ސުޕްރީމް ކޯޓުގެ ފަނޑިޔާރު ހުސްނުއްސުއޫދު އިސްތިއުފާ ދެއްވި ކަމުގެ ސިޓީ ޖުޑީޝަލް ސާވިސް ކޮމިޝަން (ޖޭއެސްސީ) އަށް ވެސް ހުށަހަޅައިފި އެވެ.
ޖޭއެސްސީއަށް ފޮނުއްވެވި ސިޓީގައި ވެސް ސުއޫދު ފާހަގަކުރައްވާފައި ހުރީ އޭނާ އިސްތިއުފާދެއްވަން ރައީސް ޑރ. މުހައްމަދު މުއިއްޒުއަށް ފޮނުއްވި ސިޓީގައި ވެސް ހުރި ވާހަކަތަކެވެ.
އެ ސިޓީގައި ސުއޫދު ވިދާޅުވެފައި ވަނީ ސިޔާސީ ޕާޓީތަކަށް، ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނު އަސާސީ ބަދަލުކުރި މައްސަލަ ރައީސް ބޭނުންވެލައްވާ ގޮތަށް ނިންމެވުމަށް ފަނޑިޔާރުންނަށް ބިރު ދައްކައި، ނުފޫޒު ފޯރުވަމުން ގެންދަވާ ކަމަށް ވިދާޅުވެފަ އެވެ.
ސުއޫދުގެ ސިޓީގައި ލިޔުއްވި ގޮތުގައި ގާނޫނު އަސާސީ ބަދަލުކުރި މައްސަލަ ބެލުމުގެ އިހުތިސާސް ސުޕްރީމް ކޯޓަށް ލިބިގެންވާ ކަމަށް އެ ކޯޓުން ނިންމުމާއެކު، ސަރުކާރުން ގާނޫނުއަސާސީއާ ހިލާފަށް ދިވެހިރާއްޖޭގެ އަދުލު އިންސާފުގެ ބާރަށް ނުފޫޒު ފޯރުވައި ސުޕްރީމް ކޯޓަށް ހުށަހެޅިފައި އޮތް މައްސަލަ ބެލުން ހުއްޓުވުމަށް ފަނޑިޔާރުންގެ އަދަދު މަދުކޮށް މައްސަލަތައް ބަލަން ފެށީ ކަމަށެވެ.
ޖޭއެސްސީއަށް ފޮނުއްވި ސިޓީގައި ސުުއޫދު ވަނީ ރައީސްގެ އިތުރުން ބަންޑާރަނައިބު އަހުމަދު އުޝާމް ވެސް ނުފޫޒު ފޯރުވަން މަސައްކަތް ކުރައްވާ ކަމަށް ވިދާޅުވެފަ އެވެ. އަދި މިކަމަށް ފަހިކޮށްދެމުން ދަނީ ޖޭއެސްސީގެ ރައީސް އާއި އޭސީސީގެ ރައީސް ކަމަށް އޭނާ ލިޔުއްވާފައިވެ އެވެ.
ސުއޫދު ވިދާޅުވީ އޭނާ އިސްތިއުފާ ދެއްވަނީ މިކަންކަމަށް އިހުތިޖާޖު ކުރުމުގެ ގޮތުން ކަމަށެވެ.
ގާނޫނު އަސާސީއަށް ގެނައި ބަދަލު ބާތިލް ކުރަން ރައްޔިތުންގެ މަޖިލީހުގެ ކުރީގެ މެންބަރު އަލީ ހުސައިން ހުށަހެޅުއްވި މައްސަލަ ބެލުން ހުއްޓުވުމަށްޓަކައި، އޭސީސީން މައްސަލައެއް ބަލަމުންދާ ކަމަށް ބުނެ ސަސްޕެންޑުކުރީ ފަނޑިޔާރު ސުއޫދުގެ އިތުރުން، ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު އަދި ފަނޑިޔާރު އަޒްމިރަލްދާ ޒާހިރު އެވެ.
ފަނޑިޔާރުންގެ ގާނޫނު އޮންނަ ގޮތަށް އެއްވެސް ކޯޓެއްގެ ފަނޑިޔާރަކު އިސްތިއުފާ ދިން ކަން ޖޭއެސްސީއަށް އެންގުމުން އިސްތިއުފާ ދެވުނީ އެވެ. އިސްތިއުފާ ބަލައިނުގަތުމުގެ ހައްގެއް އެ ކޮމިޝަނަކަށް ނުލިބެ އެވެ.
