އަމްސްޓެޑަމް، ނެދަލެންޑްސް (މާޗް 5) - ޖެހިޖެހިގެން ދެ މެޗުގައި ލަނޑެއް ނުޖެހި، ރޭގެ މެޗަށް އައިސް ޗެމްޕިއަންސް ލީގުގެ ގަދަ 16 ބުރުގައި ޕީއެސްވީ އައިންދޯވަން އަތުން 7-1 އިން އާސެނަލް މޮޅުވުމުން ޔަގީނުން ވެސް އެނގޭ އެއްޗަކީ އެއްވެސް މީހަކަށް ފުޓްބޯޅައިގައި ވާނެ ގޮތެއް ބުނަން ނޭނގޭނެ ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
އަނިޔާގެ ސަަބަބުން އާސެނަލްގެ ގިނަ އެޓޭކަރުންތަކެއް ކުޅުމާ ދުރުގައި ތިބިއިރު، ރޭގެ މެޗުގައި ޕީއެސްވީއާ ދެކޮޅަށް އާސެނަލް ނުކުތުމުގެ ކުރިން އެންމެ ފަހުން، އިނގިރޭސި ޕްރިމިއާ ލީގުގައި، ކުޅުނު ދެ މެޗުގައި ވެސް ލަނޑެއް ޖެހޭ ގޮތެއްނުވި އެވެ.
ރޭގެ މެޗަށް ފަހު އާޓެޓާ ބުނީ، ގިނަ ބަޔަކަށް ގަބޫލު ނުކުރެވުނު ކަމުގައި ވިޔަސް ރޭގެ މެޗަށް އައިއިރު ގިނަ ގޯލުތަކެއް ޖެހިދާނެ ކަމުގެ އުންމީދު އޭނާ އަށް އޮތް ކަމަށެވެ.
"މިއީ ފުޓްބޯޅައިގެ ބިއުޓީ އަކީ، މިތާގައި ތިބި މީހުން އަތަށް ސިޓީ އުރައެއް ދީފައި، މާދަމާ ވާނެ ގޮތެއް ބުނަން އަހަރެން އަހައިފިއްޔާ އެކަކަށް ވެސް އެ ކަމެއް ނުވާނެ. އެ ގޮތަށް ފުޓްބޯޅައިގެ ފުރިހަމަ ކަަމަކީ، ވާނެ ގޮތެއް ބުނަން ނޭނގޭނެ. އެކަމަކު، ކުރަމުން އައި މަސައްކަތްތަކަށް ބަލާފައި އަހަންނަށް ގަބޫލުކުރެވުނު މިއަދު (ރޭ) ގޯލު ޖެހޭނެއޭ،" އާޓެޓާ ބުންޏެވެ.
"ނިމުނު މެޗެއްގެ ވާހަކަ އެ ހިސާބުން އެ ނިމުނީ، ކޮންމެ މެޗަކީ ވެސް އާ މެޗެއް، މީގެ އޮތީ އިސް އުފުލައިގެން ކެރިގެން ތިބެ މަސައްކަތް ކުރުން،"
ޕީއެސްވީ އަތުން އާސެނަލް މޮޅުވި މެޗަކީ، އެ ކްލަބްގެ ތާރީހުގައި ޗެމްޕިއަންސް ލީގުގައި ރަށުންބޭރުގައި އެ ޓީމު ހޯދި އެންމެ ތަފާތު ބޮޑު މޮޅެވެ. އަންނަ ހަފްތާގައި އާސެނަލް ދަނޑުގައި ކުޅޭ ލެގުން ޕީއެސްވީން ހަތް ގޯލުގެ ފަރަގަކުން މޮޅުވެގެން ނޫން ގޮތަކަށް އާސެނަލް ކަޓުވާލުމަކީ ވާނެ ކަމެއް ނޫނެވެ. އެކަމަކު، އާޓެޓާ ބުނީ، ޔޫރަޕްގެ ކޮންމެ މެޗެއްގައި ވެސް ކެތްތެރިކަމާ އެކު މަސައްކަތްކޮށް ނަތީޖާ ނެރެން ރަނގަޅު ކުޅުމެއް ދައްކަން ޖެހޭނެ ކަމަށެވެ.
