ސުޕްރީމް ކޯޓުގެ ފަނޑިޔާރު ހުސްނުއް ސުއޫދުގެ މައްސަލަ ބަލަން ޖުޑީޝަލް ސާވިސް ކޮމިޝަނުން އުފެއްދީ ރައީސް ޑރ. މުހައްމަދު މުއިއްޒު ބޭނުންވާ ގޮތަކަށް ނިންމޭނެ އަޣުލަބިއްޔަތު އޮތް "ސަރުކާރު ކޮމިޓީ" އެއް ކަން އެނގިއްޖެ އެވެ.
ސިޔާސީ ޕާޓީތަކަށް، ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީގެ 73 ވަނަ މާއްދާއަށް ގެނައި އިސްލާހުގެ ބާތިލް ކުރަން ރައްޔިތުންގެ މަޖިލީހުގެ ކުރީގެ މެންބަރު އަލީ ހުސައިން ސުޕްރީމް ކޯޓަށް ހުށަހަޅާފައި އޮތް މައްސަލަ، ރައީސް މުއިއްޒު އެދިވަޑައިގަންނަވާ ގޮތަށް ނިންމުމަށްޓަކައި އެ ކޯޓުގެ ފަނޑިޔާރުންނަށް ބިރު ދައްކައި، ނުފޫޒު ފޯރުވަމުން ގެންދަވާ ކަމަށް ވިދާޅުވެ، އެކަމާ އިހުތިޖާޖުކުރުމުގެ ގޮތުން ފަނޑިޔާރު ސުއޫދު އިއްޔެ ވަނީ އިސްތިއުފާ ދެެއްވައިފަ އެވެ.
ސުއޫދު އިސްތިއުފާ ދެއްވީ އޭސީސީ އާއި ޖޭއެސްސީން އުފެއްދި މައްސަލައެއް ބަލަމުން ދަނިކޮށެވެ.
ސުއޫދު އާއި ފަނޑިޔާރު މަހާޒު އަލީ ޒާހިރު، އަޒްމިރަލްދާ ޒާހިރު، ފެބްރުއަރީ 26، 2025 ގައި ސަސްޕެންޑު ކުރީ މަޖިލީހުގެ ރައްޔިތުންގެ މަޖިލީހުގެ މެންބަރުން ވަކި ކުރުމުގެ އެއްވެސް އިޖުރާއަތެއް ނުހިންގުމަށް އަމުރެއް ނެރެދިނުމަށް ހުށަހެޅި މައްސަލައިގެ އަޑުއެހުން ފަށަން ކުޑަ ވަގުތުކޮޅަކަށްވެފައި ވަނިކޮށެވެ.
ފަނޑިޔާރުން ސަސްޕެންޑު ކުރީ އޭސީސީން ޖިނާއީ ތަހުގީގެއް ކުރަމުންދާ ކަމަށް ބުނެ ޖޭއެސްސީއަށް އެނގުމުންނެވެ. ނަމަވެސް، އެ ތުހުމަތަކީ ކޮބައިކަން ޖޭއެސްސީން ވެސް އަދި އޭސީސީން ވެސް ހާމައެއް ނުކުރެ އެވެ.
އޭސީސީން ބަލަމުންދާ މައްސަލައިގެ އިތުރުން، ތިން ފަނޑިޔާރުންގެ ސުލޫކީ މައްސަލައެއް ވެސް ބަލަމުންދާ ކަމަށް ޖޭއެސްސީން ބުނެފައިވެ އެވެ.
ސުއޫދުގެ މައްސަލަ ބަލަން އުފެއްދި ޖޭއެސްސީގެ ކޮމިޓީގައި ހިމެނިވަޑައިގަންނަވަނީ، ސަސްޕެންޑުކުރުމުގެ މަސައްކަތް ހިންގުމުގައި އިސްކޮށް އުޅުއްވި ބަންޑާރަ ނައިބު އަހުމަދު އުޝާމް އާއި، ފަނޑިޔާރުން ސަސްޕެންޑުކުރުމުގެ ކުރިން ޖޭއެސްސީ އަށް އައްޔަން ކުރި ރައީސުލްޖުމްހޫރިއްޔާގެ މެންބަރު ޔަޒްމީދު މުހައްމަދު އަދި ވަކީލުންގެ ތެރެއިން އައްޔަން ކުރެއްވި އަލީ އަބްދުއްލަތީފުކަން، އިތުބާރު ކުރެވޭ މަސްދަރުތަކުން "އަދަދު" ނޫހަށް ކަށަވަރުކޮށް ދީފައިވެ އެވެ.
ފަނޑިޔާރުން ސަސްޕެންޑުކުރުމަށްޓަކައި އެންމެ 13 މިނެޓުގެ ނޯޓިހެއް ދިނުމަށް ފަހު ޖޭއެސްސީގެ ކުއްލި ޖަލްސާ ބޭއްވުމަށް ހުށަހެޅުއްވި ތިން މެންބަރުންގެ ތެރޭގައި ވެސް އުޝާމް ހިމެނިވަޑައިގަންނަވަ އެވެ.
ސުއޫދުގެ މައްސަލަ ތަހުގީގު ކުރަން ޖޭއެސްސީން "ސަރުކާރު ކޮމިޓީ"އެއް އުފެއްދިއިރު، ސުޕްރީމް ކޯޓަށް ނުފޫޒު ފޯރުވަން މަސައްކަތް ކުރަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ބަންޑާރަ ނައިބު އަހުމަދު އުޝާމް އާއި ޖޭއެސްސީގެ ރައީސް ހުސެއިން ރިޒާ އާދަމް އަދި އޭސީސީގެ ރައީސް އާދަމް ޝާމިލް ކަމަށް އެންމެ މަތީ ކޯޓުން އިއްޔެ އިސްތިއުފާ ދެއްވި ސުއޫދު ޖޭއެސްސީ އަށް ފޮނުއްވި ސިޓީގައިވެ އެވެ.
