދަލު ކުރި މައްސަލަ ސުޕްރީމް ކޯޓަށް ބަލައިގަތުމާއެކު މަޖިލީހުން ވަނީ ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދު ކުރަން ގާނޫނަށް އިސްލާހު ގެނެސްފަ އެވެ.
މަޖިލީހަށް ބަލައިގެންތާ 48 ގަޑިއިރުތެރޭގައި ފާސްކުރި އެ ބިލު އަދި ރައީސުލްޖުމްހޫރިއްޔާ ތަސްދީގެއް ނުކުރައްވަ އެވެ. ނަމަވެސް އެ ބިލު ފާސްކުރުމާއެކު ސުޕްރީމް ކޯޓުގެ ތިން ފަނޑިޔާރުންގެ މައްސަލަތަކެއް ބަލާ ކަމަށް ބުނެ ވަނީ ސަސްޕެންޑު ކޮށްފަ އެވެ.
