މިއާމީ، ޔުނައިޓެޑް ސްޓޭޓްސް (ފެބްރުއަރީ 26) - މޭޖަ ލީގު ސޮކާ (އެމްއެލްއެސް)ގެ އާ ސީޒަނުގައި ކުުޅުނު ފުރަތަމަ މެޗުގައި ނިއު ޔޯކް ސިޓީގެ އެސިސްޓަންޓް ކޯޗު، މެހެދީ ބަލޫޝީ ކަރުގައި ހިފުމުން، އިންޓަ މިއާމީގެ ކެޕްޓަން، ލިއޮނަލް މެސީ އަށް ފިޔަވަޅު އަޅައިފި އެވެ.
ނިއު ޔޯކް ސިޓީއާ 2-2 އިން އެއްވަރުވި މެޗަށް ފަހު، މެސީ ގޮސް ބަލޫޝީގެ ކަރުގައި ހިފުުމުން ރައްދުގައި އޭނާ އެއްވެސް ކަމެއް ކޮށްފައިނުވެ އެވެ. މި މަހު 22 ވަނަ ދުވަހު ހިނގި މި މައްސަލަ އެމްއެލްއެސްގެ ޑިސިޕްލިނަރީ ކޮމީޓީން ބަލާފައި ނިންމީ މެސީ ޖޫރިމަނާ ކުރުމަށެވެ. އެކަމަކު، ޖޫރިމަނާ ކުރި ސީދާ އަދަދެއް ހާމަކޮށްފައެއްނުވެ އެވެ. ރިޕޯޓްތައް ބުނާގޮތުން، އެ ޖޫރިމަނާ އެއް ލައްކަ ޑޮލަރަށް އަރާނެ އެވެ.
ހަމަ މި މެޗުގައި، މިއާމީގެ ފޯވާޑް، ލުއިސް ސުއަރޭޒް، ނިއު ޔޯކްގެ ކުޅުންތެރިއެއްގެ ކަރުގައި ހިފާފައިވާތީވެ، އޭނާ ވެސް ވަނީ ޖޫރިމަނާކޮށްފަ އެވެ.
މި ކަންތައްތަކާ ބެހޭގޮތުން، ސުވާލުކުރުމުން މިއާމީގެ ކޯޗު، ހަވިއޭ މަޝެރާނޯ ބުނެފައިވަނީ، ޖަޒުބާތުގައި ޖެހިގެން މެސީ އާއި ސުއަރޭޒަށް ހެދުނީ ގޯހެއް ކަމަށާއި ޗޭންޖިން ރޫމަށް އައުމަށް ފަހު އެ ދެ ކުޅުންތެރިން ދެއްކި ވާހަކަތަކަށް ބަލާއިރު، ކުރެވުނު ކަންކަން ގޯސްކޮށް ދެ ކުޅުންތެރިންނަށް ވެސް ވިސްނިފައިވާ ކަމަށެވެ.
އިންޓަ މިއާމީން ދެން ކުޅޭ މެޗުގައި ބައްދަލުކުރާނީ ހިއުސްޓަން ޑިނަމޯއާ އެވެ.
