މެންޗެސްޓާ (ފެބްރުއަރީ 11) - މެންޗެސްޓާ ޔުނައިޓެޑަށް ކުޅެމުން އަންނަ ބްރެޒިލްގެ މިޑްފިލްޑަރު، ކަސެމީރޯ މި ފަހަރުގެ ޓްރާންސްފާ މާކެޓްގައި ކުރިިން ބްރެޒިލްގެ ފްލެމިންގޯ އަށް ބަދަލުވާނެ ކަމަށް ރިޕޯޓްތައް ބުނެފި އެވެ.
ރެއާލް މެޑްްރިޑާ އެކު ކާމިޔާބު ސީޒަންތަކެއް ހޭދަކުރުމަށް ފަހު ކަސެމީރޯ ޔުނައިޓެޑަށް ބަދަލުވީ 2022 ވަނަ އަހަރުގެ ތެރޭގަ އެވެ.
އެ ފަހުން ޔުނައިޓެޑްގައި ވެސް ކަސެމީރޯ މޮޅު ކުޅުމެއް ދެއްކި އެވެ. އެކަމަކު، މި ސީޒަނުގައި ޔުނައިޓެޑުގައި އެ ކުޅުން ކަސެމީރޯ އަށް ދެއްކިފައިނުވާއިރު، އޭނާ އަށް ސަޕޯޓަރުންގެ ފާޑުކިޔުންވެސް ވަނި އަމާޒުވެފަ އެވެ. އަދި ޔުނައިޓެޑްގެ ކޯޗު ރުބެން އަމޮރިމް ގެ ޕްލޭންގައި ވެސް ކަސެމީރޯ ނުހިމެނޭ ކަމަށް ރިޕޯޓްތައް ބުނެ އެވެ.
ޔުނައިޓެޑުން މި ފަހުން ކުޅުނު ފަސް މެޗުގައި ވެސް ކަސެމީރޯ އިނީ ބެންޗުގަ އެވެ.
ޔުނައިޓެޑާ އެކު، 2026 ވަނަ އަހަރުގެ ޖޫން މަހުގެ ނިޔަލަށް ކޮންޓްރެކްޓް އޮތް، ކަސެމީރޯ އަށް ފްލެމިންގޯގެ އިތުރުން ބެސިކްޓާސް އާއި ސައުދީ އަރަބިއްޔާގެ ޕްރޯ ލީގުގެ ކްލަބް އަލް ނަސްރުން ވެސް އަންނަނީ ފާރަލަމުންނެވެ. އެކަމަކު، ކަސެމީރޯ ބަދަލުވުން އެންމެ ގާތީ ފްލެމިންގޯ އަށް ކަމަށް ބެލެވެ އެވެ.
ކަސެމީރޯ ވަނީ ރެއާލާ އެކު، ފަސް ޗެމްޕިއަންސް ލީގު ކާމިޔާބު ކޮށްފަ އެވެ. ބްރެޒިލް ގައުމީ ޓީމުގެ ކެޕްޓަން ބޭންޑް އަޅައިގެން ވެސް ކުޅެފައިވާ ކަސެމީރޯ އަށް ކެރިއަރުގައި އެންމެ ރަނގަޅު ކާމިޔާބެއް ލިބުނީ މެޑްރިޑްގަ އެވެ.
